ಹೊ.ವೆ. ಶೇಷಾದ್ರಿಯವರ ಆದರ್ಶಗಳು ಇಂದಿಗೂ ಕೋಟ್ಯಂತರ ಸ್ವಯಂಸೇವಕರಿಗೆ ಸ್ಫೂರ್ತಿ: ಪ್ರಧಾನಿ ಮೋದಿ

ತಾಯಿಯ ನಿಸ್ವಾರ್ಥ ಪ್ರೀತಿಯಂತೆ ಸಮಾಜದ ಸೇವೆಯಲ್ಲಿ ತೊಡಗಿಸಿಕೊಂಡಿದ್ದ ಶೇಷಾದ್ರಿ: ಮೋದಿ

ಬೆಂಗಳೂರು, ನ. 13: ವ್ಯಕ್ತಿಗಳನ್ನು ರೂಪಿಸುವ ಮೂಲಕ ರಾಷ್ಟ್ರದ ಭವಿಷ್ಯವನ್ನು ಕಟ್ಟುವ ಉದ್ದೇಶದಿಂದ ತಮ್ಮ ಇಡೀ ಬದುಕನ್ನು ಸಮರ್ಪಿಸಿಕೊಂಡಿದ್ದ ಹೊ.ವೆ. ಶೇಷಾದ್ರಿಯವರ ಜೀವನ ಮತ್ತು ಆದರ್ಶಗಳು ಇಂದಿಗೂ ಕೋಟ್ಯಂತರ ಸ್ವಯಂಸೇವಕರಿಗೆ ಪ್ರೇರಣೆ ನೀಡುತ್ತಿವೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದರು.

ಬೆಂಗಳೂರಿನ ಎಸ್‌-ವ್ಯಾಸ ಸಂಸ್ಥೆಯ ಪ್ರಶಾಂತಿ ಕುಟೀರಂನಲ್ಲಿ ನಡೆದ ಸುವರ್ಣ ಮಹೋತ್ಸವ ಹಾಗೂ ಹೊ.ವೆ. ಶೇಷಾದ್ರಿಯವರ ಜನ್ಮಶತಾಬ್ದಿ ವರ್ಷದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಶೇಷಾದ್ರಿಯವರ ರಾಷ್ಟ್ರಸೇವೆ, ಸರಳ ಜೀವನ, ವಿನಯ, ಸಂಘಟನಾ ಕೌಶಲ ಮತ್ತು ಸಮಾಜದ ಬಗ್ಗೆ ಅವರಿಗಿದ್ದ ನಿಸ್ವಾರ್ಥ ಕಾಳಜಿಯನ್ನು ಸ್ಮರಿಸಿದರು.

ದೇಶವನ್ನು ಅಭಿವೃದ್ಧಿಯ ಉನ್ನತ ಹಂತಕ್ಕೆ ಕೊಂಡೊಯ್ಯಲು ಸಮರ್ಪಣಾ ಮನೋಭಾವ, ಸಾಮರ್ಥ್ಯ ಮತ್ತು ಶಿಸ್ತು ಹೊಂದಿರುವ ನಾಗರಿಕರ ಅಗತ್ಯವಿದೆ ಎಂಬುದನ್ನು ಶೇಷಾದ್ರಿಯವರು ಚೆನ್ನಾಗಿ ಅರಿತಿದ್ದರು. ಅಂತಹ ವ್ಯಕ್ತಿಗಳನ್ನು ರೂಪಿಸುವುದನ್ನೇ ತಮ್ಮ ಜೀವನದ ಗುರಿಯಾಗಿಸಿಕೊಂಡಿದ್ದರು. ರಾಷ್ಟ್ರೀಯ ಸ್ವಯಂಸೇವಕ ಸಂಘದಲ್ಲಿ ಅವರು ಪಾಲಿಸಿದ ಮೌಲ್ಯಗಳು ಮತ್ತು ಆದರ್ಶಗಳು ಇಂದಿಗೂ ಲಕ್ಷಾಂತರ ಕಾರ್ಯಕರ್ತರಿಗೆ ಮಾರ್ಗದರ್ಶನ ನೀಡುತ್ತಿವೆ ಎಂದು ಪ್ರಧಾನಿ ತಿಳಿಸಿದರು.

ಶೇಷಾದ್ರಿಯವರ ವ್ಯಕ್ತಿತ್ವದ ಪ್ರಮುಖ ಗುಣವೆಂದರೆ ಅವರ ಸರಳತೆ. ಅಪಾರ ಅನುಭವ ಮತ್ತು ಜ್ಞಾನ ಹೊಂದಿದ್ದರೂ ಅವರು ಎಂದಿಗೂ ಅಹಂಕಾರ ತೋರಲಿಲ್ಲ. ಇತರರನ್ನು ಮುನ್ನೆಲೆಗೆ ತಂದು, ಜನರನ್ನು ಒಗ್ಗೂಡಿಸಿ, ಅವರನ್ನು ರಾಷ್ಟ್ರಸೇವೆಗೆ ಸಿದ್ಧಗೊಳಿಸುವುದರಲ್ಲಿ ಅವರು ವಿಶೇಷ ಆಸಕ್ತಿ ಹೊಂದಿದ್ದರು. ಇದೇ ಅವರ ಬದುಕಿನ ದೊಡ್ಡ ಸಾಧನೆಯಾಗಿತ್ತು ಎಂದು ಮೋದಿ ಹೇಳಿದರು.

