ಹೊಸ ಉದ್ಯೋಗ ಸೃಷ್ಟಿಗೆ ಉತ್ತೇಜನ
ನವದೆಹಲಿ: ಭಾರತಕ್ಕೆ ಭೇಟಿ ನೀಡಿರುವ ಬ್ರಿಟನ್‌ನ (UK) ಉನ್ನತ ಮಟ್ಟದ ವ್ಯಾಪಾರ ನಿಯೋಗವು, ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ (AI) ಸಂಶೋಧನೆಗಾಗಿ £50 ಮಿಲಿಯನ್ ಹೂಡಿಕೆ ಸೇರಿದಂತೆ 1 ಶತಕೋಟಿ ಗ್ರೇಟ್ ಬ್ರಿಟನ್ ಪೌಂಡ್‌ಗಳಿಗೂ (GBP) ಅಧಿಕ ಮೌಲ್ಯದ ಹೊಸ ವಾಣಿಜ್ಯ ಒಪ್ಪಂದಗಳನ್ನು ಘೋಷಿಸಿದೆ. ಐತಿಹಾಸಿಕ ಮುಕ್ತ ವ್ಯಾಪಾರ ಒಪ್ಪಂದದ (FTA) ಅನುಷ್ಠಾನದ ನಂತರ ಎರಡೂ ದೇಶಗಳು ವ್ಯಾಪಾರ ಮತ್ತು ಹೂಡಿಕೆ ಸಂಬಂಧಗಳನ್ನು ಮತ್ತಷ್ಟು ಗಟ್ಟಿಗೊಳಿಸಲು ಮುಂದಾಗಿರುವ ಹಿನ್ನೆಲೆಯಲ್ಲಿ ಈ ಮಹತ್ವದ ಘೋಷಣೆ ಹೊರಬಿದ್ದಿದೆ.
ಬ್ರಿಟಿಷ್ ಹೈಕಮಿಷನ್ ಬಿಡುಗಡೆ ಮಾಡಿರುವ ಪತ್ರಿಕಾ ಪ್ರಕಟಣೆಯ ಪ್ರಕಾರ, 100ಕ್ಕೂ ಹೆಚ್ಚು ವ್ಯವಹಾರ ಸಂಸ್ಥೆಗಳು, ಯುಕೆ ವ್ಯಾಪಾರ ಕಾರ್ಯದರ್ಶಿ (Business Secretary), ಸ್ಕಾಟ್ಲೆಂಡ್ ಹಾಗೂ ಪರಿಸರ-ಆಹಾರ-ಗ್ರಾಮೀಣ ವ್ಯವಹಾರಗಳ ಕಾರ್ಯದರ್ಶಿಗಳು, ಉತ್ತರಾಂಗ ಇಂಗ್ಲೆಂಡ್‌ ನ 7 ಮೇಯರ್‌ಗಳು ಮತ್ತು ಜಂಟಿ ಪ್ರಾಧಿಕಾರದ ನಾಯಕನನ್ನು ಒಳಗೊಂಡ ಬೃಹತ್ ಬ್ರಿಟಿಷ್ ವ್ಯಾಪಾರ ನಿಯೋಗವು ಭಾರತಕ್ಕೆ ಆಗಮಿಸಿದೆ.
ಈ ಭೇಟಿಯ ಸಂದರ್ಭದಲ್ಲಿ, ಯುಕೆ ವ್ಯಾಪಾರ ಕಾರ್ಯದರ್ಶಿ ಜೊನಾಥನ್ ರೆನಾಲ್ಡ್ಸ್ ಅವರು ನವದೆಹಲಿಯಲ್ಲಿ ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಪಿಯೂಷ್ ಗೋಯಲ್ ಅವರನ್ನು ಭೇಟಿಯಾಗಿ, ಭಾರತ-ಯುಕೆ ಜಂಟಿ ಆರ್ಥಿಕ ಮತ್ತು ವ್ಯಾಪಾರ ಸಮಿತಿಯ (JETCO) ಸಹ-ಅಧ್ಯಕ್ಷತೆ ವಹಿಸಿದ್ದರು.
