ಸ್ವಾನಂದಾಶ್ರಮ: ಭಕ್ತಿ, ಸಂಸ್ಕೃತಿ, ಸೇವೆ ಮತ್ತು ಹೊಯ್ಸಳ ವೈಭವದ ಸಂಗಮ

ಆಗಸ್ಟ್ 16ರಿಂದ ವರದ ಗಣಪತಿ ವ್ರತಾಚರಣೆ

ಬೆಂಗಳೂರು: ಕನಕಪುರ ರಸ್ತೆಯ ಅಗರ–ತಾತಗುಣಿಯಲ್ಲಿ ನೆಲೆಗೊಂಡಿರುವ ಶ್ರೀ ಸ್ವಾನಂದಾಶ್ರಮ (ಶ್ರೀ ಗಣೇಶ ಮಹಾ ಸಂಸ್ಥಾನ)ವು ಗಣೇಶೋಪಾಸನೆ, ಭಾರತೀಯ ಸಂಸ್ಕೃತಿ, ಜ್ಞಾನಯಜ್ಞ, ಸಾಮಾಜಿಕ ಸೇವೆ ಹಾಗೂ ಹೊಯ್ಸಳ ಶಿಲ್ಪಕಲೆಯ ಪುನರುಜ್ಜೀವನವನ್ನು ಸಮನ್ವಯಗೊಳಿಸಿರುವ ವಿಶಿಷ್ಟ ಆಧ್ಯಾತ್ಮಿಕ ಕೇಂದ್ರವಾಗಿ ಬೆಳೆದುಬಂದಿದೆ. ರಜತ ಮಹೋತ್ಸವವನ್ನು ಪೂರೈಸಿರುವ ಈ ಕ್ಷೇತ್ರದಲ್ಲಿ ನಿತ್ಯ ಧಾರ್ಮಿಕ ಆಚರಣೆಗಳ ಜತೆಗೆ ವಿವಿಧ ಜನಪರ ಹಾಗೂ ಸಾಂಸ್ಕೃತಿಕ ಚಟುವಟಿಕೆಗಳು ನಿರಂತರವಾಗಿ ನಡೆಯುತ್ತಿವೆ.

ಶ್ರೀಮದ್ ಜಗದ್ಗುರು ಶಂಕರಾಚಾರ್ಯ ಶ್ರೀ ಸೋಂದಾ ಸ್ವರ್ಣವಲ್ಲೀ ಮಹಾಸಂಸ್ಥಾನದ ಪರಮಪೂಜ್ಯ ಶ್ರೀ ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮೀಜಿಯವರ ದಿವ್ಯ ಮಾರ್ಗದರ್ಶನದಲ್ಲಿ ಆಶ್ರಮವು ಗಣೇಶತತ್ತ್ವದ ಅಧ್ಯಯನ, ಸಂಶೋಧನೆ, ಗ್ರಂಥಪ್ರಕಾಶನ ಹಾಗೂ ಉಪಾಸನಾ ಸಾಹಿತ್ಯದ ಪ್ರಸಾರದ ಮೂಲಕ ಜ್ಞಾನಯಜ್ಞವನ್ನು ನಡೆಸುತ್ತಿದೆ.

