ಆರ್‌ಎಸ್‌ಎಸ್‌ನ ದಿವಂಗತ ಪ್ರಚಾರಕ ರಂಗಾ ಹರಿ ಅವರು ಬರೆದಿರುವ ‘ದಿ ಸ್ಟೋರಿ ಆಫ್ ವಂದೇ ಮಾತರಂ’ ಪುಸ್ತಕದ ಇಂಗ್ಲಿಷ್ ಅನುವಾದವನ್ನು ಅಕ್ಟೋಬರ್ 26ರಂದು ನವದೆಹಲಿಯಲ್ಲಿ ಬಿಡುಗಡೆ ಮಾಡಲಾಯಿತು. ಸ್ವಾತಂತ್ರ್ಯ ಹೋರಾಟದಲ್ಲಿ ವಂದೇ ಮಾತರಂ ಗೀತೆಯ ಪಾತ್ರ, ಭಾರತದ ನಾಗರಿಕತೆಯೊಂದಿಗಿನ ಅದರ ಸಂಬಂಧ ಹಾಗೂ ಗೀತೆಯ ಕುರಿತು ವ್ಯಕ್ತವಾಗುತ್ತಿರುವ ರಾಜಕೀಯ ಆಕ್ಷೇಪಗಳ ಬಗ್ಗೆ ಕಾರ್ಯಕ್ರಮದಲ್ಲಿ ಗಣ್ಯರು ಮಾತನಾಡಿದರು.
ನವದೆಹಲಿಯ ಕಾನ್ಸ್ಟಿಟ್ಯೂಷನ್ ಕ್ಲಬ್‌ನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಕೇರಳ ಮತ್ತು ಬಿಹಾರದ ಮಾಜಿ ರಾಜ್ಯಪಾಲ ಆರಿಫ್ ಮೊಹಮ್ಮದ್ ಖಾನ್ ಅವರು ಪುಸ್ತಕದ ಇಂಗ್ಲಿಷ್ ಅನುವಾದವನ್ನು ಬಿಡುಗಡೆ ಮಾಡಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಅವರು, “ವಂದೇ ಮಾತರಂ ಕೇವಲ ದೇಶಭಕ್ತಿಯ ಗೀತೆಯಲ್ಲ. ಇದು ನಮ್ಮ ನಾಗರಿಕತೆಯ ಗುರುತು, ಸ್ವಾತಂತ್ರ್ಯ ಹೋರಾಟ ಮತ್ತು ರಾಷ್ಟ್ರೀಯ ಏಕತೆಯ ಸಾಮೂಹಿಕ ಆಶಯವನ್ನು ಪ್ರತಿನಿಧಿಸುವ ಶಾಶ್ವತ ಸಂಕೇತವಾಗಿದೆ” ಎಂದರು.
ವಂದೇ ಮಾತರಂ ಗೀತೆಗೆ ವ್ಯಕ್ತವಾಗುತ್ತಿರುವ ಆಕ್ಷೇಪಗಳು ಮೂಲತಃ ರಾಜಕೀಯ ಸ್ವರೂಪದ್ದಾಗಿವೆ ಎಂದು ಆರಿಫ್ ಮೊಹಮ್ಮದ್ ಖಾನ್ ಹೇಳಿದರು. ತಮ್ಮ ಅನುಭವವೊಂದನ್ನು ವಿವರಿಸಿದ ಅವರು, ವಂದೇ ಮಾತರಂ ಗೀತೆಯನ್ನು ಉರ್ದು ಭಾಷೆಗೆ ಅನುವಾದಿಸಿ, ಅದು ಯಾವ ಗೀತೆ ಎಂಬುದನ್ನು ತಿಳಿಸದೆ ಓರ್ವ ಇಸ್ಲಾಮಿಕ್ ವಿದ್ವಾಂಸರಿಗೆ ನೀಡಿದ್ದಾಗಿ ಹೇಳಿದರು. ಆ ವಿದ್ವಾಂಸರಿಗೆ ವಂದೇ ಮಾತರಂ ಬಗ್ಗೆ ಒಲವಿರಲಿಲ್ಲ. ಆದರೆ, ಉರ್ದು ಭಾಷೆಯಲ್ಲಿದ್ದ ಗೀತೆಯನ್ನು ಓದಿದಾಗ ಅದರಲ್ಲಿ ಆಕ್ಷೇಪಿಸುವಂತಹ ಯಾವುದೇ ಅಂಶ ಕಂಡುಬರಲಿಲ್ಲ ಎಂದು ಅವರು ತಿಳಿಸಿದರು.
ಜಗತ್ತಿನ ವಿವಿಧ ಭಾಗಗಳಲ್ಲಿ ಕಿರುಕುಳಕ್ಕೆ ಒಳಗಾದ ಜನರಿಗೆ ಆಶ್ರಯ ನೀಡಿದ ಏಕೈಕ ದೇಶ ಭಾರತ ಎಂದು ಆರಿಫ್ ಮೊಹಮ್ಮದ್ ಖಾನ್ ಹೇಳಿದರು. ರಂಗಾ ಹರಿ ಅವರೊಂದಿಗಿನ ಒಡನಾಟವನ್ನು ಸ್ಮರಿಸಿದ ಅವರು, ದಿವಂಗತ ಆರ್ಎಸ್ಎಸ್ ಪ್ರಚಾರಕ ರಂಗಾ ಹರಿ ಅವರು ಅತ್ಯುತ್ತಮ ವಿದ್ವಾಂಸರಾಗಿದ್ದರು ಎಂದು ಬಣ್ಣಿಸಿದರು.
