ಜ್ಞಾನ ಮತ್ತು ಬೆಳವಣಿಗೆಯ ಸಂಕೇತವಾಗಿ ದೀಪಾವಳಿ ಆಚರಿಸಲು ಕ್ಯಾಲಿಫೋರ್ನಿಯಾ ಸಜ್ಜು

ಭಾರತೀಯ ಅಮೆರಿಕನ್ನರ ಕೊಡುಗೆಗೆ ಶ್ಲಾಘನೆ

ಕ್ಯಾಲಿಫೋರ್ನಿಯಾ: ಅಮೆರಿಕದ ಕ್ಯಾಲಿಫೋರ್ನಿಯಾ ರಾಜ್ಯ ವಿಧಾನಸಭೆಯು ನವೆಂಬರ್ 8 ರಂದು ‘ದೀಪಾವಳಿ ದಿನ’ ಎಂದು ಗುರುತಿಸುವ ನಿರ್ಣಯವನ್ನು ಅಂಗೀಕರಿಸಿದ್ದು, ರಾಜ್ಯದ ಎಲ್ಲಾ ನಾಗರಿಕರು ಈ ಆಚರಣೆಯಲ್ಲಿ ಭಾಗವಹಿಸುವಂತೆ ಕರೆ ನೀಡಿದೆ.

ಅಸೆಂಬ್ಲಿ ಸದಸ್ಯರಾದ ದರ್ಶನಾ ಪಟೇಲ್ ಮತ್ತು ಆಶ್ ಕಲ್ರಾ ಅವರು ಮಂಡಿಸಿದ ಈ ನಿರ್ಣಯವು, ಈ ಪ್ರಮುಖ ಸಂದರ್ಭದಲ್ಲಿ ಕ್ಯಾಲಿಫೋರ್ನಿಯಾ ಹಾಗೂ ಪ್ರಪಂಚದಾದ್ಯಂತ ಇರುವ ಭಾರತೀಯ ಅಮೆರಿಕನ್ನರು ಮತ್ತು ಅನಿವಾಸಿ ಭಾರತೀಯ ಸಮುದಾಯಕ್ಕೆ (Indian Diaspora) ಅತ್ಯಂತ ಗೌರವವನ್ನು ವ್ಯಕ್ತಪಡಿಸಿದೆ.

“ಅಸೆಂಬ್ಲಿಯು ಈ ವರ್ಷದ ದೀಪಾವಳಿ ಹಬ್ಬವನ್ನು ನವೆಂಬರ್ 8, 2026 ರ ಭಾನುವಾರದಂದು ಗುರುತಿಸುತ್ತದೆ ಮತ್ತು ಈ ಸಂತಸದ ಆಚರಣೆಯ ದಿನದಲ್ಲಿ ಭಾಗವಹಿಸಲು ಕ್ಯಾಲಿಫೋರ್ನಿಯಾದ ಜನರನ್ನು ಪ್ರೋತ್ಸಾಹಿಸುತ್ತದೆ” ಎಂದು ಗುರುವಾರ ಅಸೆಂಬ್ಲಿಯಲ್ಲಿ ಅಂಗೀಕರಿಸಲ್ಪಟ್ಟ ನಿರ್ಣಯವು ತಿಳಿಸಿದೆ.

ಭಾರತೀಯ ಅಮೆರಿಕನ್ನರು ಮತ್ತು ದಕ್ಷಿಣ ಏಷ್ಯಾದ ಅಮೆರಿಕನ್ನರಿಗೆ ಅತ್ಯಂತ ಮಹತ್ವದ ಹಬ್ಬವಾದ ದೀಪಾವಳಿಯನ್ನು ಅಮೆರಿಕ ಹಾಗೂ ಜಗತ್ತಿನಾದ್ಯಂತ ಹಿಂದೂಗಳು, ಸಿಖ್ಖರು, ಬೌದ್ಧರು ಮತ್ತು ಜೈನರು ಪ್ರತಿವರ್ಷ ಆಚರಿಸುತ್ತಾರೆ ಎಂದು ಅದು ಹೇಳಿದೆ.

