‘ಏಕಾತ್ಮ ಮಾನವವಾದ’ವೇ ಇಡೀ ಮಾನವ ಕುಲಕ್ಕೆ ದಾರಿದೀಪ: ದತ್ತಾತ್ರೇಯ ಹೊಸಬಾಳೆ

ದೀನದಯಾಳ್ ಉಪಾಧ್ಯಾಯ ಜನ್ಮದಿನ

ಜೈಪುರ: ಪಂಡಿತ ದೀನದಯಾಳ್ ಉಪಾಧ್ಯಾಯರು ಭಾರತಕ್ಕೆ ಅದರ ನಾಗರಿಕತೆಯ ಮೂಲಬೇರುಗಳಿಂದ ಕೂಡಿರುವ ಜೀವನ ದರ್ಶನವನ್ನು ನೀಡಿದ್ದಾರೆ. ಇದು ಕೇವಲ ಭಾರತಕ್ಕೆ ಮಾತ್ರವಲ್ಲದೆ ಇಡೀ ವಿಶ್ವಕ್ಕೆ ಮಾರ್ಗದರ್ಶನದ ಮೂಲ ಹಾಗೂ ಮಾದರಿಯಾಗಿದೆ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್‌ಎಸ್‌ಎಸ್) ಸರಕಾರ್ಯವಾಹ ದತ್ತಾತ್ರೇಯ ಹೊಸಬಾಳೆ ಹೇಳಿದರು.

ಪಂಡಿತ ದೀನದಯಾಳ್ ಉಪಾಧ್ಯಾಯರ 110ನೇ ಜನ್ಮದಿನಾಚರಣೆಯ ಸಂದರ್ಭದಲ್ಲಿ ಧಾಂಕ್ಯದಲ್ಲಿ ‘ಪಂಡಿತ ದೀನದಯಾಳ್ ಉಪಾಧ್ಯಾಯ ಸ್ಮೃತಿ ಸಮಾರೋಹ ಸಮಿತಿ’ಯಿಂದ ಆಯೋಜಿಸಲಾಗಿದ್ದ ‘ಏಕಾತ್ಮ ಮಾನವ ದರ್ಶನ’ ಕುರಿತ ಸ್ಮರಣೋಪನ್ಯಾಸ ಕಾರ್ಯಕ್ರಮದಲ್ಲಿ ಅವರು ಮಾತನಾಡುತ್ತಿದ್ದರು.

ಏಕಾತ್ಮ ಮಾನವವಾದವು ಕೇವಲ ಭಾರತೀಯ ಜನಸಂಘ ಅಥವಾ ಭಾರತೀಯ ಜನತಾ ಪಾರ್ಟಿಯ ಕಾರ್ಯಕರ್ತರಿಗೆ ಅಥವಾ ಕೇವಲ ಭಾರತದ ಜನರಿಗೆ ಮಾತ್ರ ಸೀಮಿತವಾದುದಲ್ಲ, ಬದಲಿಗೆ ಅದು ಇಡೀ ಮಾನವ ಕುಲಕ್ಕಾಗಿ ಇದೆ ಎಂದು ಹೊಸಬಾಳೆ ತಿಳಿಸಿದರು.

ಧಾಂಕ್ಯದ ಪವಿತ್ರ ಭೂಮಿಗೆ ಭೇಟಿ ನೀಡಿ ಪಂಡಿತ ದೀನದಯಾಳ್ ಉಪಾಧ್ಯಾಯರ ಸ್ಮಾರಕದಿಂದ ಸ್ಫೂರ್ತಿ ಪಡೆಯುವ ಅವಕಾಶ ತಮಗೆ ಲಭಿಸಿದೆ ಎಂದ ಅವರು, ಈ ಸ್ಮಾರಕವು ಇಲ್ಲಿಗೆ ಬರುವ ಪ್ರತಿಯೊಬ್ಬರಲ್ಲೂ ರಾಷ್ಟ್ರ ಮತ್ತು ಸಮಾಜಕ್ಕಾಗಿ ಕೆಲಸ ಮಾಡುವಂತೆ ಸ್ಫೂರ್ತಿ ತುಂಬುತ್ತದೆ ಎಂದರು.

