ಪ್ರಬೋಧಿನಿ ಗುರುಕುಲ: ಎಸ್.ಎಲ್. ಭೈರಪ್ಪ ಕಂಡಂತೆ…

ಮೈಸೂರು - 0 Comment
Issue Date : 01.05.2015

 ಏ. 19ರಂದು ಮೈಸೂರಿನ ‘ಮಂಥನ’ (ಲೇಖಕರ ಚಿಂತಕರ ಬಳಗ) ಆಶ್ರಯದಲ್ಲಿ ಪ್ರಾಥಮಿಕ ಶಿಕ್ಷಣದಲ್ಲಿ ಕನ್ನಡ ಮಾಧ್ಯಮದ ಪ್ರಶ್ನೆ ಸಂವಾದ ಕಾರ್ಯಕ್ರಮದಲ್ಲಿ ಖ್ಯಾತ ಸಾಹಿತಿ ಡಾ. ಎಸ್.ಎಲ್. ಭೈರಪ್ಪ ಪಾಲ್ಗೊಂಡಿದ್ದರು. ಆ ಸಂದರ್ಭದಲ್ಲಿ ಅವರು ಹರಿಹರಪುರ ಪ್ರಬೋಧಿನಿ ಗುರುಕುಲದ ಕುರಿತು ವ್ಯಕ್ತಪಡಿಸಿದ ಮನದಾಳದ ಮಾತುಗಳು ಇಲ್ಲಿವೆ…

ನಾನು ಇತ್ತೀಚಿಗೆ ಚಿಕ್ಕಮಗಳೂರು ಜಿಲ್ಲೆ ಕೊಪ್ಪ ತಾಲ್ಲೂಕಿನ ತುಂಗಾನದಿಯ ದಂಡೆಯಲ್ಲಿರುವ ಹರಿಹರಪುರದಲ್ಲಿರುವ ಪ್ರಬೋಧಿನಿ ಗುರುಕುಲದಲ್ಲಿ ಒಂದು ವಾರ ಉಳಿದಿದ್ದೆ . ಅದರ ಕಾರ್ಯ ವಿಧಾನವನ್ನು ಅಧ್ಯಯನ ಮಾಡಿದೆ ಇಲ್ಲಿ ಸಂಪೂರ್ಣವಾದ ವಿದ್ಯಾಭ್ಯಾಸ ಇದೆ ಎಂದರೆ ನಿಮಗೆ ಆಶ್ಚರ್ಯ ವಾಗಬಹುದು. ಹಾಗಾದರೆ ಸಂಪೂರ್ಣ ವಿದ್ಯಾಭ್ಯಾಸ ಎಂದರೇನು?
ಇದೊಂದು ಪ್ರಯೋಗಾತ್ಮಕ ಶಾಲೆ. ವಿದ್ಯಾರ್ಥಿಗಳೂ ಉಪಾಧ್ಯಾಯರು ಅವರಲ್ಲಿ ಅನೇಕರು ಉಪಾಧ್ಯಾಯ ದಂಪತಿಗಳು. ಅವರ ವಾಸ್ತವ್ಯವೂ ಗುರುಕುಲದಲ್ಲೇ. ಅವರೆಲ್ಲರೂ ವಿದ್ಯಾರ್ಥಿಗಳೊಟ್ಟಿಗೆ ಅಲ್ಲೇ ಒಟ್ಟಾಗಿ ಇರುತ್ತಾರೆ. ಜೊತೆಯಲ್ಲೆ ಊಟ.
