ಭವಿಷ್ಯದ ತಂತ್ರಜ್ಞಾನಗಳನ್ನು ಸೃಷ್ಟಿಸುವಲ್ಲಿ ಭಾರತವೇ ಜಗತ್ತಿಗೆ ನಾಯಕತ್ವ ವಹಿಸಬೇಕು, ಕೇವಲ ಅನುಸರಿಸುವ ದೇಶವಾಗಬಾರದು: ವಿಜ್ಞಾನ ಸಮಾವೇಶದಲ್ಲಿ ಪ್ರಧಾನಿ ಮೋದಿ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ಅಕ್ಟೋಬರ್ 27ರಂದು ನವದೆಹಲಿಯ ಭಾರತ್ ಮಂಟಪದಲ್ಲಿ ಮೂರು ದಿನಗಳ ‘ಎಮರ್ಜಿಂಗ್ ಸೈನ್ಸ್, ಟೆಕ್ನಾಲಜಿ ಆ್ಯಂಡ್ ಇನೋವೇಶನ್ ಕಾನ್‌ಕ್ಲೇವ್‌ (ESTIC) 2026’ ಅನ್ನು ಉದ್ಘಾಟಿಸಿದರು. ಸಮಾವೇಶವನ್ನುದ್ದೇಶಿಸಿ ಮಾತನಾಡಿದ ಅವರು, ಅದೇ ದಿನ ಬೆಳಗ್ಗೆ ಸ್ಟಾರ್ಟ್‌ಅಪ್ ಸಂಸ್ಥಾಪಕರೊಂದಿಗೆ ನಡೆಸಿದ ಸಂವಾದದ ಬಗ್ಗೆ ಸಂತಸ ವ್ಯಕ್ತಪಡಿಸಿದರು. ದೇಶದ ಯುವಜನರ ವಿಶಾಲ ದೃಷ್ಟಿಕೋನ ಮತ್ತು ಧೈರ್ಯಶಾಲಿ ಸಂಕಲ್ಪವನ್ನು ಶ್ಲಾಘಿಸಿದರು.

“ಭಾರತದ ಯುವಜನರು ಯೋಚಿಸುತ್ತಿರುವ ರೀತಿಯಲ್ಲಿನ ವ್ಯಾಪಕತೆ ಮತ್ತು ಅವರು ಮುನ್ನಡೆಯುತ್ತಿರುವ ಆತ್ಮವಿಶ್ವಾಸ ಪ್ರೋತ್ಸಾಹದಾಯಕವಾಗಿದೆ” ಎಂದು ಮೋದಿ ಹೇಳಿದರು.

ಹಿಂದಿನ ಸಮಾವೇಶದಲ್ಲಿ ಭಾಗವಹಿಸಿದ್ದನ್ನು ಸ್ಮರಿಸಿದ ಪ್ರಧಾನಿ, ಹಿಂದೆ ಭಾರತವು ವಿದೇಶಿ ಆವಿಷ್ಕಾರಗಳನ್ನು ಹಲವು ವರ್ಷಗಳ ಬಳಿಕ ಅಳವಡಿಸಿಕೊಳ್ಳುವ ಅಥವಾ ಮಾರ್ಪಡಿಸಿಕೊಳ್ಳುವ ಮೂಲಕ ಮುನ್ನಡೆಯಲು ಪ್ರಯತ್ನಿಸುತ್ತಿತ್ತು. ಆದರೆ, 21ನೇ ಶತಮಾನದ ಭಾರತವು ತನ್ನದೇ ಆದ ತಂತ್ರಜ್ಞಾನಗಳನ್ನು ಅಭಿವೃದ್ಧಿಪಡಿಸುವುದು, ಜಾಗತಿಕ ದಿಕ್ಕನ್ನು ನಿರ್ಧರಿಸುವುದು ಮತ್ತು ಜಗತ್ತಿನ ಸವಾಲುಗಳಿಗೆ ಪರಿಹಾರ ಕಂಡುಕೊಳ್ಳುವುದನ್ನು ಗುರಿಯಾಗಿಸಿಕೊಂಡಿದೆ ಎಂದು ವಿವರಿಸಿದರು.

ಭಾರತವು ತನ್ನದೇ ಆದ ಕೋವಿಡ್‌-19 ಲಸಿಕೆಗಳನ್ನು ಅಭಿವೃದ್ಧಿಪಡಿಸಿ ದೇಶದ ಜನರಿಗೆ ಲಸಿಕೆ ನೀಡಿದ್ದಲ್ಲದೆ, ಇತರ ದೇಶಗಳಿಗೂ ಪೂರೈಸಿದ್ದನ್ನು ಅವರು ಉಲ್ಲೇಖಿಸಿದರು. ಮೊದಲ ಪ್ರಯತ್ನದಲ್ಲೇ ಮಂಗಳ ಗ್ರಹವನ್ನು ತಲುಪಿದ್ದು ಮತ್ತು ಚಂದ್ರನ ಅನ್ವೇಷಿಸದ ದಕ್ಷಿಣ ಧ್ರುವ ಪ್ರದೇಶದಲ್ಲಿ ಯಶಸ್ವಿಯಾಗಿ ಇಳಿದಿದ್ದನ್ನೂ ಸ್ಮರಿಸಿದರು.