ದೀನದಯಾಳ್ ಉಪಾಧ್ಯಾಯರನ್ನು ಅಸಾಧಾರಣ ಹಾಗೂ ಸ್ಫೂರ್ತಿದಾಯಕ ವ್ಯಕ್ತಿತ್ವ ಎಂದು ಬಣ್ಣಿಸಿದ ಹೊಸಬಾಳೆ, ಅವರ ಸ್ಮರಣಾರ್ಥವಾಗಿ ಸಾಮಾಜಿಕ, ಸಾಂಸ್ಕೃತಿಕ ಹಾಗೂ ರಾಷ್ಟ್ರೀಯ ಮಹತ್ವದ ಕಾರ್ಯಕ್ರಮಗಳನ್ನು ಹಲವು ವರ್ಷಗಳಿಂದ ಆಯೋಜಿಸುತ್ತ ಬಂದಿರುವ ಸ್ಮೃತಿ ಸಮಾರೋಹ ಸಮಿತಿಯ ಪ್ರಯತ್ನಗಳನ್ನು ಶ್ಲಾಘಿಸಿದರು.

ಭಾರತೀಯ ಸಂಸ್ಕೃತಿ ಮತ್ತು ಜೀವನ ವಿಧಾನದ ವಿವಿಧ ಅಂಶಗಳನ್ನು ಮಥಿಸಿ, ಆಧುನಿಕ ಯುಗದಲ್ಲಿ ಬದುಕು ನಡೆಸಲು ‘ಏಕಾತ್ಮ ಮಾನವ ದರ್ಶನ’ದ ಮೂಲಕ ದೀನದಯಾಳುಜಿ ಬುನಾದಿ ಹಾಕಿಕೊಟ್ಟರು ಎಂದು ಹೊಸಬಾಳೆ ಹೇಳಿದರು. ಭಗವಾನ್ ಶ್ರೀಕೃಷ್ಣನು ಭಗವದ್ಗೀತೆಯ ಮೂಲಕ ಉಪನಿಷತ್ತುಗಳ ಸಾರವನ್ನು ಮಾನವ ಕುಲಕ್ಕೆ ನೀಡಿದಂತೆ, ದೀನದಯಾಳುಜಿಯವರು ಏಕಾತ್ಮ ಮಾನವವಾದದ ಮೂಲಕ ಭಾರತೀಯ ಸಂಸ್ಕೃತಿಯ ಸಾರವನ್ನು ಆಧುನಿಕ ಯುಗಕ್ಕೆ ಪ್ರಸ್ತುತಪಡಿಸಿದರು ಎಂದರು.

ಜಗತ್ತು ಕೇವಲ ಬಂಡವಾಳಶಾಹಿ ಮತ್ತು ಸಾಮ್ಯವಾದ (ಕಮ್ಯುನಿಸ್ಟ್‌) ಎಂಬ ಎರಡು ಪರ್ಯಾಯಗಳಿಗೆ ಮಾತ್ರ ಸೀಮಿತಗೊಳ್ಳಲು ಸಾಧ್ಯವಿಲ್ಲ. ಒಂದು ವ್ಯವಸ್ಥೆಯಲ್ಲಿ ಸ್ವಾತಂತ್ರ್ಯಕ್ಕೆ ಅತಿಯಾದ ಒತ್ತು ನೀಡುವುದರಿಂದ ಅಸಮಾನತೆ ಮತ್ತು ಶೋಷಣೆಗೆ ದಾರಿಯಾದರೆ, ಮತ್ತೊಂದು ವ್ಯವಸ್ಥೆಯಲ್ಲಿ ಸಮಾನತೆಗೆ ಅತಿಯಾದ ಒತ್ತು ನೀಡುವುದರಿಂದ ಸ್ವಾತಂತ್ರ್ಯದ ಮೊಟಕುಗೊಳ್ಳುವಿಕೆಗೆ ಕಾರಣವಾಯಿತು. ಈ ಎರಡೂ ವ್ಯವಸ್ಥೆಗಳು ಮನುಷ್ಯರ ನಡುವಿನ ಪರಸ್ಪರ ಸಂಬಂಧಗಳು ಮತ್ತು ಭ್ರಾತೃತ್ವದ ಭಾವನೆಯನ್ನು ಕಡೆಗಣಿಸಿವೆ ಎಂದು ಅವರು ಅಭಿಪ್ರಾಯಪಟ್ಟರು. ಮತ್ತೊಂದೆಡೆ, ಭಾರತೀಯ ಚಿಂತನೆಯು ವ್ಯಕ್ತಿ, ಸಮಾಜ, ಸೃಷ್ಟಿ ಮತ್ತು ಪರಮಾತ್ಮನ ನಡುವಿನ ಸಂಬಂಧದ ಮೂಲಕ ಸಾಮಾಜಿಕ ಜೀವನವನ್ನು ವೀಕ್ಷಿಸುತ್ತದೆ.