ದೆಹಲಿ ವಿಶ್ವವಿದ್ಯಾಲಯದ ಕುಲಪತಿ ಪ್ರೊ. ಯೋಗೇಶ್ ಸಿಂಗ್ ಮಾತನಾಡಿ, ವಂದೇ ಮಾತರಂ ರಾಷ್ಟ್ರೀಯ ಮತ್ತು ನಾಗರಿಕತೆಯ ಮೌಲ್ಯಗಳ ನೈಜ ಸ್ಫೂರ್ತಿಯನ್ನು ಪ್ರತಿನಿಧಿಸುತ್ತದೆ ಎಂದರು. ರಾಷ್ಟ್ರಗೀತೆಗೆ ಇಂದಿಗೂ ಏಕೆ ವಿರೋಧ ವ್ಯಕ್ತವಾಗುತ್ತಿದೆ ಎಂದು ಪ್ರಶ್ನಿಸಿದ ಅವರು, ವಂದೇ ಮಾತರಂಗೆ ಸೂಕ್ತ ಮನ್ನಣೆ ನೀಡಿದ ನರೇಂದ್ರ ಮೋದಿ ಸರ್ಕಾರವನ್ನು ಶ್ಲಾಘಿಸಿದರು.
ಪ್ರಜ್ಞಾ ಪ್ರವಾಹದ ರಾಷ್ಟ್ರೀಯ ಸಂಚಾಲಕ ಜೆ. ನಂದಕುಮಾರ್ ಅವರು 1905ರ ಬಂಗ ಭಂಗ್ ಆಂದೋಲನದ ಕುರಿತು ಮಾತನಾಡಿದರು. ಬ್ರಿಟಿಷರು ಬಂಗಾಳವನ್ನು ವಿಭಜಿಸಲು ರೂಪಿಸಿದ್ದ ಯೋಜನೆಯನ್ನು ಭಾರತೀಯರು ಈ ಆಂದೋಲನದ ಮೂಲಕ ಹೇಗೆ ಎದುರಿಸಿದರು ಎಂಬುದನ್ನು ವಿವರಿಸಿದರು.
1947ರಲ್ಲಿ ದೇಶ ವಿಭಜನೆಯನ್ನು ತಡೆಯಲು ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್ ಏಕೆ ವಿಫಲವಾಯಿತು ಎಂಬ ಪ್ರಶ್ನೆಯನ್ನೂ ಅವರು ಎತ್ತಿದರು. ಕಾಂಗ್ರೆಸ್‌ಗೆ ಸಾಕಷ್ಟು ಪ್ರಭಾವ ಮತ್ತು ಶಕ್ತಿ ಇದ್ದರೂ ದೇಶ ವಿಭಜನೆಯನ್ನು ತಡೆಯಲು ಸಾಧ್ಯವಾಗಲಿಲ್ಲ. ಈ ನಡುವೆ ಏನು ತಪ್ಪಾಯಿತು ಎಂಬುದನ್ನು ಪರಿಶೀಲಿಸಬೇಕು ಎಂದು ಹೇಳಿದರು.
ಬಂಗ ಭಂಗ್ ಆಂದೋಲನದ ಸಂದರ್ಭದಲ್ಲಿ ವಂದೇ ಮಾತರಂ ಪ್ರಬಲ ರಾಷ್ಟ್ರೀಯ ಮಂತ್ರವಾಗಿ ಕೆಲಸ ಮಾಡಿತ್ತು ಎಂದು ನಂದಕುಮಾರ್ ಹೇಳಿದರು. ಬ್ರಿಟಿಷರ ವಿಭಜನೆಯ ಯೋಜನೆಗಳ ವಿರುದ್ಧ ಜನರಲ್ಲಿ ಹೋರಾಟದ ಮನೋಭಾವ ಮತ್ತು ಒಗ್ಗಟ್ಟನ್ನು ಮೂಡಿಸಿತ್ತು. ಆದರೆ, ನಂತರ ಕಾಂಗ್ರೆಸ್ ವಂದೇ ಮಾತರಂ ಗೀತೆಯ ಸಂಕ್ಷಿಪ್ತ ರೂಪವನ್ನು ಒಪ್ಪಿಕೊಂಡಿತು. ಇದರಿಂದ ಜನರನ್ನು ಒಗ್ಗೂಡಿಸುವ ಗೀತೆಯ ಶಕ್ತಿ ಕಡಿಮೆಯಾಯಿತು ಮತ್ತು ದೇಶ ವಿಭಜನೆಯನ್ನು ವಿರೋಧಿಸುವ ರಾಷ್ಟ್ರೀಯ ಸಂಕಲ್ಪ ದುರ್ಬಲವಾಯಿತು ಎಂಬುದು ಅವರ ಅಭಿಪ್ರಾಯವಾಗಿತ್ತು.
ಮೂಲತಃ ಮಲಯಾಳಂ ಭಾಷೆಯಲ್ಲಿ ಪ್ರಕಟವಾಗಿದ್ದ ‘ದಿ ಸ್ಟೋರಿ ಆಫ್ ವಂದೇ ಮಾತರಂ’ ಪುಸ್ತಕವನ್ನು ಇದೀಗ ಇಂಡಸ್ ಸ್ಕ್ರೋಲ್ಸ್ ಪ್ರೆಸ್ ಇಂಗ್ಲಿಷ್‌ನಲ್ಲಿ ಪ್ರಕಟಿಸಿದೆ.
ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122
