ಭುವನೇಶ್ವರ: 2026-27ನೇ ಸಾಲಿನ ವಿದ್ಯಾರ್ಥಿ ಸಂಘದ ಚುನಾವಣೆಗೆ ಮುನ್ನ ಒಡಿಶಾದಲ್ಲಿ ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ (ABVP) ದೊಡ್ಡ ಮಟ್ಟದ ಯಶಸ್ಸನ್ನು ಸಾಧಿಸಿದೆ. ರಾಜ್ಯದ 60 ಕಾಲೇಜುಗಳಲ್ಲಿ ಎಬಿವಿಪಿಯ ಅಭ್ಯರ್ಥಿಗಳು ಒಟ್ಟು ೨೫೨ ಸ್ಥಾನಗಳಿಗೆ ಯಾವುದೇ ವಿರೋಧವಿಲ್ಲದೆ (ಅವಿರೋಧವಾಗಿ) ಆಯ್ಕೆಯಾಗಿದ್ದಾರೆ. ವಿದ್ಯಾರ್ಥಿಗಳೊಂದಿಗೆ ನಿರಂತರ ಸಂಪರ್ಕ ಮತ್ತು ಕ್ಯಾಂಪಸ್‌ನಲ್ಲಿ ವರ್ಷವಿಡೀ ನಡೆಸಿದ ರಚನಾತ್ಮಕ ಚಟುವಟಿಕೆಗಳೇ ಈ ಜಯಕ್ಕೆ ಕಾರಣ ಎಂದು ಸಂಘಟನೆ ತಿಳಿಸಿದೆ.
ನಾಮಪತ್ರ ಹಿಂಪಡೆಯಲು ನೀಡಲಾಗಿದ್ದ ಗಡುವು ಮುಕ್ತಾಯಗೊಂಡ ಬಳಿಕ, ಈ ಸ್ಥಾನಗಳಿಗೆ ಯಾವುದೇ ಎದುರಾಳಿ ಅಭ್ಯರ್ಥಿಗಳು ಕಣದಲ್ಲಿರಲಿಲ್ಲ. ಪರಿಣಾಮವಾಗಿ ಎಬಿವಿಪಿ ಅಭ್ಯರ್ಥಿಗಳು ಅವಿರೋಧವಾಗಿ ಆಯ್ಕೆಯಾಗಿದ್ದಾರೆಂದು ಅಧಿಕೃತವಾಗಿ ಖಚಿತಗೊಂಡಿದೆ. ಈ ವಿಜೇತರಲ್ಲಿ 12 ಅಧ್ಯಕ್ಷ ಸ್ಥಾನಗಳು, 17 ಪ್ರಧಾನ ಕಾರ್ಯದರ್ಶಿ ಸ್ಥಾನಗಳು, 22 ಉಪಾಧ್ಯಕ್ಷ ಸ್ಥಾನಗಳು ಹಾಗೂ ೨೩ ಜಂಟಿ ಕಾರ್ಯದರ್ಶಿ ಸ್ಥಾನಗಳು ಸೇರಿವೆ. ಈ ಚುನಾವಣೆಯಲ್ಲಿ ಕಾಂಗ್ರೆಸ್ ಬೆಂಬಲಿತ ಎನ್‌ಎಸ್‌ಯುಐ (NSUI) ಮತ್ತು ಬಿಜು ಜನತಾದಳದ ಬೆಂಬಲಿತ ಬಿಸಿಜೆಡಿ (BCJD) ಪಕ್ಷಗಳು ಹಲವು ಕಾಲೇಜುಗಳಲ್ಲಿ ಅಭ್ಯರ್ಥಿಗಳನ್ನೇ ಕಣಕ್ಕಿಳಿಸಲು ವಿಫಲವಾಗಿವೆ ಎಂದು ಎಬಿವಿಪಿ ತಿಳಿಸಿದೆ.
ವಿವಿಧ ಕಾಲೇಜುಗಳಲ್ಲಿ ಅಭೂತಪೂರ್ವ ಜಯ:
ಒಡಿಶಾದ ಪ್ರಮುಖ ಶಿಕ್ಷಣ ಸಂಸ್ಥೆಗಳಲ್ಲಿ ಎಬಿವಿಪಿ ತನ್ನ ಪ್ರಾಬಲ್ಯ ಮೆರೆದಿದೆ. ಬ್ರಹ್ಮಪುರ ವಿಶ್ವವಿದ್ಯಾಲಯದಲ್ಲಿ ಎಬಿವಿಪಿಯ ಅಭ್ಯರ್ಥಿಗಳು ಅಧ್ಯಕ್ಷ, ನಾಟಕ ಕಾರ್ಯದರ್ಶಿ ಹಾಗೂ ಸಾಂಸ್ಕೃತಿಕ ಕಾರ್ಯದರ್ಶಿ ಹುದ್ದೆಗಳನ್ನು ಗೆದ್ದುಕೊಂಡಿದ್ದಾರೆ.