ತಾಯಿಯ ನಿಸ್ವಾರ್ಥ ಪ್ರೀತಿಯೇ ಸಮಾಜಸೇವೆಗೆ ಪ್ರೇರಣೆ

ಶೇಷಾದ್ರಿಯವರು ಸಮಾಜಸೇವೆಯನ್ನು ವಿವರಿಸುವಾಗ ತಾಯಿಯ ನಿಸ್ವಾರ್ಥ ಸೇವೆಯನ್ನು ಉದಾಹರಣೆಯಾಗಿ ನೀಡುತ್ತಿದ್ದರು. ತಾಯಿ ತನ್ನ ಮಗುವಿನ ಆರೈಕೆಗಾಗಿ ರಾತ್ರಿ ನಿದ್ದೆಯನ್ನೂ ಬಿಟ್ಟು ಶ್ರಮಿಸುತ್ತಾಳೆ. ಮಗುವಿನ ಒಳಿತಿಗಾಗಿ ಯಾವುದೇ ಪ್ರತಿಫಲವನ್ನು ನಿರೀಕ್ಷಿಸದೆ ದುಡಿಯುತ್ತಾಳೆ. ಇದೇ ಮನೋಭಾವವನ್ನು ಸಮಾಜದ ಸೇವೆಯಲ್ಲಿಯೂ ಅಳವಡಿಸಿಕೊಂಡರೆ ಸಮಾಜಕ್ಕೆ ಅಪಾರ ಪ್ರಯೋಜನವಾಗುತ್ತದೆ ಎಂದು ಅವರು ಹೇಳುತ್ತಿದ್ದರು ಎಂಬುದನ್ನು ಮೋದಿ ನೆನಪಿಸಿಕೊಂಡರು.

ತಾಯಿಯ ಪ್ರೀತಿ ಮತ್ತು ಕಾಳಜಿಯಂತೆಯೇ ಶೇಷಾದ್ರಿಯವರು ಸಮಾಜದ ಒಳಿತಿಗಾಗಿ ನಿರಂತರವಾಗಿ ದುಡಿದಿದ್ದರು. ಅವರ ಪ್ರೀತಿ, ಮಾರ್ಗದರ್ಶನ ಮತ್ತು ಅವರೊಂದಿಗೆ ಕಳೆದ ಕ್ಷಣಗಳು ತಮ್ಮ ಬದುಕಿನ ಮರೆಯಲಾಗದ ನೆನಪುಗಳಾಗಿವೆ ಎಂದು ಪ್ರಧಾನಿ ಹೇಳಿದರು.

“ನಾವು ಸಮಾಜಕ್ಕೆ ಎರಡೂ ಕೈಗಳಿಂದ ನೀಡಿದರೆ, ಸಮಾಜ ನಮಗೆ ಲಕ್ಷಾಂತರ ಕೈಗಳಿಂದ ಮರಳಿಸುತ್ತದೆ” ಎಂಬ ಶೇಷಾದ್ರಿಯವರ ಮಾತುಗಳನ್ನು ಸ್ಮರಿಸಿದ ಮೋದಿ, ಜನರ ಸೇವೆಯಲ್ಲಿ ತೊಡಗಿಸಿಕೊಂಡಾಗ ದೊರೆಯುವ ಆಶೀರ್ವಾದವೇ ಜೀವನದ ದೊಡ್ಡ ಸಂಪತ್ತು ಎಂದರು. ಶೇಷಾದ್ರಿಯವರ ಸೇವಾ ಪರಂಪರೆಯನ್ನು ಮುಂದುವರಿಸುತ್ತಿರುವ ಡಾ. ನಾಗೇಂದ್ರ ಮತ್ತು ಡಾ. ನಾಗರತ್ನ ಅವರ ಕಾರ್ಯಗಳನ್ನೂ ಅವರು ಪ್ರಶಂಸಿಸಿದರು.

ಕಾರ್ಯಕ್ರಮದಲ್ಲಿ ಮಾತನಾಡಿದ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಕಾರ್ಯವಾಹ ದತ್ತಾತ್ರೇಯ ಹೊಸಬಾಳೆ, ಇಂದಿನ ಸಮಾರಂಭವು ಎರಡು ಮಹತ್ವದ ಸಂದರ್ಭಗಳನ್ನು ಒಟ್ಟುಗೂಡಿಸಿದೆ ಎಂದರು. ಎಸ್‌-ವ್ಯಾಸ ಸಂಸ್ಥೆಯ ಸುವರ್ಣ ಮಹೋತ್ಸವದ ಜೊತೆಗೆ, ತಮ್ಮಂತಹ ಲಕ್ಷಾಂತರ ಸ್ವಯಂಸೇವಕರಲ್ಲಿ ದೇಶಪ್ರೇಮದ ಭಾವನೆ ಮೂಡಿಸಿದ ಹೊ.ವೆ. ಶೇಷಾದ್ರಿಯವರ ಜನ್ಮಶತಾಬ್ದಿಯನ್ನು ಆಚರಿಸಲಾಗುತ್ತಿದೆ. ಈ ಸಂದರ್ಭದಲ್ಲಿ ಶೇಷಾದ್ರಿಯವರ ಸ್ಮೃತಿಗೆ ಗೌರವ ಸಲ್ಲಿಸುವುದಾಗಿ ತಿಳಿಸಿದರು.

ಯೋಗ ಕ್ಷೇತ್ರದಲ್ಲಿ ಭಾರತ ಮಾತ್ರವಲ್ಲದೆ ಜಾಗತಿಕ ಮಟ್ಟದಲ್ಲಿಯೂ ಎಸ್‌-ವ್ಯಾಸ ಸಂಸ್ಥೆ ತನ್ನದೇ ಆದ ಗುರುತನ್ನು ಮೂಡಿಸಿದೆ. ಮುಂದಿನ ದಿನಗಳಲ್ಲಿಯೂ ವಿಶ್ವಮಟ್ಟದಲ್ಲಿ ಮಹತ್ವದ ಪಾತ್ರ ವಹಿಸಲು ಸಂಸ್ಥೆ ಸಿದ್ಧವಾಗುತ್ತಿದೆ. ಸಂಸ್ಥೆಯ ಈ ಸಾಧನೆಗೆ ಸಂಬಂಧಿಸಿದ ಎಲ್ಲರನ್ನೂ ಅಭಿನಂದಿಸುತ್ತೇನೆ ಎಂದು ಹೇಳಿದರು.

ಸಂಘಟನೆ, ಸಾಹಿತ್ಯ ಮತ್ತು ಸೇವೆಯಲ್ಲಿ ಶೇಷಾದ್ರಿಯವರ ಕೊಡುಗೆ

ಶೇಷಾದ್ರಿಯವರು ರಾಷ್ಟ್ರೀಯ ಸ್ವಯಂಸೇವಕ ಸಂಘದಲ್ಲಿ ಸ್ವಯಂಸೇವಕರಾಗಿ, ಪ್ರಚಾರಕರಾಗಿ ಹಲವು ಜವಾಬ್ದಾರಿಗಳನ್ನು ನಿರ್ವಹಿಸಿದ್ದರು. 13 ವರ್ಷಗಳ ಕಾಲ ಸರಕಾರ್ಯವಾಹರಾಗಿ ಸಂಘದ ಕಾರ್ಯವನ್ನು ಸಮರ್ಥವಾಗಿ ಮುನ್ನಡೆಸಿದ್ದರು. ಸಂಘಟನಾ ಕಾರ್ಯದ ಜೊತೆಗೆ ಸಾಹಿತ್ಯ ಕ್ಷೇತ್ರದಲ್ಲಿಯೂ ಅವರು ಗಮನಾರ್ಹ ಕೊಡುಗೆ ನೀಡಿದ್ದಾರೆ. ನಾಲ್ಕು ಸಾವಿರಕ್ಕೂ ಹೆಚ್ಚು ಪುಟಗಳ ಬರವಣಿಗೆಯ ಮೂಲಕ ಭಾರತೀಯ ಸಂಸ್ಕೃತಿ, ಸಮಾಜ ಮತ್ತು ಯುವಜನರ ಜವಾಬ್ದಾರಿಗಳ ಬಗ್ಗೆ ತಮ್ಮ ವಿಚಾರಗಳನ್ನು ಹಂಚಿಕೊಂಡಿದ್ದರು ಎಂದು ಹೊಸಬಾಳೆ ತಿಳಿಸಿದರು.

ಭಾರತೀಯ ಸಂಸ್ಕೃತಿಯಲ್ಲಿರುವ ಮೌಲ್ಯಯುತ ವಿಚಾರಗಳನ್ನು ಜನರಿಗೆ ಪರಿಚಯಿಸುವುದರ ಜೊತೆಗೆ, ಜಗತ್ತಿನ ಸಾಹಿತ್ಯ ಮತ್ತು ಚಿಂತಕರ ಬರಹಗಳನ್ನೂ ಅವರು ಅಧ್ಯಯನ ಮಾಡಿದ್ದರು. ಮಾನವ ಇತಿಹಾಸದ ವಿವಿಧ ಆಯಾಮಗಳನ್ನು ವಿಶ್ಲೇಷಿಸಿದ ಹಾಗೂ ಭವಿಷ್ಯದ ಸಮಾಜಕ್ಕೆ ದಾರಿ ತೋರಿದ ಚಿಂತಕರ ವಿಚಾರಗಳನ್ನು ಅರಿತು, ಅವುಗಳ ಸಾರವನ್ನು ತಮ್ಮ ಬರಹಗಳಲ್ಲಿ ಸರಳವಾಗಿ ಮಂಡಿಸಿದ್ದರು.

