ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ (ಅಭಾಸಾಪ) ಬೆಂಗಳೂರು ಉತ್ತರ ಜಿಲ್ಲಾ ಸಮಿತಿಯ ವತಿಯಿಂದ ನವರಾತ್ರಿ ಉತ್ಸವದ ಪ್ರಯುಕ್ತ ದಿನಾಂಕ 12/10/2026 ರಂದು ಬೆಂಗಳೂರಿನ ವಿದ್ಯಾರಣ್ಯಪುರ ಬಡಾವಣೆಯಲ್ಲಿ ‘ಸಾಹಿತ್ಯ ಸಿಂಚನ’ ಕಾರ್ಯಕ್ರಮವನ್ನು ಅತ್ಯಂತ ವೈಭವದಿಂದ ಆಯೋಜಿಸಲಾಗಿತ್ತು.
ಅಭಾಸಾಪ ಕಾರ್ಯಕರ್ತೆ ಹಾಗೂ ಮೇರು ಸಾಹಿತಿ ದಿವಂಗತ ದೇವುಡು ನರಸಿಂಹ ಶಾಸ್ತ್ರಿಯವರ ಮೊಮ್ಮಗಳಾದ ಶ್ರೀಮತಿ ಅನಘಾ ರವಿಚಂದ್ರ ಅವರ ಕುಟುಂಬದವರು ಈ ಕಾರ್ಯಕ್ರಮದ ಆತಿಥ್ಯವನ್ನು ವಹಿಸಿಕೊಂಡಿದ್ದರು.
ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಪರಿಷತ್ತಿನ ಕವಿ ಮತ್ತು ಕವಯಿತ್ರಿಯರು ‘ನವರಾತ್ರಿ’ ವಿಷಯದ ಕುರಿತು ತಾವು ರಚಿಸಿದ ಕವನಗಳನ್ನು ಅತ್ಯಂತ ಭಾವಪೂರ್ಣವಾಗಿ ವಾಚಿಸಿದರು. ಇದೇ ವೇಳೆ ಪರಿಷತ್ತಿನ ಕಾರ್ಯಕರ್ತೆಯರಿಂದ ‘ನವರಾತ್ರಿಯ ವೈಶಿಷ್ಟ್ಯ’ ಹಾಗೂ ‘ಲಲಿತಾ ಸಹಸ್ರನಾಮ’ದ ಮಹತ್ವದ ಕುರಿತು ಅರ್ಥಪೂರ್ಣ ಪ್ರಸ್ತುತಿ ಮೂಡಿಬಂತು.
ವಿಶೇಷ ಆಕರ್ಷಣೆಯಾದ ಬೊಂಬೆ ಪ್ರದರ್ಶನ:
ಶ್ರೀಮತಿ ಅನಘಾ ರವಿಚಂದ್ರ ಅವರ ಮನೆಯಲ್ಲಿ ಏರ್ಪಡಿಸಲಾಗಿದ್ದ ನವರಾತ್ರಿ ಬೊಂಬೆಗಳ ಪ್ರದರ್ಶನವು ಕಾರ್ಯಕ್ರಮದ ಮುಖ್ಯ ಆಕರ್ಷಣೆಯಾಗಿತ್ತು. ಪ್ರತಿ ವರ್ಷವೂ ಹಲವು ದೂರದರ್ಶನ ವಾಹಿನಿಗಳಲ್ಲಿ ಪ್ರಸಾರಗೊಂಡು ಸತತವಾಗಿ ಬಹುಮಾನ ಗಳಿಸುತ್ತಿರುವ ಈ ಸುಂದರ ಬೊಂಬೆ ಪ್ರದರ್ಶನವನ್ನು ಈ ಬಾರಿಯೂ ವಿಶೇಷ ಪರಿಕಲ್ಪನೆಗಳೊಂದಿಗೆ ಆಯೋಜಿಸಲಾಗಿತ್ತು.
ಪಂಚಶಕ್ತಿ, ನವವಿಧ ಭಕ್ತಿ, ಮಣಿದ್ವೀಪದ ಪರಿಚಯ ಹಾಗೂ ಸಾರ್ವಜನಿಕರಿಗೆ ಹೆಚ್ಚಾಗಿ ತಿಳಿಯದ ಪೌರಾಣಿಕ ಪ್ರಸಂಗಗಳಾದ ಉಪಮನ್ಯು, ಚ್ಯವನ-ಸುಕನ್ಯಾ, ಹನುಮಂತ-ಸುವರ್ಚಲಾ ಮೊದಲಾದ ಕಥಾನಕಗಳನ್ನು ಬೊಂಬೆಗಳ ಮೂಲಕ ಮನೋಜ್ಞವಾಗಿ ಬಿತ್ತರಿಸಲಾಗಿತ್ತು.
ಇದರ ಜೊತೆಗೆ, ಬೊಂಬೆಗಳ ಲೋಕದಲ್ಲಿ ದಿವಂಗತ ದೇವುಡು ನರಸಿಂಹ ಶಾಸ್ತ್ರಿಯವರ ಜೀವನ ಮತ್ತು ಸಾಧನೆಗಳ ಕುರಿತಾದ ವಿಶೇಷ ಪ್ರಾತ್ಯಕ್ಷಿಕೆಯನ್ನು ಜೋಡಿಸಲಾಗಿತ್ತು. ಇದು ಸಾಹಿತ್ಯಾಸಕ್ತರಿಗೆ ಅವರ ಬಹುಮುಖ ಪ್ರತಿಭೆಯನ್ನು ಪರಿಚಯಿಸುವಲ್ಲಿ ಯಶಸ್ವಿಯಾಯಿತು.
ಒಟ್ಟಾರೆಯಾಗಿ ಕಲೆ, ಸಾಹಿತ್ಯ ಮತ್ತು ಸಂಸ್ಕೃತಿಯ ಸುಂದರ ಸಮ್ಮಿಲನವಾಗಿದ್ದ ಈ ಕಾರ್ಯಕ್ರಮವು ನಮ್ಮ ಭಾರತೀಯ ಪರಂಪರೆಯನ್ನು ಅತ್ಯಂತ ಪರಿಣಾಮಕಾರಿಯಾಗಿ ಬಿಂಬಿಸಿತು.
- ಜ್ಯೋತಿ ಪ್ರಸಾದ್
ಕಾರ್ಯದರ್ಶಿ-ಅಭಾಸಾಪ,ಬೆಂಗಳೂರು ಉತ್ತರ.