ಬೆಳಗಿನ ಐದು ಗಂಟೆಗೆ ಮಕ್ಕಳು ಎದ್ದು ತಮ್ಮ ದೈನಂದಿನ ಕಾರ್ಯ ಮುಗಿಸಿ ಯೋಗಭ್ಯಾಸ ಮಾಡುತ್ತಾರೆ. ನಾನು ನೋಡಿದಂತೆ ಒಬ್ಬೊಬ್ಬ ವಿದ್ಯಾರ್ಥಿಗಳೇ ಒಂದೊಂದು ದಿನ ದೊಡ್ಡ ಸೂಕ್ತಿಗಳನ್ನು ಅಲ್ಲಿ ಸ್ಥಾಪಿಸಿರುವ ಫಲಕದಲ್ಲಿ ಬರೆಯುತ್ತಾರೆ. ಈ ಸೂಕ್ತಿಗಳು – ಅದು ಡಿವಿಜಿ ಅವರ ಮಂಕುತಿಮ್ಮನ ಕಗ್ಗದ ಕುರಿತಾಗಿರಬಹುದು ಇಲ್ಲಾ ಕುಮಾರವ್ಯಾಸನ ಭಾರತದ ಕುರಿತಾಗಿರಬಹುದು, ಸಂಸ್ಕೃತ ಇಂಗ್ಲೀಷ್ ಕೂಡ ಇರಬಹುದು – ವಿದ್ಯಾರ್ಥಿಗಳೇ ಆಯ್ಕೆ ಮಾಡಿದಂತಹ ಸೂಕ್ತಿಗಳಿವು. ಅವರು ಅದನ್ನು ಆಧ್ಯಯನ ಮಾಡಿರುತ್ತಾರೆ ಮತ್ತು ಅದರ ವಿಶೇಷತೆಯನ್ನು ಅರ್ಥಮಾಡಿಕೊಂಡಿರುತ್ತಾರೆ. ಹೀಗಾಗಿ ಬಹುತೇಕ ವಿದ್ಯಾರ್ಥಿಗಳಿಗೆ ಮಂಕುತಿಮ್ಮನ ಕಗ್ಗ ಬಾಯಿಗೆ ಬರುತ್ತದೆ, ಕುಮಾರ ವ್ಯಾಸ ಭಾರತ ಬಾಯಿಗೆ ಬರುತ್ತದೆ. ಅವುಗಳ ಅರ್ಥ ಗೊತ್ತಿರುತ್ತದೆ. ಎಷ್ಟೋ ಆಧುನಿಕ ಕನ್ನಡ ಪದ್ಯಗಳು ಅವರಿಗೆ ಗೊತ್ತಿದೆ.
ಈ ವಿದ್ಯಾರ್ಥಿಗಳು ಸಂಸ್ಕೃತದಲ್ಲಿ ಮಾತನಾಡುತ್ತಾರೆ. ಅಲ್ಲದೆ ಇಂಗ್ಲೀಷ್‌ನಲ್ಲಿ ಮಾತನಾಡುವುದೂ ಅವರಿಗೆ ಗೊತ್ತಿದೆ. ಇದು ಹೇಗೆ ಸಾಧ್ಯವಾಯಿತು? ಒತ್ತಡ ರಹಿತ ಹಾಗೂ ಉತ್ಸಾಹಭರಿತ ಪರಿಸ್ಥಿತಿಯಲ್ಲಿ, ಮಕ್ಕಳ ಕಲಿಕೆಯ ಸಂದರ್ಭದಲ್ಲಿ ಉಪಾಧ್ಯಾಯರೂ ಮಕ್ಕಳ ಜೊತೆಯಲ್ಲಿದ್ದು ಕಲಿಸುತ್ತಿರುತ್ತಾರೆ ವಿದ್ಯಾರ್ಥಿಗಳು ಕಲಿಯುತ್ತಿರುತ್ತಾರೆ.