ದೀನದಯಾಳ್ ಉಪಾಧ್ಯಾಯರ ದೃಷ್ಟಿಕೋನವನ್ನು ಉಲ್ಲೇಖಿಸಿದ ಹೊಸಬಾಳೆ, ಭಾರತವು ಅಮೆರಿಕ, ಇಂಗ್ಲೆಂಡ್ ಅಥವಾ ಜಪಾನ್ ಆಗಬೇಕಿಲ್ಲ; ಭಾರತವು ಭಾರತವಾಗಬೇಕು ಎಂದರು. ಭಾರತದ ಸ್ವಂತ ವ್ಯಕ್ತಿತ್ವ, ಸಂಸ್ಕೃತಿ ಮತ್ತು ಮೌಲ್ಯಗಳ ಆಧಾರದ ಮೇಲೆ ರೂಪುಗೊಂಡ ಜೀವನ ದರ್ಶನವು ಭಾರತಕ್ಕೆ ಮಾತ್ರವಲ್ಲದೆ ಇಡೀ ವಿಶ್ವಕ್ಕೂ ಮಾರ್ಗದರ್ಶನ ಮತ್ತು ಮಾದರಿಯಾಗಬಲ್ಲದು.

ಈ ವಿಚಾರಗಳು ಕೇವಲ ಪುಸ್ತಕಗಳು ಮತ್ತು ಸಂಶೋಧನೆಗಳಿಗೆ ಮಾತ್ರ ಸೀಮಿತವಾಗಿರಬಾರದು ಎಂದು ಅವರು ಒತ್ತಿಹೇಳಿದರು. ವಿದ್ವಾಂಸರು ಅವುಗಳನ್ನು ಅಧ್ಯಯನ ಮಾಡಿ ಪುಸ್ತಕಗಳನ್ನು ಬರೆಯಬೇಕು, ಆದರೆ ಸಮಾಜಜೀವನದಲ್ಲಿ ಅವುಗಳ ಅನುಷ್ಠಾನವೂ ಅಷ್ಟೇ ಅವಶ್ಯಕವಾಗಿದೆ. ಈ ವಿಚಾರಗಳ ಯಶಸ್ಸು ಸಮಾಜದಲ್ಲಿ ಗೋಚರಿಸಬೇಕು, ಆಗ ಮಾತ್ರ ಜಗತ್ತಿಗೆ ಅವುಗಳ ಪ್ರಾಯೋಗಿಕ ಪ್ರಸ್ತುತತೆಯ ಬಗ್ಗೆ ನಂಬಿಕೆ ಮೂಡಲು ಸಾಧ್ಯ ಎಂದರು.

ಗ್ರಾಮೀಣಾಭಿವೃದ್ಧಿಯ ಕುರಿತು ಮಾತನಾಡಿದ ಆರ್‌ಎಸ್‌ಎಸ್ ಸರಕಾರ್ಯವಾಹರು, ಗ್ರಾಮಗಳಲ್ಲಿ ಶಿಕ್ಷಣ, ಜೀವನಾಧಾರ ಮತ್ತು ಆರೋಗ್ಯ ಸೌಲಭ್ಯಗಳು ಲಭ್ಯವಿದ್ದರೆ ಜನರು ನಗರಗಳಿಗೆ ವಲಸೆ ಹೋಗಲು ಒತ್ತಾಯಿಸಲ್ಪಡುತ್ತಿರಲಿಲ್ಲ ಮತ್ತು ಗ್ರಾಮಗಳು ತಮ್ಮ ಮೂಲಸ್ವರೂಪವನ್ನು ಉಳಿಸಿಕೊಳ್ಳುತ್ತಿದ್ದವು ಎಂದರು. ಕೃಷಿ, ಕುಟೀರ ಉದ್ಯಮಗಳು, ಕರಕುಶಲ ಮತ್ತು ಸ್ಥಳೀಯ ಉದ್ಯೋಗಗಳನ್ನು ಉತ್ತೇಜಿಸುವ ಪ್ರಯೋಗಗಳು ಅವಶ್ಯಕವಾಗಿವೆ. ನಾನಾಜಿ ದೇಶಮುಖ್ ಅವರು ಚಿತ್ರಕೂಟ ಹಾಗೂ ಗೊಂಡಾದಲ್ಲಿ ಕೈಗೊಂಡ ಗ್ರಾಮೀಣಾಭಿವೃದ್ಧಿ ಉಪಕ್ರಮಗಳನ್ನು ಉಲ್ಲೇಖಿಸಿದ ಅವರು, ಏಕಾತ್ಮ ಮಾನವವಾದದ ತತ್ವಗಳನ್ನು ಸಮಾಜ ಜೀವನದಲ್ಲಿ ಅಳವಡಿಸಿಕೊಳ್ಳುವ ಅಗತ್ಯವನ್ನು ಒತ್ತಿಹೇಳಿದರು.