ತಮ್ಮ ಚಿಂತನೆ, ಅನುಭವ ಮತ್ತು ವಿಶ್ಲೇಷಣೆಯ ಮೂಲಕ ಶೇಷಾದ್ರಿಯವರು ರಚಿಸಿದ ಸಾಹಿತ್ಯ ಇಂದಿಗೂ ಓದುಗರ ಗಮನ ಸೆಳೆಯುತ್ತಿದೆ. ಸಾಮಾನ್ಯ ವಿಷಯವೊಂದನ್ನು ಆಧಾರವಾಗಿಟ್ಟುಕೊಂಡು ಅದರಿಂದ ವಿಶಾಲವಾದ ವಿಚಾರವನ್ನು ಕಟ್ಟಿಕೊಡುವುದು ಅವರ ಬರವಣಿಗೆಯ ವಿಶೇಷತೆಯಾಗಿತ್ತು. ಆರಂಭದಲ್ಲಿ ಕನ್ನಡದಲ್ಲಿ ಬರೆಯುತ್ತಿದ್ದ ಅವರು, ನಂತರ ಇಂಗ್ಲಿಷ್ ಮತ್ತು ಹಿಂದಿ ಭಾಷೆಗಳಲ್ಲಿಯೂ ಲೇಖನ ಹಾಗೂ ಪುಸ್ತಕಗಳನ್ನು ರಚಿಸಿದರು. ರಾಷ್ಟ್ರ ಮತ್ತು ಸಮಾಜಕ್ಕಾಗಿ ಕೆಲಸ ಮಾಡುವವರಿಗೆ ಮಾತ್ರವಲ್ಲದೆ, ಸಾಮಾನ್ಯ ಓದುಗರಿಗೂ ಅವರ ಕೃತಿಗಳು ಮಾರ್ಗದರ್ಶನ ನೀಡುತ್ತವೆ ಎಂದು ಅವರು ಹೇಳಿದರು.

ಸೇವಾ ಚಟುವಟಿಕೆಗಳಲ್ಲಿಯೂ ಶೇಷಾದ್ರಿಯವರ ಪಾತ್ರ ಮಹತ್ವದ್ದಾಗಿತ್ತು. ಸೇವೆಯ ಬಗ್ಗೆ ಅವರಿಗಿದ್ದ ಕಾಳಜಿಯಿಂದಾಗಿ ಮೊದಲು ಕರ್ನಾಟಕದಲ್ಲಿ, ನಂತರ ದೇಶದಾದ್ಯಂತ ಸಂಘದ ಸೇವಾ ಕಾರ್ಯಗಳಿಗೆ ವೇಗ ದೊರೆಯಿತು. ಯಾದವರಾವ್ ಜೋಶಿಯವರ ಮಾರ್ಗದರ್ಶನದಲ್ಲಿ ಕರ್ನಾಟಕದಲ್ಲಿ ಆರಂಭವಾದ ಸೇವಾ ಚಟುವಟಿಕೆಗಳನ್ನು ದೇಶವ್ಯಾಪಿ ವಿಸ್ತರಿಸುವಲ್ಲಿ ಶೇಷಾದ್ರಿಯವರು ಪ್ರಮುಖ ಪಾತ್ರ ವಹಿಸಿದ್ದರು. ಮುಂದೆ ಅದು ಸಂಘದ ಪ್ರತ್ಯೇಕ ವಿಭಾಗವಾಗಿ ಬೆಳೆಯುವ ಹಂತಕ್ಕೆ ತಲುಪಿತು ಎಂದು ಹೊಸಬಾಳೆ ವಿವರಿಸಿದರು.

ಸಾವಿರಾರು ಕಾರ್ಯಕರ್ತರೊಂದಿಗೆ ನೇರ ಸಂಪರ್ಕ

ಶೇಷಾದ್ರಿಯವರು ವರ್ಷವಿಡೀ ಪ್ರವಾಸ ಮಾಡುತ್ತಿದ್ದರು. ಈ ಸಂದರ್ಭದಲ್ಲಿ ಅನೇಕ ಸಣ್ಣ ಹಳ್ಳಿಗಳಿಗೂ ಭೇಟಿ ನೀಡಿ ಅಲ್ಲಿನ ಕಾರ್ಯಕರ್ತರು ಮತ್ತು ಜನರೊಂದಿಗೆ ಸಂಪರ್ಕ ಹೊಂದಿದ್ದರು. ಸಾವಿರಾರು, ಲಕ್ಷಾಂತರ ಸ್ವಯಂಸೇವಕರನ್ನು ವೈಯಕ್ತಿಕವಾಗಿ ಪರಿಚಯಿಸಿಕೊಂಡಿದ್ದರು. ಕಾರ್ಯಕರ್ತರಿಗೆ ಹತ್ತು ಸಾವಿರಕ್ಕೂ ಹೆಚ್ಚು ಪತ್ರಗಳನ್ನು ಬರೆದಿದ್ದು, ಅವುಗಳ ಮೂಲಕ ಮಾರ್ಗದರ್ಶನ ನೀಡುವುದರ ಜೊತೆಗೆ ವೈಯಕ್ತಿಕ ಸಮಸ್ಯೆಗಳ ಸಂದರ್ಭದಲ್ಲಿಯೂ ಅವರಿಗೆ ಧೈರ್ಯ ತುಂಬುತ್ತಿದ್ದರು ಎಂದು ಹೊಸಬಾಳೆ ಹೇಳಿದರು.