ಇಷ್ಟಾರ್ಥ ಸಿದ್ಧಿಗೆ ವರದ ಗಣಪತಿ ವ್ರತ
ಅಭೀಷ್ಟ ಫಲಪ್ರದಾಯಕವೆಂದು ಪರಿಗಣಿಸಲ್ಪಡುವ ವರದ ಗಣಪತಿ ವ್ರತವನ್ನು ಆಶ್ರಮದಲ್ಲಿ ಕಳೆದ ಹಲವು ವರ್ಷಗಳಿಂದ ಲೋಕಕಲ್ಯಾಣಾರ್ಥವಾಗಿ ಆಚರಿಸಲಾಗುತ್ತಿದೆ. ಆಗಸ್ಟ್ 16ರಿಂದ ಒಂದು ತಿಂಗಳ ಕಾಲ, ಶ್ರಾವಣ ಶುದ್ಧ ಚತುರ್ಥಿಯಿಂದ ಭಾದ್ರಪದ ಶುದ್ಧ ಚತುರ್ಥಿಯವರೆಗೆ ನಡೆಯುವ ಈ ವ್ರತದಲ್ಲಿ ಗಣಪತಿ ಪೂಜೆ, ಏಕಾಕ್ಷರ ಮಂತ್ರಜಪ, ನಿತ್ಯ ಅನ್ನದಾನ ಹಾಗೂ ಸಮಾರೋಪದಲ್ಲಿ ಹೋಮ–ಪೂರ್ಣಾಹುತಿ ನೆರವೇರಲಿದೆ.
ಗಣೇಶ ಪುರಾಣದಲ್ಲಿ ಪಾರ್ವತಿಯು ಶಿವನ ದರ್ಶನ ಹಾಗೂ ಪತಿಯ ಪ್ರಾಪ್ತಿಗಾಗಿ ಈ ವ್ರತವನ್ನು ಆಚರಿಸಿದ ಪ್ರಸಂಗ ಉಲ್ಲೇಖಿತವಾಗಿದೆ. ಶ್ರದ್ಧೆ, ಭಕ್ತಿ ಮತ್ತು ನಿಯಮಬದ್ಧತೆಯಿಂದ ವ್ರತಾಚರಣೆ ಮಾಡಿದರೆ ಗಣಪತಿಯ ಅನುಗ್ರಹದಿಂದ ಸಂಕಲ್ಪಿತ ಇಷ್ಟಾರ್ಥಗಳು ಈಡೇರುತ್ತವೆ ಎಂಬ ನಂಬಿಕೆ ಭಕ್ತರಲ್ಲಿದೆ.

‘ಸ್ವಾನಂದ ಲೋಕ’ದ ಸಾಕಾರ ರೂಪ
ಗಣೇಶ ಪುರಾಣದಲ್ಲಿ ವರ್ಣಿತವಾಗಿರುವ ಗಣಪತಿಯ ದಿವ್ಯ ನಿವಾಸ ‘ಸ್ವಾನಂದ ಲೋಕ’ದ ಪರಿಕಲ್ಪನೆಯನ್ನು ಮೂರ್ತರೂಪದಲ್ಲಿ ಸಾಕಾರಗೊಳಿಸುವ ಆಶಯದೊಂದಿಗೆ ಆಶ್ರಮದಲ್ಲಿ ಹೊಯ್ಸಳ ಶೈಲಿಯ ಭವ್ಯ ಗಣಪತಿ ದೇವಾಲಯ ನಿರ್ಮಾಣಗೊಂಡಿದೆ.
ಎಂಟು ಶತಮಾನಗಳ ಹಿಂದೆ ಕರ್ನಾಟಕಕ್ಕೆ ಜಾಗತಿಕ ಕೀರ್ತಿ ತಂದ ಹೊಯ್ಸಳ ಶಿಲ್ಪಕಲೆಯ ವೈಭವವನ್ನು ಪುನರುಜ್ಜೀವನಗೊಳಿಸುವ ಮಹಾಸಂಕಲ್ಪವನ್ನು ಆಶ್ರಮ ಕೈಗೊಂಡಿದೆ. ನಕ್ಷತ್ರಾಕಾರದ ಜಗತಿ, ಬಳಪದ ಕಲ್ಲಿನ ಸೂಕ್ಷ್ಮ ಕೆತ್ತನೆ, ಅಲಂಕೃತ ತೋರಣಗಳು, ಪುರಾಣ–ಇತಿಹಾಸದ ಶಿಲ್ಪಚಿತ್ರಗಳು ಹಾಗೂ ವೈಜ್ಞಾನಿಕ ಜಲಸಂರಕ್ಷಣಾ ವ್ಯವಸ್ಥೆ ದೇವಾಲಯದ ವಿಶೇಷತೆಗಳಾಗಿವೆ.
ಶ್ರೀಚಕ್ರ ಸಹಿತ ಸರ್ಪಾರೂಢ ಮಹಾರಾಜ್ಞಿ ದೇವಾಲಯ, ಗಣೇಶ ಪುರಾಣೋಕ್ತ 32 ಗಣಪತಿ ಸ್ವರೂಪಗಳು ಹಾಗೂ ಮುದ್ಗಲ ಪುರಾಣೋಕ್ತ ಚತುರ್ಯುಗ ಗಣಪತಿಗಳ ಸಮುಚ್ಚಯ ಈ ಕ್ಷೇತ್ರದ ಪ್ರಮುಖ ಆಕರ್ಷಣೆಗಳಾಗಿವೆ.