ಸರ್ಕಾರಿ ಯೋಜನೆಗಳು ಮತ್ತು ನೀತಿಗಳು ಅವಶ್ಯಕವಾಗಿವೆ, ಆದರೆ ಕೇವಲ ಸರ್ಕಾರದ ಯಂತ್ರೋಪಕರಣಗಳ ಮೂಲಕ ಮಾತ್ರ ಇಂತಹ ಕೆಲಸಗಳನ್ನು ಸಾಧಿಸಲು ಸಾಧ್ಯವಿಲ್ಲ. ಸಮಾಜವು ಜಾಗೃತಗೊಂಡು ಸಾಮೂಹಿಕ ಪ್ರಯತ್ನಗಳಲ್ಲಿ ಪಾಲ್ಗೊಳ್ಳಬೇಕು. ಗ್ರಾಮೀಣ ಪ್ರದೇಶಗಳಲ್ಲಿ ವಾಸಿಸುವ ಜನರ ಅನುಭವಗಳು ಮತ್ತು ಬುದ್ಧಿವಂತಿಕೆಯೂ ಕೂಡ ಅಭಿವೃದ್ಧಿ ಉಪಕ್ರಮಗಳ ಆಧಾರವಾಗಬೇಕು ಎಂದರು.

ದೀನದಯಾಳುಜಿ ತಂತ್ರಜ್ಞಾನಕ್ಕೆ ವಿರೋಧಿಯಾಗಿರಲಿಲ್ಲ, ಆದರೆ ತಂತ್ರಜ್ಞಾನವು ಮಾನವನ ಸಂತೋಷಕ್ಕೆ ಕೊಡುಗೆ ನೀಡಬೇಕು, ಪರಿಸರ ಸ್ನೇಹಿಯಾಗಿರಬೇಕು, ಜನರನ್ನು ಆರ್ಥಿಕವಾಗಿ ದುರ್ಬಲಗೊಳಿಸಬಾರದು, ಉದ್ಯೋಗಗಳನ್ನು ನಿರ್ಮೂಲನೆ ಮಾಡಬಾರದು ಅಥವಾ ಸಾಮಾಜಿಕ ಮೌಲ್ಯಗಳನ್ನು ಸವೆಸಬಾರದು ಎಂದು ಅವರು ಒತ್ತಾಯಿಸಿದ್ದರು ಎಂದು ಹೊಸಬಾಳೆ ಹೇಳಿದರು. ತಂತ್ರಜ್ಞಾನವು ಮಾನವರನ್ನು ತನ್ನ ಗುಲಾಮರನ್ನಾಗಿ ಮಾಡಿಕೊಳ್ಳದೆ, ಮಾನವ ಕಲ್ಯಾಣಕ್ಕಾಗಿ ಕೆಲಸ ಮಾಡಬೇಕು ಎಂದರು.

ಬದಲಾಗುತ್ತಿರುವ ಕಾಲಕ್ಕೆ ತಕ್ಕಂತೆ ‘ಸ್ವದೇಶಿ’ಯನ್ನು ಪ್ರಸ್ತುತಪಡಿಸಲು ದೀನದಯಾಳ್ ಉಪಾಧ್ಯಾಯರು ವಕಾಲತ್ತು ವಹಿಸಿದ್ದರು ಎಂದು ಅವರು ಹೇಳಿದರು. ವಿದೇಶಗಳಿಂದ ಜ್ಞಾನವನ್ನು ಸ್ವೀಕರಿಸಲು ಯಾವುದೇ ಹಿಂಜರಿಕೆ ಇರಬಾರದು, ಆದರೆ ಅದನ್ನು ಭಾರತೀಯ ಪರಿಸ್ಥಿತಿಗಳಿಗೆ ತಕ್ಕಂತೆ ಅಳವಡಿಸಿಕೊಳ್ಳಬೇಕು. ಕೃತಕ ಬುದ್ಧಿಮತ್ತೆ (Artificial Intelligence) ಸೇರಿದಂತೆ ವಿವಿಧ ರೂಪದ ತಂತ್ರಜ್ಞಾನಗಳ ಬಗ್ಗೆ ವ್ಯಾಪಕ ಚರ್ಚೆ ನಡೆಯುತ್ತಿರುವ ಇಂದಿನ ದಿನಗಳಲ್ಲಿ, ತಂತ್ರಜ್ಞಾನವನ್ನು ಮಾನವ ಕುಲಕ್ಕೆ ನಿಜಕ್ಕೂ ಹೇಗೆ ಉಪಯುಕ್ತವಾಗುವಂತೆ ಮಾಡಬಹುದು ಎಂಬುದನ್ನು ಪರಿಗಣಿಸುವುದು ಮುಖ್ಯವಾಗಿದೆ ಎಂದರು.