ಯೋಗ ಕ್ಷೇತ್ರದಲ್ಲಿಯೂ ಶೇಷಾದ್ರಿಯವರು ಆಸಕ್ತಿ ಹೊಂದಿದ್ದರು. ತಾವು ಭೇಟಿ ನೀಡುತ್ತಿದ್ದ ಮನೆಗಳಲ್ಲಿ ವಿವಿಧ ವಯೋಮಾನದವರೊಂದಿಗೆ ಸಹಜವಾಗಿ ಮಾತನಾಡುತ್ತಾ ಯೋಗ, ಭಗವದ್ಗೀತೆ ಮತ್ತು ಭಾರತೀಯ ಸಂಸ್ಕೃತಿಯ ವಿಚಾರಗಳನ್ನು ಹಂಚಿಕೊಳ್ಳುತ್ತಿದ್ದರು. ಈ ಮೌಲ್ಯಗಳನ್ನು ದೈನಂದಿನ ಬದುಕಿನಲ್ಲಿ ಅಳವಡಿಸಿಕೊಳ್ಳುವಂತೆ ಪ್ರೇರೇಪಿಸುತ್ತಿದ್ದರು. ಅವರಿಂದ ಪ್ರೇರಣೆ ಪಡೆದ ಅನೇಕರು ಇಂದಿಗೂ ಆ ಮಾರ್ಗವನ್ನು ಅನುಸರಿಸುತ್ತಿದ್ದಾರೆ ಎಂಬುದನ್ನು ತಮ್ಮ ಪ್ರವಾಸದ ವೇಳೆ ಭೇಟಿಯಾಗುವ ಜನರಿಂದ ತಿಳಿದುಕೊಂಡಿದ್ದೇನೆ ಎಂದು ಅವರು ಹೇಳಿದರು.

ಯೋಗ, ಅಧ್ಯಯನ ಮತ್ತು ಸಮಾಜಸೇವೆಯನ್ನು ಪ್ರತ್ಯೇಕ ಚಟುವಟಿಕೆಗಳಾಗಿ ನೋಡದೆ, ಅವುಗಳನ್ನು ತಮ್ಮ ಬದುಕಿನ ಭಾಗವಾಗಿಸಿಕೊಂಡಿದ್ದರು ಶೇಷಾದ್ರಿಯವರು. ಯೋಗವು ಕೇವಲ ದೈಹಿಕ ಮತ್ತು ಮಾನಸಿಕ ಆರೋಗ್ಯಕ್ಕೆ ಸೀಮಿತವಲ್ಲ. ಆಧುನಿಕ ಜಗತ್ತು ಎದುರಿಸುತ್ತಿರುವ ಅನೇಕ ಸಮಸ್ಯೆಗಳಿಗೆ ಪರಿಹಾರದ ದಾರಿ ತೋರಬಲ್ಲ ಶಕ್ತಿಯಾಗಿದೆ ಎಂಬುದು ಅವರ ನಿಲುವಾಗಿತ್ತು.

ಹಲವು ವರ್ಷಗಳ ಹಿಂದೆಯೇ ಅವರು ‘ಸಮಾಜಯೋಗ’ ಅಥವಾ ‘ಯೋಗ್: ದಿ ಸೋಶಿಯಲ್ ಇಂಪರೇಟಿವ್’ ಎಂಬ ಕಿರುಪುಸ್ತಕವನ್ನು ರಚಿಸಿದ್ದರು. ಎಸ್‌-ವ್ಯಾಸ ಪರಿಸರದಲ್ಲಿ ಅವರು ಹಲವು ದಿನಗಳನ್ನು ಕಳೆದಿದ್ದರು. ಇಲ್ಲಿ ಯೋಗವನ್ನು ಜೀವನದ ಭಾಗವಾಗಿಸಿಕೊಂಡವರು ತಮ್ಮ ಬದುಕನ್ನು ಹೇಗೆ ಸಾರ್ಥಕಗೊಳಿಸಿಕೊಂಡಿದ್ದಾರೆ, ಸಮಾಜದ ಒಳಿತಿಗೆ ಮತ್ತು ರಾಷ್ಟ್ರಕಾರ್ಯಕ್ಕೆ ಹೇಗೆ ಕೊಡುಗೆ ನೀಡಿದ್ದಾರೆ ಎಂಬುದನ್ನು ಹಲವು ಸಂದರ್ಭಗಳಲ್ಲಿ ವಿವರಿಸಿದ್ದರು. ಇತರರ ಉನ್ನತಿಗಾಗಿ ಶ್ರಮಿಸುವ ಜೀವನದಲ್ಲಿ ಯೋಗದ ಪಾತ್ರವೇನು ಎಂಬುದನ್ನೂ ವಿಭಿನ್ನ ಉದಾಹರಣೆಗಳ ಮೂಲಕ ತಿಳಿಸಿಕೊಟ್ಟಿದ್ದರು ಎಂದು ಹೊಸಬಾಳೆ ಹೇಳಿದರು.