ಶ್ರೀ ಏಕಾಕ್ಷರ ಮಹಾಗಣಪತಿ ಪ್ರತಿಷ್ಠಾಪನೆ
ಈ ಆಧ್ಯಾತ್ಮಿಕ–ಸಾಂಸ್ಕೃತಿಕ ಪಯಣದ ಮಹತ್ವದ ಘಟ್ಟವಾಗಿ ಶ್ರೀ ಏಕಾಕ್ಷರ ಮಹಾಗಣಪತಿ ಪ್ರತಿಷ್ಠಾಪನಾ ಮಹೋತ್ಸವ ಹಾಗೂ ನೂತನ ಹೊಯ್ಸಳ ಶೈಲಿಯ ದೇವಾಲಯದ ಪ್ರಥಮ ಹಂತದ ಉದ್ಘಾಟನೆ ಇತ್ತೀಚೆಗೆ ನೆರವೇರಿದೆ. ಇದರಿಂದ ಸ್ವಾನಂದಾಶ್ರಮವು ಗಣೇಶಭಕ್ತಿಯ ಪ್ರಮುಖ ಕೇಂದ್ರವಷ್ಟೇ ಅಲ್ಲದೆ, ಕರ್ನಾಟಕದ ಶಿಲ್ಪ–ವಾಸ್ತು ಪರಂಪರೆಯ ಸಂರಕ್ಷಣಾ ತಾಣವಾಗಿಯೂ ರೂಪುಗೊಳ್ಳುತ್ತಿದೆ.

ಸೇವೆಯೇ ಸಾಧನೆ
ಧಾರ್ಮಿಕ ಚಟುವಟಿಕೆಗಳ ಜತೆಗೆ ಸ್ವಾನಂದಾಶ್ರಮವು ವಿದ್ಯಾಚೇತನ ಯೋಜನೆ, ಅನ್ನದಾನ, ಉಚಿತ ಆರೋಗ್ಯ ತಪಾಸಣಾ ಶಿಬಿರ, ಗೋಸಂರಕ್ಷಣೆ, ಸಂಸ್ಕೃತ ಗುರುಕುಲ ಹಾಗೂ ಧನ್ವಂತರಿ ವನದಂತಹ ಸಮಾಜಮುಖಿ ಕಾರ್ಯಗಳನ್ನು ನಡೆಸುತ್ತಿದೆ. ವಿದ್ಯಾರ್ಥಿಗಳಲ್ಲಿ ಭಾರತೀಯ ಸಂಸ್ಕೃತಿ ಮತ್ತು ಕಲಾಸಕ್ತಿಯನ್ನು ಬೆಳೆಸಲು ಕಲಾ ಮಹೋತ್ಸವ ಹಾಗೂ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನೂ ಆಯೋಜಿಸಲಾಗುತ್ತಿದೆ.
“ಅನ್ನದಾನ ಒಂದು ದಿನದ ಪುಣ್ಯಕ್ಕೆ ಕಾರಣವಾದರೆ, ವಿದ್ಯಾದಾನ ಒಂದು ಜನಾಂಗದ ಭವಿಷ್ಯ ರೂಪಿಸುತ್ತದೆ; ಸಂಸ್ಕೃತಿ ಸಂರಕ್ಷಣೆಗೆ ನೀಡುವ ಕೊಡುಗೆ ಹಲವು ತಲೆಮಾರುಗಳಿಗೆ ಶಾಶ್ವತ ಫಲ ನೀಡುತ್ತದೆ” ಎಂಬ ಆಶಯದೊಂದಿಗೆ ಈ ಮಹತ್ಕಾರ್ಯಕ್ಕೆ ಭಕ್ತರು, ದಾನಿಗಳು ಹಾಗೂ ಕಲಾಭಿಮಾನಿಗಳು ಕೈಜೋಡಿಸುವಂತೆ ಆಶ್ರಮದ ವತಿಯಿಂದ ಮನವಿ ಮಾಡಲಾಗಿದೆ.