ದೀನದಯಾಳ್ ಉಪಾಧ್ಯಾಯರು ಒಬ್ಬ ಸ್ವಯಂಸೇವಕ, ಪ್ರಚಾರಕ, ರಾಜಕಾರಣಿ, ವಿದ್ವಾಂಸ, ಅರ್ಥಶಾಸ್ತ್ರಜ್ಞ, ಸಾಹಿತಿ ಮತ್ತು ಲೇಖಕರಾಗಿದ್ದರು. ಅವರು ಸಾಮಾಜಿಕ ಸೌಹಾರ್ದತೆ, ಪರಿಸರ, ಕುಟುಂಬ, ಸ್ವದೇಶಿ ಮತ್ತು ನಾಗರಿಕ ಕರ್ತವ್ಯಗಳ ಬಗ್ಗೆ ಮಾತನಾಡುವುದರೊಂದಿಗೆ ಆ ಮೌಲ್ಯಗಳನ್ನು ತಮ್ಮ ಸ್ವಂತ ಜೀವನದಲ್ಲೂ ಅಳವಡಿಸಿಕೊಂಡಿದ್ದರು ಎಂದು ಸರಕಾರ್ಯವಾಹರು ತಿಳಿಸಿದರು. ಅವರ ನಾಗರಿಕ ಜವಾಬ್ದಾರಿಗೆ ಸಂಬಂಧಿಸಿದ ಘಟನೆಯೊಂದನ್ನು ಸ್ಮರಿಸಿದ ಹೊಸಬಾಳೆ, ತಮ್ಮ ಪ್ರಯಾಣವೊಂದರ ವೇಳೆ ರೇಡಿಯೋದ ಪರವಾನಗಿ (ಲೈಸೆನ್ಸ್) ಅವಧಿ ಮುಗಿದ ನಂತರ ದೀನದಯಾಳುಜಿ ಅದನ್ನು ಬಳಸುವುದು ನಿಲ್ಲಿಸಿದ್ದರು ಎಂಬ ಉದಾಹರಣೆಯನ್ನು ನೀಡಿದರು.

ದೀನದಯಾಳುಜಿಯವರನ್ನು ಸ್ಮರಿಸುವುದು ಕೇವಲ ಅವರ ಜನ್ಮದಿನದಂದು ಶ್ರದ್ಧಾಂಜಲಿ ಅರ್ಪಿಸುವುದಕ್ಕೆ ಮಾತ್ರ ಸೀಮಿತವಾಗಬಾರದು. ಅವರ ವಿಚಾರಗಳ ಬಗ್ಗೆ ಚರ್ಚೆ ಮತ್ತು ಚಿಂತನೆ ನಡೆಯಬೇಕು, ಜೊತೆಗೆ ಅವರ ಜೀವನದಿಂದ ಪಾಠಗಳನ್ನು ಕಲಿತು ಅವುಗಳನ್ನು ಪ್ರತಿಯೊಬ್ಬರ ಜೀವನದಲ್ಲಿ ಅಳವಡಿಸಿಕೊಳ್ಳಲು ಪ್ರಯತ್ನಿಸಬೇಕು ಎಂದರು.

“ದೀನದಯಾಳ್ ಉಪಾಧ್ಯಾಯರು ತಮ್ಮ ಜೀವನದ ಪ್ರತಿಯೊಂದು ಕ್ಷಣವನ್ನೂ ಭಾರತದ ಪರಮ ವೈಭವಕ್ಕಾಗಿ ಸಮರ್ಪಿಸಿದರು. ನಾವೂ ಕೂಡ ಅವರ ಜೀವನದಿಂದ ಸ್ಫೂರ್ತಿ ಪಡೆದು ಈ ಗುರಿಯತ್ತ ನಮ್ಮನ್ನು ನಾವೇ ಸಮರ್ಪಿಸಿಕೊಳ್ಳುವ ಸಂಕಲ್ಪ ಮಾಡಬೇಕು” ಎಂದು ಹೊಸಬಾಳೆ ನುಡಿದರು.