ಯಾವುದು ಮಕ್ಕಳಿಗೆ ಆಸಕ್ತಿಯನ್ನುಂಟುಮಾಡುವುದೋ ಅದನ್ನು ಕಲಿಸಲು ಅಲ್ಲಿ ಸಿದ್ಧರಿರುತ್ತಾರೆ. ಮಕ್ಕಳಿಗೆ ಗದ್ಯಕ್ಕಿಂತ ಪದ್ಯ ಆಸಕ್ತಿಯನ್ನುಂಟು ಮಾಡುತ್ತದೆ. ಅದನ್ನು ಹೇಗೆ ಕಲಿಸಬೇಕು ಅನ್ನುವುದು ಶಿಕ್ಷಕರಿಗೆ ತಿಳಿದಿರುತ್ತದೆ. ನಿರುತ್ಸಾಹದಿಂದ ಅದನ್ನು ಗದ್ಯದಂತೆ ಓದಿ ಹೇಳಿದರೆ ಮಕ್ಕಳ ಮೇಲೆ ಪದ್ಯಗಳು ಯಾವ ಪ್ರಭಾವವನ್ನೂ ಬೀರುವುದಿಲ್ಲ. ಇಲ್ಲಿ ಪದ್ಯಗಳನ್ನು ಮಕ್ಕಳಿಗೆ ಗಮಕಬದ್ಧವಾಗಿ ರಾಗಬದ್ಧವಾಗಿ ಹೇಳಿಕೊಡುತ್ತಾರೆ. ಹೀಗೆ ಪಾಠಮಾಡುವುದರಿಂದಲೇ ಮಕ್ಕಳಲ್ಲಿ ಪದ್ಯಕಲಿಯಲು ಆಸಕ್ತಿ ಉಂಟಾಗುತ್ತದೆ.
ಗಣಿತದಲ್ಲೂ ಕೂಡ ಆಸಕ್ತಿ ಉಂಟಾಗುವಂತೆ ಪಾಠ ನಡೆಯುತ್ತದೆ. ಹೈಸ್ಕೂಲ್ ಮಟ್ಟಕ್ಕಿಂತ ಹೆಚ್ಚಿಗೆ ಅವರು ಕಲಿತಿರುತ್ತಾರೆ. ಅಲ್ಲದೆ ರಾತ್ರಿ ಹೊತ್ತು ಮಕ್ಕಳನ್ನು ಹೊರಗೆ ಕರೆದುಕೊಂಡು ಹೋಗಿ ನಕ್ಷತ್ರಗಳ ಕುರಿತು ಮಾಹಿತಿ ನೀಡುತ್ತಾರೆ. ಇದು ಇಂಥ ನಕ್ಷತ್ರ, ಇಂಥ ತಿಂಗಳಲ್ಲಿ ಇದು ಹೆಚ್ಚು ಸ್ಫುಟವಾಗಿ ಕಾಣುತ್ತೆ ಎಂದೆಲ್ಲಾ ವಿವರಿಸುತ್ತಾರೆ. ಹೀಗೆ ನಕ್ಷತ್ರಗಳ ಕುರಿತಂತೆ ವಿದ್ಯಾರ್ಥಿಗಳಲ್ಲಿ ಆಸಕ್ತಿ ಉಂಟುಮಾಡುತ್ತಾರೆ.