ಈ ಕುರಿತು ಸಚಿವ ಪಿಯೂಷ್ ಗೋಯಲ್ ಮಾತನಾಡಿ, “ನಮ್ಮ ಪರಸ್ಪರ ವ್ಯಾಪಾರ ಮತ್ತು ಆರ್ಥಿಕ ಪ್ರಾಮುಖ್ಯತೆಯ ವಿಷಯಗಳನ್ನು ಮುನ್ನಡೆಸಲು ಭಾರತ-ಯುಕೆ ಜಂಟಿ ಆರ್ಥಿಕ ಮತ್ತು ವ್ಯಾಪಾರ ಸಮಿತಿಯ (JETCO) 16ನೇ ಸಭೆಯ ಸಹ-ಅಧ್ಯಕ್ಷತೆ ವಹಿಸಿದ್ದೆವು” ಎಂದಿದ್ದಾರೆ.
ಮುಂದುವರಿದು, “ಭಾರತ-ಯುಕೆ ಸಮಗ್ರ ಆರ್ಥಿಕ ಮತ್ತು ವ್ಯಾಪಾರ ಒಪ್ಪಂದವನ್ನು (CETA) ಪರಿಣಾಮಕಾರಿಯಾಗಿ ಬಳಸಿಕೊಳ್ಳುವುದು, ವ್ಯಾಪಾರ ಅಡೆತಡೆಗಳನ್ನು ನಿವಾರಿಸುವುದು ಮತ್ತು ವ್ಯವಹಾರಗಳ ನಡುವಿನ ಸಂಬಂಧವನ್ನು ಬಲಪಡಿಸುವುದು ಈ ಒಪ್ಪಂದದ ಮುಖ್ಯ ಉದ್ದೇಶವಾಗಿದೆ. ಎರಡೂ ದೇಶಗಳ ಉದ್ಯಮಗಳಿಗೆ ಹೊಸ ಅವಕಾಶಗಳನ್ನು ಮುಕ್ತಗೊಳಿಸಲು ನಾವು ಬದ್ಧರಾಗಿದ್ದೇವೆ” ಎಂದು ತಿಳಿಸಿದರು.
ಮುಕ್ತ ವ್ಯಾಪಾರ ಒಪ್ಪಂದದ (FTA) ವೇಗ ಮತ್ತು ವಾಣಿಜ್ಯ ಪಾಲುದಾರಿಕೆ:
ಜುಲೈ 2025ರಲ್ಲಿ ಯುಕೆ-ಭಾರತ ಮುಕ್ತ ವ್ಯಾಪಾರ ಒಪ್ಪಂದ (FTA) ಆದಾಗಿನಿಂದ ಇಲ್ಲಿಯವರೆಗೆ ಸುಮಾರು 12 ಶತಕೋಟಿ ಪೌಂಡ್‌ಗಳ ಮೌಲ್ಯದ ಒಪ್ಪಂದಗಳು ಘೋಷಣೆಯಾಗಿವೆ. ಇದರ ಮುಂದುವರಿದ ಭಾಗವಾಗಿ ಇತ್ತೀಚಿನ ಒಪ್ಪಂದಗಳು ಏರ್ಪಟ್ಟಿವೆ. ಪ್ರಮುಖ ಬೆಳವಣಿಗೆಯೊಂದರಲ್ಲಿ, ‘ಮೆಟಾ ಫಾರ್ ಡೇಟಾ ಟೆಕ್ನಾಲಜೀಸ್’ (MFD) ಯುಕೆ ಯಲ್ಲಿ AI ಸಂಶೋಧನೆಗೆ ಧನಸಹಾಯ ಮಾಡಲು £50 ಮಿಲಿಯನ್ ಹೂಡಿಕೆ ಮಾಡುವುದಾಗಿ ಘೋಷಿಸಿದೆ. ಹಾಗೆಯೇ, ಯುಕೆ ಮೂಲದ ವಿಮಾನಯಾನ ಸೇವಾ ಕಂಪನಿಯಾದ ‘ಮೆನ್ಜೀಸ್ ಏವಿಯೇಷನ್’ (Menzies Aviation) ಭಾರತದಲ್ಲಿ ತನ್ನ ವ್ಯಾಪ್ತಿಯನ್ನು ವಿಸ್ತರಿಸುವ ಮೂಲಕ £600 ಮಿಲಿಯನ್‌ಗಿಂತಲೂ ಹೆಚ್ಚು ಆದಾಯ ಗಳಿಸುವ ಗುರಿ ಹೊಂದಿದೆ.