‘ದೀಪಗಳ ಸಾಲು’ ಎಂಬ ಅರ್ಥವನ್ನು ನೀಡುವ ದೀಪಾವಳಿ ಅಥವಾ ದೀಪಾವಳಿ ಹಬ್ಬವು ವಿಶ್ವದ ಅತ್ಯಂತ ಹಳೆಯ ಹಬ್ಬಗಳಲ್ಲಿ ಒಂದಾಗಿದೆ. ಇದು ಕುಟುಂಬಗಳು, ಸ್ನೇಹಿತರು ಮತ್ತು ಸಮುದಾಯಗಳನ್ನು ಉದಾರತೆ, ಏಕತೆ, ಸಂತೋಷ, ಮೆಚ್ಚುಗೆ ಮತ್ತು ಆತ್ಮಾವಲೋಕನದ ಆಚರಣೆಗಾಗಿ ಒಂದೆಡೆ ಸೇರಿಸುತ್ತದೆ ಎಂದು ನಿರ್ಣಯದಲ್ಲಿ ಉಲ್ಲೇಖಿಸಲಾಗಿದೆ.

“ಸಾಮಾನ್ಯವಾಗಿ ‘ಬೆಳಕಿನ ಹಬ್ಬ’ ಎಂದು ಕರೆಯಲ್ಪಡುವ ದೀಪಾವಳಿಯ ಸಮಯದಲ್ಲಿ, ಮನೆಗಳನ್ನು ಮೇಣದಬತ್ತಿಗಳು, ಎಣ್ಣೆ ದೀಪಗಳು ಮತ್ತು ಹಣತೆಗಳಿಂದ ಬೆಳಗಿಸಲಾಗುತ್ತದೆ. ಉತ್ತಮ ಆರೋಗ್ಯ, ಸಂಪತ್ತು, ಜ್ಞಾನ, ಶಾಂತಿ ಮತ್ತು ಸಮೃದ್ಧಿಗೆ ಗೌರವವನ್ನು ಸೂಚಿಸಲು ಬಟಾಕಿಗಳನ್ನು ಸಿಡಿಸಲಾಗುತ್ತದೆ” ಎಂದು ಅದು ಹೇಳಿದೆ.

ದೀಪಾವಳಿಯನ್ನು ಅತ್ಯಂತ ವೈವಿಧ್ಯಮಯ ರೀತಿಯಲ್ಲಿ ಆಚರಿಸಲಾಗುತ್ತದೆ. ಇದು ಕೆಟ್ಟದ್ದರ ಮೇಲೆ ಒಳ್ಳೆಯದ ಗೆಲುವನ್ನು ಪ್ರತಿನಿಧಿಸುತ್ತದೆ. ನಕಾರಾತ್ಮಕತೆಯಿಂದ ಮುಕ್ತಿ, ಸಂಕಷ್ಟಗಳನ್ನು ಮೆಟ್ಟಿ ನಿಲ್ಲುವ ಶಕ್ತಿ, ಸಕಾರಾತ್ಮಕತೆ ಮತ್ತು ವಿನಯತೆಯನ್ನು ಅಳವಡಿಸಿಕೊಳ್ಳುವುದು ಹಾಗೂ ವೈಯಕ್ತಿಕ ಸವಾಲುಗಳ ನಡುವೆಯೂ ದಯೆಯನ್ನು ಎತ್ತಿಹಿಡಿಯುವ ತತ್ವಗಳೊಂದಿಗೆ ಈ ಹಬ್ಬವು ಬೆಸೆದುಕೊಂಡಿದೆ ಎಂದು ತಿಳಿಸಲಾಗಿದೆ.

“ಹಬ್ಬವನ್ನು ಆಚರಿಸುವವರಿಗೆ, ದೀಪಾವಳಿಯು ಜ್ಞಾನ, ಬೆಳವಣಿಗೆ ಮತ್ತು ಸಂತೋಷಕ್ಕೆ ಬದ್ಧರಾಗುವ ಸಮಯವಾಗಿದೆ; ಇದು ಆತ್ಮಾವಲೋಕನದ ಸಮಯವಾಗಿದ್ದು, ಜ್ಞಾನ, ದಯೆ ಮತ್ತು ರೂಪಾಂತರದ ಪ್ರಾಮುಖ್ಯತೆಯನ್ನು ಸಾರುತ್ತದೆ” ಎಂದು ನಿರ್ಣಯದಲ್ಲಿ ಹೇಳಲಾಗಿದೆ.