ವಿಶೇಷವೆಂದರೆ ಪಠ್ಯೇತರ ಚಟುವಟಿಕೆಗಳಿಗೂ ಇಲ್ಲಿ ಅವಕಾಶ ಉಂಟು. ಎಲ್ಲಾ ವಿದ್ಯಾರ್ಥಿಗಳೂ ಗುರುಕುಲದಲ್ಲಿರಬಹುದಾದ ಎಲ್ಲಾ ಕೆಲಸಗಳನ್ನೂ ಕಲಿತಿರಬೇಕಾಗುತ್ತದೆ. ಪ್ರತಿ 15ದಿನಗಳಿಗೊಮ್ಮೆ ವಿದ್ಯಾರ್ಥಿಗಳ ಕರ್ತವ್ಯಗಳನ್ನು ಬದಲು ಮಾಡುತ್ತಾರೆ. ಅಡುಗೆಮನೆಗೆ ಸಂಬಂಧಿಸಿದಂತೆ ಕಾಯಿ ಪಲ್ಲೆಗಳನ್ನು ಹೆಚ್ಚುವುದು, ಅಡುಗೆ ಬೆಂದಿದೆಯೇ ಎಂದು ಪರೀಕ್ಷಿಸುವುದು, ಉಪ್ಪು ಹುಳಿ ಖಾರ ಎಷ್ಟು ಹಾಕಬೇಕು ಎಂಬುದನ್ನು ಗ್ರಹಿಸುವುದು ಇತ್ಯಾದಿ ಅಂಶಗಳನ್ನೂ ಮಕ್ಕಳು ತಿಳಿದುಕೊಂಡಿರಬೇಕಾಗುತ್ತದೆ. ಅಲ್ಲದೆ ತರಕಾರಿಯನ್ನು ಮಕ್ಕಳಿಂದಲೇ ಅಲ್ಲೇ ಬೆಳೆಸುತ್ತಾರೆ. ಒಕ್ಕಲುತನದ ಶಿಕ್ಷಣವೂ ಮಕ್ಕಳಿಗೆ ಈ ಮೂಲಕ ದೊರೆಯುತ್ತದೆ. ಯಾವ ತರಕಾರಿಗೆ ಎಂಥ ಮಣ್ಣು, ನೀರು ಎಲ್ಲುಣಿಸಬೇಕು, ಬೇರುಗಳು ನೀರನ್ನು ಹೇಗೆ ಎಳೆದುಕೊಳ್ಳುತ್ತವೆ? ನೀರು ಹೇಗೆ ವ್ಯರ್ಥವಾಗುತ್ತದೆ ಇವುಗಳನ್ನೆಲ್ಲಾ ಕಲಿಸುತ್ತಾರೆ. ಸಾವಯವ ಕೃಷಿಪದ್ಧತಿಯ ಪರಿಚಯ ಕೂಡ ಮಕ್ಕಳಿಗೆ ಅಲ್ಲಿ ಆಗುತ್ತದೆ
ದನ ಸಾಕುವುದೂ ಮಕ್ಕಳ ಇನ್ನೊಂದು ದೈನಂದಿನ ಕಾರ್ಯ. ದನ ಸಾಕಲು ಗಮನಿಸಬೇಕಾದ ಅಂಶಗಳು, ಅವುಗಳಿಗೆ ಬರುವ ಸಾಮಾನ್ಯ ಖಾಯಿಲೆಗಳು, ಅವುಗಳು ಬಾರದಂತೆ ತಡೆಗಟ್ಟುವ ವಿಧಾನ ಇವುಗಳನ್ನೂ ಮಕ್ಕಳಿಗೆ ಶಿಕ್ಷಕರು ಕಲಿಸುತ್ತಾರೆ. ಆಸಕ್ತಿಯಿಂದ ಮಕ್ಕಳು ಕಲಿಯುತ್ತಾರೆ. ಬೇರೆ ಬೇರೆ ಹಸುಗಳ ತಳಿಗಳು ಹಾಲು ಕರೆಯುವ ವಿಧಾನ, ಸಗಣಿಯಿಂದ ಸಾವಯವ ಗೊಬ್ಬರ ತಯಾರಿ. ಈ ಎಲ್ಲಾ ಪ್ರಾಥಮಿಕ ಸಂಗತಿಗಳನ್ನು ಮಕ್ಕಳಿಗೆ ಕಲಿಸಲಾಗುತ್ತದೆ. ಮಕ್ಕಳು ಈ ಎಲ್ಲಾ ಕಾರ್ಯಗಳನ್ನು ವ್ಯಾವಹಾರಿಕವಾಗಿ ಮಾಡಿ ಕಲಿಯುವುದರಿಂದ ವಿಜ್ಞಾನ ಅವರಿಗೆ ಚೆನ್ನಾಗಿ ಅರ್ಥವಾಗುತ್ತದೆ. ಅದೇ ಬೇರೆ ಶಾಲೆಗಳ ಮಕ್ಕಳಲ್ಲಿ ವ್ಯಾವಹಾರಿಕವಾಗಿ ಮಾಡುವ ಕಲಿಕೆ ಇಲ್ಲವಾಗುವುದರಿಂದ ವಿಜ್ಞಾನ ತಲೆಗೆ ಹತ್ತುವುದೇ ಇಲ್ಲ. ಬೋರ್ಡಿನ ಮೇಲೆ ಬರೆಯುವ ಚಿನ್ಹೆಗಳನ್ನು ತಮ್ಮ ಪುಸ್ತಕಗಳಲ್ಲಿ ಕಾಪಿ ಮಾಡುವ ಮಕ್ಕಳಿಗೆ ಆ ಚಿನ್ಹೆಗಳ ಪ್ರಸ್ತುತತೆಯ ಅರಿವಿರುವುದಿಲ್ಲ. ಈ ಮಕ್ಕಳಿಗೆ ವ್ಯಾವಹಾರಿಕವಾಗಿ ವಿಷಯ ಕಲಿಸುವುದರಿಂದ ವಿಜ್ಞಾನ ಮತ್ತು ಗಣಿತ ಈ ವಿಷಯಗಳು ಬೇರೆ ಮಕ್ಕಳಿಗಿಂತ ಹೆಚ್ಚಾಗಿ ಕರತಲಾಮಲಕವಾಗಿ ಅರ್ಥವಾಗಿರುತ್ತದೆ.
ಹೈಸ್ಕೂಲಿನಲ್ಲಿ ವಿದ್ಯಾಭ್ಯಾಸ ಮಾಡುವ ಮಕ್ಕಳು ಸಂಜೆವೇಳೆ ಅನೌಪಚಾರಿಕವಾಗಿ ನನ್ನ ಜೊತೆಗೆ ಸಂವಾದ ನಡೆಸುವ ಕಾರ್ಯಕ್ರಮಗಳನ್ನು ಏರ್ಪಡಿಸಿದ್ದರು. ನನ್ನನ್ನು ಮಕ್ಕಳು ಪ್ರಶ್ನೆ ಕೇಳ್ತಾರೆ, ಸಾರ್ ನೀವು ಪರ್ವ ಬರೆದಿದ್ದೀರಿ, ಕುಮಾರ ವ್ಯಾಸ ಭಾರತದಲ್ಲಿ ಈ ಪ್ರಸಂಗ ಹೀಗಿದೆ. ಅದೇ ನಿಮ್ಮ ಪರ್ವದಲ್ಲಿ ಹೀಗೆ ಬರೆದಿದ್ದೀರಿ ಇದನ್ನು ಹೀಗೆ ಏಕೆ ಬರೆದಿದ್ದೀರಿ?… ಇತ್ಯಾದಿ ಈ ಪ್ರಶ್ನೆಗಳ ಹಿಂದೆ ಅಧ್ಯಯನ ಇದೆ. ಮಕ್ಕಳು ಕುಮಾರ ವ್ಯಾಸ ಭಾರತವನ್ನೂ ಓದಿರಬೇಕು ಹಾಗೂ ಪರ್ವವನ್ನೂ ಓದಿರಬೇಕು. ಹಾಗಿದ್ದರೆ ಮಾತ್ರ ಈ ರೀತಿಯ ಪ್ರಶ್ನೆಗಳು ಮೂಡುವುದು ಸಹಜ. ಯೂನಿವರ್ಸಿಟಿಗಳಲ್ಲಿ ಓದುತ್ತಿರುವ ಎಂಎ ವಿದ್ಯಾರ್ಥಿಗಳು