ಸರಳತೆ ಮತ್ತು ವಿನಯದ ಅಪರೂಪದ ವ್ಯಕ್ತಿತ್ವ

ಉತ್ತಮ ಬೌದ್ಧಿಕ ಸಾಮರ್ಥ್ಯ, ಸಾಹಿತ್ಯಾಸಕ್ತಿ ಮತ್ತು ಗಂಭೀರ ವ್ಯಕ್ತಿತ್ವ ಹೊಂದಿದ್ದ ಶೇಷಾದ್ರಿಯವರು ಸರಳ ಜೀವನಕ್ಕೂ ಅಷ್ಟೇ ಮಹತ್ವ ನೀಡಿದ್ದರು. ಅವರು ಎಂ.ಎಸ್ಸಿ.ಯಲ್ಲಿ ಚಿನ್ನದ ಪದಕ ಪಡೆದಿದ್ದರೂ, ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಕಾರ್ಯವಾಹರಂತಹ ಉನ್ನತ ಜವಾಬ್ದಾರಿ ನಿರ್ವಹಿಸಿದ್ದರೂ ಅವರ ಜೀವನಶೈಲಿಯಲ್ಲಿ ಯಾವುದೇ ಆಡಂಬರ ಇರಲಿಲ್ಲ. ಸಾಮಾನ್ಯ ವ್ಯಕ್ತಿಯಂತೆಯೇ ಸರಳವಾಗಿ ಬದುಕುತ್ತಿದ್ದರು ಎಂದು ಹೊಸಬಾಳೆ ಸ್ಮರಿಸಿದರು.

ಗಂಭೀರ ಸ್ವಭಾವದವರಾಗಿದ್ದರೂ ತಮ್ಮನ್ನೇ ತಾವು ಹಾಸ್ಯಮಾಡಿಕೊಳ್ಳುವ ಗುಣ ಅವರಲ್ಲಿತ್ತು. ಇದು ಅವರಲ್ಲಿದ್ದ ವಿನಯವನ್ನು ತೋರಿಸುತ್ತದೆ. ಭಗವದ್ಗೀತೆಯಲ್ಲಿ ಸಾತ್ವಿಕ ವ್ಯಕ್ತಿಗಳ ಗುಣಲಕ್ಷಣಗಳನ್ನು ವಿವರಿಸಲಾಗಿದೆ. ಆ ಗುಣಗಳಿಗೆ ಹೊಂದುವ ವ್ಯಕ್ತಿತ್ವ ಶೇಷಾದ್ರಿಯವರದ್ದಾಗಿತ್ತು ಎಂದು ಅವರು ಅಭಿಪ್ರಾಯಪಟ್ಟರು.

ಕಾರ್ಯಕ್ರಮದಲ್ಲಿ ಹೊ.ವೆ. ಶೇಷಾದ್ರಿಯವರು ರಚಿಸಿದ ಆರು ಪುಸ್ತಕಗಳನ್ನು ಬಿಡುಗಡೆ ಮಾಡಲಾಯಿತು.

ಕಾರ್ಯಕ್ರಮದಲ್ಲಿ ಬಿಡುಗಡೆಯಾದ ಆರು ಪುಸ್ತಕಗಳು

1. ಯುಗಾವತಾರ (Yugavatara)

ಹೊ.ವೆ. ಶೇಷಾದ್ರಿಯವರು ರಚಿಸಿದ ಐತಿಹಾಸಿಕ ಕಾದಂಬರಿ ‘ಯುಗಾವತಾರ’. ಛತ್ರಪತಿ ಶಿವಾಜಿ ಮಹಾರಾಜರ ದೂರದೃಷ್ಟಿ, ಶೌರ್ಯ ಮತ್ತು ಹಿಂದವಿ ಸ್ವರಾಜ್ಯದ ಸ್ಥಾಪನೆಗೆ ಅವರು ನೀಡಿದ ಕೊಡುಗೆಯನ್ನು ಈ ಕೃತಿ ವಿವರಿಸುತ್ತದೆ. ಮೂಲತಃ ಕನ್ನಡದಲ್ಲಿ ರಚನೆಯಾದ ಈ ಪುಸ್ತಕವನ್ನು ಪ್ರಶಾಂತ್ ವೈದ್ಯರಾಜ್ ಅವರು ಇಂಗ್ಲಿಷ್‌ಗೆ ಅನುವಾದಿಸಿದ್ದಾರೆ.

2. ಕ್ರಾಂತಿಯಲ್ಲ ಭ್ರಾಂತಿ (Not a Revolution, but a Delusion)

ಶೇಷಾದ್ರಿಯವರ ಕನ್ನಡ ಕೃತಿ ‘ಕ್ರಾಂತಿಯಲ್ಲ ಭ್ರಾಂತಿ’ಯ ಇಂಗ್ಲಿಷ್ ಅನುವಾದವೇ ‘ನಾಟ್ ಎ ರೆವಲ್ಯೂಷನ್, ಬಟ್ ಎ ಡಿಲ್ಯೂಷನ್’. ಡಾ. ನಂದನ್ ಪ್ರಭು ಅವರು ಇದನ್ನು ಇಂಗ್ಲಿಷ್‌ಗೆ ಅನುವಾದಿಸಿದ್ದಾರೆ. ಕಮ್ಯುನಿಸಂನ ಸಿದ್ಧಾಂತಗಳು, ಅದರ ಭರವಸೆಗಳು ಮತ್ತು ವಾಸ್ತವಿಕತೆಗಳ ನಡುವಿನ ವ್ಯತ್ಯಾಸವನ್ನು ಈ ಕೃತಿ ವಿಶ್ಲೇಷಿಸುತ್ತದೆ. ವೈಯಕ್ತಿಕ ಸ್ವಾತಂತ್ರ್ಯ, ರಾಷ್ಟ್ರೀಯ ಅಸ್ಮಿತೆ ಮತ್ತು ಸಮಾಜದ ಮೇಲೆ ಆ ಸಿದ್ಧಾಂತ ಬೀರುವ ಪರಿಣಾಮಗಳನ್ನೂ ಪರಿಶೀಲಿಸುತ್ತದೆ. ರಾಜಕೀಯ ಆಶ್ವಾಸನೆಗಳನ್ನು ಪ್ರಶ್ನಿಸಿ, ಅವುಗಳ ನೈಜ ಪರಿಣಾಮಗಳನ್ನು ವಿಮರ್ಶಾತ್ಮಕವಾಗಿ ಅರ್ಥಮಾಡಿಕೊಳ್ಳಲು ಓದುಗರನ್ನು ಪ್ರೇರೇಪಿಸುವ ಲೇಖನಗಳು ಇದರಲ್ಲಿವೆ.

3. ನವ ನಿರ್ಮಾಣದ ಒಳಪದರಗಳು (The Hidden Layers of National Renaissance)

‘ನವ ನಿರ್ಮಾಣದ ಒಳಪದರಗಳು’ ಎಂಬ ಕನ್ನಡ ಕೃತಿಯ ಇಂಗ್ಲಿಷ್ ಅನುವಾದವನ್ನು ನಳಿನಿ ಕೇಶವಮೂರ್ತಿ ಮಾಡಿದ್ದಾರೆ. ವ್ಯಕ್ತಿತ್ವ ವಿಕಸನ, ಸಾಂಸ್ಕೃತಿಕ ಪರಂಪರೆ, ಶಿಕ್ಷಣ ಮತ್ತು ಸಾಮಾಜಿಕ ಜವಾಬ್ದಾರಿಗಳ ಕುರಿತು ಈ ಕೃತಿಯಲ್ಲಿ ಪ್ರಬಂಧಗಳಿವೆ. ರಾಷ್ಟ್ರದ ಪುನರ್‌ನಿರ್ಮಾಣಕ್ಕೆ ಅಗತ್ಯವಾದ ಮೌಲ್ಯಗಳು ಮತ್ತು ಬಲವಾದ ಆಂತರಿಕ ಅಡಿಪಾಯದ ಮಹತ್ವವನ್ನು ಈ ಬರಹಗಳು ವಿವರಿಸುತ್ತವೆ.

4. ವಿಕೃತಿಯಿಂದ ಸಂಸ್ಕೃತಿಯೆಡೆಗೆ (From Distortion Towards Cultural Awakening)

ಶೇಷಾದ್ರಿಯವರ ‘ವಿಕೃತಿಯಿಂದ ಸಂಸ್ಕೃತಿಯೆಡೆಗೆ’ ಎಂಬ ಕನ್ನಡ ಕೃತಿಯನ್ನು ಸತ್ಯನಾರಾಯಣ ಶಾನಭಾಗ್ ಅವರು ಇಂಗ್ಲಿಷ್‌ಗೆ ಅನುವಾದಿಸಿದ್ದಾರೆ. ಭಾರತೀಯ ಸಮಾಜ, ಸಂಸ್ಕೃತಿ ಮತ್ತು ಹಿಂದೂ ಚಿಂತನೆಗಳ ಬಗ್ಗೆ ಸಮಾಜದಲ್ಲಿ ಕಂಡುಬರುವ ತಪ್ಪು ಕಲ್ಪನೆಗಳನ್ನು ಈ ಪುಸ್ತಕ ಪರಿಶೀಲಿಸುತ್ತದೆ. ಧರ್ಮ, ಸಾಮಾಜಿಕ ಹೊಣೆಗಾರಿಕೆ ಮತ್ತು ರಾಷ್ಟ್ರೀಯ ಜೀವನದ ಮೌಲ್ಯಗಳನ್ನು ಸಾಂಸ್ಕೃತಿಕ ಜಾಗೃತಿಯ ಪ್ರಮುಖ ಅಂಶಗಳಾಗಿ ಈ ಕೃತಿ ಪರಿಚಯಿಸುತ್ತದೆ.