ಅಲ್ಲದೆ, ತಲ್ಚೆರ್ ಸ್ವಾಯತ್ತ ಕಾಲೇಜು, ಧರ್ಮಶಾಲಾ ಡಿಗ್ರಿ ಕಾಲೇಜು, ಧೆಂಕನಾಲ ಜಿಲ್ಲೆಯ ಜೋರ್ಂಡಾದ ಮಹಿಮಾ ಡಿಗ್ರಿ ಕಾಲೇಜು, ಬ್ರಹ್ಮಪುರ ವಲಯದ ಚಿಕಿಟಿ ಡಿಗ್ರಿ ಕಾಲೇಜು, ಬುಗುಡಾದ ಪೀಪಲ್ಸ್ ಡಿಗ್ರಿ ಕಾಲೇಜು ಮತ್ತು ಹಿಂಡೋಲ್‌ನ ಖಜುರಿಕಾಟ ಡಿಗ್ರಿ ಕಾಲೇಜಿನ ಪ್ರಮುಖ ಹುದ್ದೆಗಳಲ್ಲೂ ಎಬಿವಿಪಿ ಅಭ್ಯರ್ಥಿಗಳು ಜಯ ಸಾಧಿಸಿದ್ದಾರೆ. ದೆಹಲಿ, ಪಂಜಾಬ್, ಕೇರಳ ಮತ್ತು ಅಸ್ಸಾಂ ರಾಜ್ಯಗಳಲ್ಲೂ ತಾನು ಸಾಧಿಸಿರುವ ಗೆಲುವುಗಳನ್ನು ಉಲ್ಲೇಖಿಸಿರುವ ಸಂಘಟನೆ, ಒಡಿಶಾದಲ್ಲೂ ತನ್ನ ವ್ಯಾಪ್ತಿ ನಿರಂತರವಾಗಿ ವಿಸ್ತರಿಸುತ್ತಿರುವುದಾಗಿ ತಿಳಿಸಿದೆ.
ವಿದ್ಯಾರ್ಥಿಗಳ ವಿಶ್ವಾಸವೇ ನಮ್ಮ ಅತಿ ದೊಡ್ಡ ಶಕ್ತಿ: ಮುಖಂಡರು
ಈ ಕುರಿತು ಪ್ರತಿಕ್ರಿಯಿಸಿರುವ ಎಬಿವಿಪಿ ರಾಷ್ಟ್ರೀಯ ಕಾರ್ಯದರ್ಶಿ ಶ್ರವಣ್ ಬಿ. ರಾಜ, ಕಾಂಗ್ರೆಸ್ ಮತ್ತು ಬಿಜು ಜನತಾದಳದ ರಾಜಕೀಯ ಪ್ರೇರಿತ ಧೋರಣೆಯ ವಿರುದ್ಧ ತಾವು ಹೋರಾಡುತ್ತಿರುವುದಾಗಿ ತಿಳಿಸಿದ್ದಾರೆ. ಕೇವಲ ರಾಜಕೀಯ ಲೆಕ್ಕಾಚಾರಗಳಿಂದ ಮಾತ್ರ ವಿದ್ಯಾರ್ಥಿ ರಾಜಕಾರಣದಲ್ಲಿ ಗೆಲುವು ಸಾಧಿಸಲು ಸಾಧ್ಯವಿಲ್ಲ ಎಂಬುದಕ್ಕೆ ಎನ್‌ಎಸ್‌ಯುಐ ಮತ್ತು ಬಿಸಿಜೆಡಿ ಪಕ್ಷಗಳು ಅಭ್ಯರ್ಥಿಗಳನ್ನು ನಿಲ್ಲಿಸಲು ವಿಫಲವಾಗಿರುವುದೇ ಸಾಕ್ಷಿಯಾಗಿದೆ ಎಂದಿದ್ದಾರೆ.