ಈ ವ್ಯಾಪಾರ ನಿಯೋಗವು ಸುಧಾರಿತ ಉತ್ಪಾದನೆ, ತಂತ್ರಜ್ಞಾನ, ವಿಮಾನಯಾನ, ಶಿಕ್ಷಣ, ಕೃಷಿ ಹಾಗೂ ಆಹಾರ ಮತ್ತು ಪಾನೀಯ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ವಾಣಿಜ್ಯ ಪಾಲುದಾರಿಕೆಯನ್ನು ಬಲಪಡಿಸುವ ಗುರಿಯನ್ನು ಹೊಂದಿದೆ.
ಉದ್ಯೋಗ ಸೃಷ್ಟಿ ಮತ್ತು ಆರ್ಥಿಕ ಬೆಳವಣಿಗೆ:
ವ್ಯಾಪಾರ ಒಪ್ಪಂದವು ಪ್ರಾದೇಶಿಕ ವ್ಯವಹಾರಗಳಿಗೆ ಉತ್ತಮ ಅವಕಾಶಗಳನ್ನು ಸೃಷ್ಟಿಸಿದೆ ಎಂದು ಯುಕೆ ವ್ಯಾಪಾರ ಕಾರ್ಯದರ್ಶಿ ಜೊನಾಥನ್ ರೆನಾಲ್ಡ್ಸ್ ತಿಳಿಸಿದ್ದಾರೆ.
“ಸುಧಾರಿತ ಉತ್ಪಾದನೆಯಿಂದ ಹಿಡಿದು ಶಿಕ್ಷಣದವರೆಗೆ, ಎರಡೂ ದೇಶಗಳ ಪ್ರತಿಯೊಬ್ಬ ನಾಗರಿಕರಿಗೂ ಮತ್ತು ಉದ್ಯಮಗಳಿಗೆ ಅನುಕೂಲವಾಗುವಂತೆ ವಿಶ್ವದ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಗಳಲ್ಲಿ ಒಂದಾದ ಭಾರತದೊಂದಿಗೆ ಸಂಬಂಧವನ್ನು ಇನ್ನಷ್ಟು ಆಳವಾಗಿಸಲು ನಾವು ಬಯಸುತ್ತೇವೆ” ಎಂದು ರೆನಾಲ್ಡ್ಸ್ ಹೇಳಿದರು.
ಈ ನಿಯೋಗದಲ್ಲಿ ಕೃಷಿ ಮತ್ತು ತೋಟಗಾರಿಕೆ ಅಭಿವೃದ್ಧಿ ಮಂಡಳಿ (AHDB), ಬ್ರಿಟಿಷ್ ಮಾಂಸ ಸಂಸ್ಕಾರಕರ ಸಂಘ, ನ್ಯಾಷನಲ್ ಫಾರ್ಮರ್ಸ್ ಯೂನಿಯನ್ ಮತ್ತು ಸ್ಕಾಟಿಷ್ ವಿಸ್ಕಿ ಅಸೋಸಿಯೇಷನ್ ಸೇರಿದಂತೆ ಸ್ಕಾಟಿಷ್ ಮತ್ತು ಬ್ರಿಟಿಷ್ ಆಹಾರ-ಪಾನೀಯ ಉದ್ಯಮಗಳ ಪ್ರತಿನಿಧಿಗಳು ಸಹ ಭಾಗಿಯಾಗಿದ್ದಾರೆ.
ಈ ವ್ಯಾಪಾರ ಒಪ್ಪಂದವು ದೀರ್ಘಾವಧಿಯಲ್ಲಿ ದ್ವಿಪಕ್ಷೀಯ ವ್ಯಾಪಾರವನ್ನು ವಾರ್ಷಿಕವಾಗಿ 25.5 ಶತಕೋಟಿ ಪೌಂಡ್‌ಗಳಷ್ಟು ಹೆಚ್ಚಿಸುವ ನಿರೀಕ್ಷೆಯಿದೆ. ಈ ಮೂಲಕ ಯುಕೆ ಮತ್ತು ಭಾರತ ಎರಡೂ ದೇಶಗಳಲ್ಲಿ ಹೊಸ ವ್ಯಾಪಾರ ಅವಕಾಶಗಳು, ರಫ್ತು ಬೆಳವಣಿಗೆ ಮತ್ತು ಉದ್ಯೋಗ ಸೃಷ್ಟಿಗೆ ಒತ್ತು ನೀಡಲಾಗುತ್ತಿದೆ.
ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122