ಇಂಥಪ್ರಶ್ನೆಗಳನ್ನು ಕೇಳುವುದಿಲ್ಲ. ಏಕೆಂದರೆ ಅವರು ಕುಮಾರ ವ್ಯಾಸನನ್ನೂ ಓದಿರುವುದಿಲ್ಲ . ಪರ್ವವನ್ನಂತೂ ಇಲ್ಲವೇಇಲ್ಲ. ಗುರುಕುಲದಲ್ಲಿನ ಹೈಸ್ಕೂಲು ಮಕ್ಕಳು ಇಂಥ ಪ್ರಶ್ನೆಗಳನ್ನು ಕೇಳಬಹುದೆಂದರೆ ಅವರು ಚುರುಕಾಗಿರುತ್ತಾರೆ ಎಂದರ್ಥ. ಈ ಚುರುಕು ಅವರಿಗೆ ಬಂದಿದ್ದಾದರೂ ಎಲ್ಲಿಂದ? ಇದು ಕಲಿಕಾ ವಿಧಾನಗಳಿಂದ ಬರುತ್ತದೆ. ಇವರೆಲ್ಲರೂ ಕನ್ನಡ ಮಾಧ್ಯಮದ ಮಕ್ಕಳೇ, ಪರಿಕ್ಷೆಯಲ್ಲಿ ಉತ್ತರ ಬರೆಯುವುದೂ ಕನ್ನಡದಲ್ಲೇ, ಆದರೆ ಇವರಿಗೆ ಸಂಸ್ಕೃತ ಬರುತ್ತದೆ, ಇಂಗ್ಲಿಷ್ ಬರುತ್ತದೆ. ಮತ್ತು ವಿಷಯಗಳನ್ನು ಬೇರೆ ಬೇರೆ ಭಾಷೆಗಳ ಮುಖಾಂತರವೂ ತಿಳಿಯುವ ಪ್ರಯತ್ನ ಮಾಡುತ್ತಾರೆ.
ಇಲ್ಲಿ ಗಮನಿಸಬೇಕಾದ ಮಹತ್ವದ ಸಂಗತಿಯೆಂದರೆ ಇವರು ಸರಕಾರದಿಂದ ಯಾವುದೇ ಧನಸಹಾಯ ಪಡೆಯುವುದಿಲ್ಲ. ಒಂದುವೇಳೆ ಸರಕಾರದ ಧನಸಹಾಯ ಬಯಸಿದ್ದೇ ಆದರೆ ಸರಕಾರದ ನಿಯಮಗಳನ್ನು ಅನುಸರಿಸಬೇಕಾಗುವುದು. ಆಗ ಈ ಗುರುಕುಲ ಶಾಲೆಯಲ್ಲಿ ಬೋಧಿಸಲು ಬೇಕಾದ ನಿಷ್ಠೆ, ಪ್ರತಿಭೆ, ಸಾಮರ್ಥ್ಯ, ಕೌಶಲ್ಯ ಇವುಗಳನ್ನು ಹೊಂದಿರುವ ಶಿಕ್ಷಕ ಸಿಗುವುದು ಕಷ್ಟ. ಆಗ ಗುಣಾತ್ಮಕತೆಗೆ ತಿಲಾಂಜಲಿ ನೀಡಬೇಕಾಗಬಹುದು. ಹಾಗಾದರೆ ಇಂಥ ಶಾಲೆಗಳಿಗೆ ಬೇಕಾದ ಆರ್ಥಿಕ ಬೆಂಬಲ ಯಾವುದು? ಇಲ್ಲಿನ ಶಿಕ್ಷಣದ ಪದ್ಧತಿ, ಗುಣಮಟ್ಟದ ಅರಿವು ಇರುವ ರೈತರು ತಮ್ಮ ಮನೆಗಳಿಂದ ಗಾಡಿಗಳಲ್ಲಿ ಅಕ್ಕಿ ಬೇಳೆ, ಧವಸ ಧಾನ್ಯಗಳನ್ನು ಕಳುಹಿಸಿದರೆ, ಕೊಡುಗೈ ದಾನಿಗಳು ಇಟ್ಟಿರುವ ಠೇವಣಿಯ ಬಡ್ಡಿಹಣದಿಂದ ಉಪಾಧ್ಯಾಯರಿಗೆ ಕಿಂಚಿತ್ ಸಂಬಳವನ್ನೂ ನೀಡುತ್ತಾರೆ. ಈ ಉಪಾಧ್ಯಾಯರುಗಳಿಗೆ ಊಟೋಪಹಾರಗಳಂತೂ ವಿದ್ಯಾರ್ಥಿಗಳ ಜೊತೆಯಲ್ಲಿ ಇಲ್ಲಿಯೇ ಆಗುತ್ತದೆ. ಈ ಉಪಾಧ್ಯಾಯರುಗಳಾದರೋ ಗುರುಕುಲದ ಗುರಿಗೆ ಅನುಗುಣವಾಗಿ ಸಮರ್ಪಣಾ ಮನೋಭಾವದಿಂದ ಇಲ್ಲಿ ಕೆಲಸಮಾಡುತ್ತಿರುವುದನ್ನು ನಾನು ಗಮನಿಸಿದ್ದೇನೆ
ಪ್ರಬೋಧಿನಿ ಗುರುಕುಲ, ಇದೊಂದು ಪರ್ಯಾಯವಾದ ಚಳುವಳಿ. ಈ ರೀತಿಯ ಪರ್ಯಾಯ ಶಾಲೆಗಳು ಬರಬೇಕೆಂಬುದು ನನ್ನ ಆಶಯ. ಏಕೆಂದರೆ ಇಂದು ನಾವು ಇಂಗ್ಲಿಷ್ ಮಾಧ್ಯಮ ಬೇಡ, ಕನ್ನಡ ಮಾಧ್ಯಮ ಬೇಕೆಂದು ಚಳುವಳಿ ನಡೆಸುತ್ತೇವೆ. ಆದರೆ ಇಂಗ್ಲಿಷ್ ಮಾಧ್ಯಮ ಶಾಲೆಗಳಲ್ಲಿರುವಂಥ (ಕೆಲವೊಂದು) ಶಿಸ್ತು, ಆಕಷರ್ಣೆ ಕಾರಣ. ಆದರೆ ಪ್ರಬೋಧಿನಿ ಗುರುಕುಲದಂತಹ ಪರ್ಯಾಯ ಶಾಲೆಗಳಲ್ಲಿ ಮಾಧ್ಯಮ ಕನ್ನಡವಾದರೂ ಗುಣಮಟ್ಟ ಮಾತ್ರ ಯಾವುಕ್ಕೂ ಕಡಿಮೆ ಇಲ್ಲದಂತವು. ಹೀಗಾಗಿ ಇಂತಹ ಶಾಲೆಗಳು ಹೆಚ್ಚಾಗಬೇಕೆಂಬುದು ನನ್ನ ಖಚಿತ ಅಭಿಪ್ರಾಯ.
(ಇದೇರೀತಿ ಕಾರ್ಯ ನಿರ್ವಹಿಸುತ್ತಿರುವ ಇನ್ನೂ ಎರಡು ಗುರುಕುಲಗಳು. ಎಂದರೆ ಎಸ್ ಎಸ್ ಎಲ್ ಸಿ ನಂತರದ ವಿದ್ಯಾರ್ಥಿಗಳಿಗೆ ವೇದ ವಿಜ್ಞಾನ ಗುರುಕುಲ ಚನ್ನೇನ ಹಳ್ಳಿ, ಮಾಗಡಿ ತಾಲ್ಲೂಕು) ಮತ್ತು ಮೈತ್ರೇಯಿ ಗುರುಕುಲಂ (ಹೆಣ್ಣುಮಕ್ಕಳಿಗೆ ನಿಶ್ಶುಲ್ಕ ಶಿಕ್ಷಣ ನೀಡುವ ಗುರುಕುಲ, ಮೂರ್ಕಜೆ, ಬಂಟ್ವಾಳ ತಾಲ್ಲೂಕು ದಕ್ಷಿಣ ಕನ್ನಡ 574243)

ನಿರೂಪಣೆ:ಕೆ.ಪಿ. ಪ್ರದ್ಯುಮ್ನ, ಮೈಸೂರು

   

Leave a Reply