ಸ್ವಾನಂದಾಶ್ರಮ ಸುತ್ತಮುತ್ತಲಿನ ಪ್ರೇಕ್ಷಣೀಯ ಸ್ಥಳಗಳು
ಸ್ವಾನಂದಾಶ್ರಮಕ್ಕೆ ಭೇಟಿ ನೀಡುವ ಭಕ್ತರು ಸಮೀಪದಲ್ಲಿರುವ ಹಲವು ಧಾರ್ಮಿಕ ಹಾಗೂ ಸಾಂಸ್ಕೃತಿಕ ತಾಣಗಳನ್ನೂ ಸಂದರ್ಶಿಸಬಹುದು. ವಸಂತಪುರದ ಪ್ರಸಿದ್ಧ ವಲ್ಲಭರಾಯಸ್ವಾಮಿ ದೇಗುಲ, ಹೊಸಪಾಳ್ಯದ ಯಂತ್ರೋದ್ಧಾರಕ ಆಂಜನೇಯ ಹಾಗೂ 108 ಸಾಲಿಗ್ರಾಮಗಳಿರುವ ಶ್ರೀ ರಾಘವೇಂದ್ರ ಗುರುಸಾರ್ವಭೌಮರ ಮೃತ್ತಿಕಾ ಬೃಂದಾವನ ಸನ್ನಿಧಾನದ ತುಳಸಿ ಮಠ, ಶ್ರೀ ಭೂವರಾಹ ಕ್ಷೇತ್ರ, ಶ್ರೀ ಶ್ರೀ ರವಿಶಂಕರ್ ಗುರೂಜಿಯವರ ಆರ್ಟ್ ಆಫ್ ಲಿವಿಂಗ್, ಪಿರಮಿಡ್ ವ್ಯಾಲಿ, ಮರಳವಾಡಿಯ ಅನ್ನಪೂರ್ಣ ದೇವಾಲಯ ಹಾಗೂ ಕಲ್ಲಹಳ್ಳಿಯ ಪುರಾತನ ಶ್ರೀನಿವಾಸ ದೇವಸ್ಥಾನ ಪ್ರಮುಖ ಆಕರ್ಷಣೆಗಳಾಗಿವೆ.

ಭಕ್ತರಿಗೆ ಮಾಹಿತಿ
ಸ್ವಾನಂದಾಶ್ರಮಕ್ಕೆ ಬಿ.ಎಂ.ಟಿ.ಸಿ. ಬಸ್‌ಗಳಾದ 212, 212B, 212M (ಕಲಾಸಿಪಾಳ್ಯ–ಬನಶಂಕರಿ ಮಾರ್ಗ), 219, 229D ಹಾಗೂ 377 (ಕೆಂಗೇರಿ ಮಾರ್ಗ) ಮೂಲಕ ತಲುಪಬಹುದು.
ವಿವರಗಳಿಗೆ: 9113010378 / 9972471440
ಸ್ವಾನಂದಾಶ್ರಮವು ಕೇವಲ ದೇವಾಲಯವಲ್ಲ; ಭಕ್ತಿ, ಜ್ಞಾನ, ಕಲೆ, ಸಂಸ್ಕೃತಿ ಮತ್ತು ಸೇವೆಗಳ ಸಮಗ್ರ ಆಧ್ಯಾತ್ಮಿಕ ವಿಶ್ವ. ವರದ ಗಣಪತಿ ವ್ರತ, ಶ್ರೀ ಏಕಾಕ್ಷರ ಮಹಾಗಣಪತಿ ಪ್ರತಿಷ್ಠಾಪನೆ, ಸಮಾಜಮುಖಿ ಸೇವೆ ಮತ್ತು ಹೊಯ್ಸಳ ಶಿಲ್ಪಕಲೆಯ ಪುನರುಜ್ಜೀವನ- ಇವೆಲ್ಲವೂ ಒಂದೇ ಧ್ಯೇಯದತ್ತ ಸಾಗುತ್ತಿರುವ ಈ ಕ್ಷೇತ್ರವು ಭವಿಷ್ಯದ ಪೀಳಿಗೆಗಳಿಗೆ ಧರ್ಮ, ಸಂಸ್ಕೃತಿ ಮತ್ತು ಪರಂಪರೆಯ ಜೀವಂತ ಪಾಠಶಾಲೆಯಾಗಿ ರೂಪುಗೊಳ್ಳುತ್ತಿದೆ.

ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122