ಉದ್ಯಮಿ ಮನೀಶ್ ಗುಪ್ತಾ ಅಧ್ಯಕ್ಷತೆ ವಹಿಸಿದ್ದ ಈ ಕಾರ್ಯಕ್ರಮದಲ್ಲಿ ಜೆಇಸಿಆರ್ಸಿ ವಿಶ್ವವಿದ್ಯಾನಿಲಯದ ಅಧ್ಯಕ್ಷ ಒ.ಪಿ. ಅಗರ್ವಾಲ್ ವಿಶೇಷ ಅತಿಥಿಯಾಗಿ ಭಾಗವಹಿಸಿದ್ದರು. ಸ್ಮೃತಿ ಸಮಾರೋಹ ಸಮಿತಿಯ ಅಧ್ಯಕ್ಷ ಪ್ರೊಫೆಸರ್ ಮೋಹನ್‌ಲಾಲ್ ಛಿಪಾ ಸಮಿತಿಯ ಚಟುವಟಿಕೆಗಳು ಮತ್ತು ಉದ್ದೇಶಗಳ ಬಗ್ಗೆ ಸಭೆಗೆ ಮಾಹಿತಿ ನೀಡಿದರು ಹಾಗೂ ಕಾರ್ಯದರ್ಶಿ ಪ್ರತಾಪ್ ಭಾನು ಶೇಖಾವತ್ ತಮ್ಮ ಭವಿಷ್ಯದ ಯೋಜನೆಗಳನ್ನು ವಿವರಿಸಿದರು.

ಪಂಡಿತ ದೀನದಯಾಳ್ ಉಪಾಧ್ಯಾಯರ ವಿಚಾರಗಳು ಮತ್ತು ಕೊಡುಗೆಗಳ ಕುರಿತು ಸಂಶೋಧನೆ ನಡೆಸಿದ ಹಲವಾರು ಸಂಶೋಧಕರು ಮತ್ತು ವಿದ್ವಾಂಸರನ್ನು ಈ ವೇಳೆ ಸನ್ಮಾನಿಸಲಾಯಿತು. ಇವರಲ್ಲಿ ರಾಂಚಿ ವಿಶ್ವವಿದ್ಯಾನಿಲಯದ ಸಂಶೋಧಕ ಡಾ. ಸೊಹನ್ ಸಿಂಗ್, ಹಿಮಾಚಲ ಪ್ರದೇಶ ಕೇಂದ್ರ ವಿಶ್ವವಿದ್ಯಾನಿಲಯದ ಡಾ. ಜಗ್ಬೀರ್ ಚಂದೇಲ್, ಮಥುರಾದ ಡಾ. ಅಂಶುಮಾನ್ ಕೌಶಿಕ್ ಮತ್ತು ಬನಾರಸ್ ಹಿಂದೂ ವಿಶ್ವವಿದ್ಯಾನಿಲಯದ ಡಾ. ನಾಗೇಶ್ ಚೌಬೆ ಸೇರಿದ್ದಾರೆ.

ಜಾನಪದ ಕಲೆ ಮತ್ತು ಸಂಗೀತ ಕ್ಷೇತ್ರಕ್ಕೆ ನೀಡಿದ ಕೊಡುಗೆಗಾಗಿ ಪದ್ಮಶ್ರೀ ಪ್ರಶಸ್ತಿ ವಿಜೇತರಾದ ತಾಗರಾಮ್ ಭಿಲ್ ಹಾಗೂ ಭಪಂಗ್ ಕಲಾವಿದ ಗಫುರುದ್ದೀನ್ ಮೇವಾತಿ ಅವರನ್ನೂ ಸನ್ಮಾನಿಸಲಾಯಿತು.

ಸಮಿತಿಯ ಉಪಾಧ್ಯಕ್ಷ ನೀರಜ್ ಕುಮಾವತ್ ವಂದನಾರ್ಪಣೆಗೈದರೆ, ಗಜೇಂದ್ರ ಜ್ಞಾನಪುರಿಯಾ ಕಾರ್ಯಕ್ರಮವನ್ನು ನಿರೂಪಿಸಿದರು.

ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122