5. ತಾಯಿ ಕಾದಿಹಳು (Mother Awaits)

‘ತಾಯಿ ಕಾದಿಹಳು’ ಎಂಬ ಕನ್ನಡ ಕೃತಿಯನ್ನು ಮಂಜುಳಾ ಟೆಕಲ್ ಅವರು ಇಂಗ್ಲಿಷ್‌ಗೆ ಅನುವಾದಿಸಿದ್ದಾರೆ. ಹದಿನೈದು ಪ್ರಬಂಧಗಳನ್ನು ಒಳಗೊಂಡಿರುವ ಈ ಪುಸ್ತಕದಲ್ಲಿ ರಾಷ್ಟ್ರೀಯ ಪ್ರಜ್ಞೆ, ಸಾಂಸ್ಕೃತಿಕ ಪರಂಪರೆ, ವ್ಯಕ್ತಿತ್ವ ನಿರ್ಮಾಣ ಮತ್ತು ಧರ್ಮದಂತಹ ಶಾಶ್ವತ ಮೌಲ್ಯಗಳ ಕುರಿತು ಚರ್ಚಿಸಲಾಗಿದೆ. ರಾಷ್ಟ್ರದ ಭವಿಷ್ಯವನ್ನು ರೂಪಿಸುವಲ್ಲಿ ಈ ಮೌಲ್ಯಗಳು ವಹಿಸುವ ಪಾತ್ರವನ್ನು ಕೃತಿ ವಿವರಿಸುತ್ತದೆ.

6. ಮೃಗಜಲ ಮತ್ತು ನಿಜಜಲ (The Mirage and Reality)

ಶೇಷಾದ್ರಿಯವರು ಕನ್ನಡದಲ್ಲಿ ರಚಿಸಿದ ‘ಮೃಗಜಲ ಮತ್ತು ನಿಜಜಲ’ ಎಂಬ ಪ್ರಬಂಧಗಳ ಸಂಕಲನದ ಇಂಗ್ಲಿಷ್ ಅನುವಾದವೇ ‘ದಿ ಮಿರಾಜ್ ಅಂಡ್ ರಿಯಾಲಿಟಿ’. ಸತ್ಯನಾರಾಯಣ ಶಾನಭಾಗ್ ಅವರು ಈ ಕೃತಿಯನ್ನು ಇಂಗ್ಲಿಷ್‌ಗೆ ಅನುವಾದಿಸಿದ್ದಾರೆ. ಮಾನವ ಸ್ವಭಾವ, ಸಾಂಸ್ಕೃತಿಕ ಮೌಲ್ಯಗಳು, ನೈತಿಕತೆ ಮತ್ತು ಸಮಕಾಲೀನ ನಾಗರಿಕತೆಯ ವಿವಿಧ ವಿಚಾರಗಳನ್ನು ಈ ಪುಸ್ತಕ ಒಳಗೊಂಡಿದೆ. ವ್ಯಕ್ತಿಯ ಬದುಕು ಮತ್ತು ರಾಷ್ಟ್ರೀಯ ಪ್ರಜ್ಞೆಯನ್ನು ರೂಪಿಸುವ ಆಳವಾದ ಸತ್ಯಗಳನ್ನು ಈ ಪ್ರಬಂಧಗಳು ಅನ್ವೇಷಿಸುತ್ತವೆ.

ಕಾರ್ಯಕ್ರಮದಲ್ಲಿ ಕರ್ನಾಟಕದ ರಾಜ್ಯಪಾಲೆ ಡಾ. ಸುಧಾ ಯಾದವ್, ದಕ್ಷಿಣ ಕೊರಿಯಾದ ಮಿರ್ಯಾಂಗ್ ನಗರದ ಮೇಯರ್ ಆನ್ ಬ್ಯಿಂಗ್ ಗೂ, ಎಸ್‌-ವ್ಯಾಸ ಸೊಸೈಟಿಯ ಅಧ್ಯಕ್ಷ ಡಾ. ಎಚ್.ಆರ್. ನಾಗೇಂದ್ರ, ಉಪಾಧ್ಯಕ್ಷ ಸತೀಶ್ ಗುಪ್ತಾ ಹಾಗೂ ಎಸ್‌-ವ್ಯಾಸ ವಿಶ್ವವಿದ್ಯಾನಿಲಯದ ಕುಲಪತಿ ಡಾ. ಎಚ್.ಆರ್. ದಯಾನಂದ ಸ್ವಾಮಿ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.

ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122