ವಿದ್ಯಾರ್ಥಿಗಳ ಸಮಸ್ಯೆಗಳಿಗೆ ಸ್ಪಂದಿಸದೆ ಕೇವಲ ಚುನಾವಣೆ ಸಂದರ್ಭದಲ್ಲಿ ಮಾತ್ರ ತಲೆಹಾಕುವ ಇತರ ಸಂಘಟನೆಗಳಿಗಿಂತ ಭಿನ್ನವಾಗಿ, ಎಬಿವಿಪಿ ಕಾರ್ಯಕರ್ತರು ವರ್ಷಪೂರ್ತಿ ಕ್ಯಾಂಪಸ್‌ನಲ್ಲಿ ಸಕ್ರಿಯವಾಗಿರುತ್ತಾರೆ ಎಂದು ಅವರು ಹೇಳಿದರು.
ಒಡಿಶಾ ಪೂರ್ವ ಪ್ರಾಂತದ ಕಾರ್ಯದರ್ಶಿ ದೀಪ್ತಿಮಯಿ ಪ್ರತಿಹಾರಿ ಮಾತನಾಡಿ, “ವಿದ್ಯಾರ್ಥಿಗಳ ನಿರಂತರ ಬೆಂಬಲ ಮತ್ತು ಅವರ ಹಕ್ಕುಗಳಿಗಾಗಿ ನಮ್ಮ ಕಾರ್ಯಕರ್ತರು ನಡೆಸಿದ ನಿರಂತರ ಪರಿಶ್ರಮವೇ ಈ ಗೆಲುವಿಗೆ ಕಾರಣ. ವಿದ್ಯಾರ್ಥಿಗಳ ವಿಶ್ವಾಸವೇ ನಮ್ಮ ಅತಿ ದೊಡ್ಡ ಶಕ್ತಿಯಾಗಿದೆ” ಎಂದು ಹರ್ಷ ವ್ಯಕ್ತಪಡಿಸಿದರು.
13 ಅಂಶಗಳ ‘ಸಂಕಲ್ಪ ಪತ್ರ’ ಬಿಡುಗಡೆ
ಚುನಾವಣೆಯ ಹಿನ್ನೆಲೆಯಲ್ಲಿ ಅಕ್ಟೋಬರ್ 11 ರಂದು ಎಬಿವಿಪಿ 2026-27ನೇ ಶೈಕ್ಷಣಿಕ ವರ್ಷಕ್ಕಾಗಿ ೧೩ ಅಂಶಗಳ ‘ವಿದ್ಯಾರ್ಥಿ ಸಂಕಲ್ಪ ಪತ್ರ’ವನ್ನು (ಚುನಾವಣಾ ಪ್ರಣಾಳಿಕೆ) ಬಿಡುಗಡೆ ಮಾಡಿದೆ. ಭುವನೇಶ್ವರದಲ್ಲಿ ನಡೆದ ಸುದ್ದಿಗೋಷ್ಟಿಯಲ್ಲಿ ಎಬಿವಿಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಡಾ. ವೀರೇಂದ್ರ ಸಿಂಗ್ ಸೋಲಂಕಿ ಈ ಪ್ರಣಾಳಿಕೆಯನ್ನು ಘೋಷಿಸಿದರು.
ಗುಣಮಟ್ಟದ ಶಿಕ್ಷಣ, ಉದ್ಯೋಗಾಧಾರಿತ ಕಲಿಕೆ, ಮಹಿಳಾ ಸುರಕ್ಷತೆ, ಸಕಾಲದಲ್ಲಿ ಪರೀಕ್ಷೆ ಹಾಗೂ ಫಲಿತಾಂಶ ಪ್ರಕಟಣೆ, ವಿದ್ಯಾರ್ಥಿವೇತನ, ಕೈಗೆಟುಕುವ ಸಾರಿಗೆ ವ್ಯವಸ್ಥೆ ಮತ್ತು ಆರೋಗ್ಯ ಸೌಲಭ್ಯಗಳಿಗೆ ಈ ಸಂಕಲ್ಪ ಪತ್ರದಲ್ಲಿ ಹೆಚ್ಚಿನ ಒತ್ತು ನೀಡಲಾಗಿದೆ. ಒಡಿಶಾದ ಶಿಕ್ಷಣ ಕ್ಷೇತ್ರದಲ್ಲಿ ವಿದ್ಯಾರ್ಥಿ ಸ್ನೇಹಿ ವಾತಾವರಣ ನಿರ್ಮಿಸಲು ತಾವು ಬದ್ಧವಾಗಿರುವುದಾಗಿ ಸಂಘಟನೆ ಪುನರುಚ್ಚರಿಸಿದೆ.
ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122