“ಭಾರತವು ಭವಿಷ್ಯದ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳಬೇಕು, ಧೈರ್ಯದಿಂದ ಹೊಸ ಆವಿಷ್ಕಾರಗಳನ್ನು ಮಾಡಬೇಕು ಮತ್ತು ಅವುಗಳನ್ನು ಸೃಷ್ಟಿಸುವಲ್ಲಿ ಜಗತ್ತಿಗೆ ನಾಯಕತ್ವ ವಹಿಸಬೇಕು” ಎಂದು ಪ್ರಧಾನಿ ಮೋದಿ ಪ್ರತಿಪಾದಿಸಿದರು.

ವಿಜ್ಞಾನದಲ್ಲಿ ಭಾರತದ ಪರಂಪರೆ ಮತ್ತು ಹೊಸ ಸಾಧನೆಗಳು

ಶೂನ್ಯದ ಆವಿಷ್ಕಾರ, ಸಂಖ್ಯಾ ಪದ್ಧತಿ ಮತ್ತು ಖಗೋಳ ವಿಜ್ಞಾನ ಸೇರಿದಂತೆ ಸಂಶೋಧನೆಯ ಶ್ರೀಮಂತ ಪರಂಪರೆಯನ್ನು ಹೊಂದಿರುವ ಭಾರತವು ಆಧುನಿಕ ತಂತ್ರಜ್ಞಾನ ಮತ್ತು ಹೊಸ ಆತ್ಮವಿಶ್ವಾಸದೊಂದಿಗೆ ವೈಜ್ಞಾನಿಕ ಪರಂಪರೆಯನ್ನು ಮುಂದುವರಿಸುತ್ತಿದೆ ಎಂದು ಪ್ರಧಾನಿ ಹೇಳಿದರು. ಕಳೆದ ಒಂದು ವರ್ಷದಲ್ಲಿ ಸಾಧಿಸಿದ ಹಲವು ಮೈಲಿಗಲ್ಲುಗಳು ಇದಕ್ಕೆ ಸಾಕ್ಷಿಯಾಗಿವೆ ಎಂದರು.

ಅಕ್ಟೋಬರ್ 30ರಂದು ಡಾ. ಹೋಮಿ ಜಹಾಂಗೀರ್ ಭಾಭಾ ಅವರ ಜನ್ಮದಿನವನ್ನು ಆಚರಿಸಲಿರುವ ಹಿನ್ನೆಲೆಯಲ್ಲಿ, ಇತ್ತೀಚಿನ ಸಾಧನೆಗಳ ಕುರಿತು ಮಾತನಾಡುವಾಗ ಅವರು ಮೊದಲು ಅಣುಶಕ್ತಿ ಕ್ಷೇತ್ರವನ್ನು ಪ್ರಸ್ತಾಪಿಸಿದರು.

“ಆದ್ದರಿಂದ, ನಾವು ಅಣುಶಕ್ತಿಯಿಂದಲೇ ಆರಂಭಿಸೋಣ” ಎಂದು ಮೋದಿ ಹೇಳಿದರು.

ವಿಕಸಿತ ಭಾರತ ನಿರ್ಮಾಣಕ್ಕೆ ಬೃಹತ್ ಪ್ರಮಾಣದ ಅಣುಶಕ್ತಿ ಸಾಮರ್ಥ್ಯ ಅಗತ್ಯವಿದೆ. ಆದರೆ, ಆಮದು ಮಾಡಿಕೊಳ್ಳುವ ಅಣು ಇಂಧನದ ಮೇಲಿನ ಅವಲಂಬನೆಯು ಇಂಧನ ಭದ್ರತೆಗೆ ಸವಾಲಾಗಿದೆ ಎಂದು ಅವರು ತಿಳಿಸಿದರು. ಈ ಹಿನ್ನೆಲೆಯಲ್ಲಿ ಭಾರತವು ಫಾಸ್ಟ್‌ ಬ್ರೀಡರ್‌ ರಿಯಾಕ್ಟರ್‌ ತಂತ್ರಜ್ಞಾನವನ್ನು ತ್ವರಿತವಾಗಿ ಅಭಿವೃದ್ಧಿಪಡಿಸುತ್ತಿದೆ ಎಂದರು.

ಕೆಲವು ತಿಂಗಳ ಹಿಂದೆ, ದೇಶೀಯವಾಗಿ ನಿರ್ಮಿಸಲಾದ 500 ಮೆಗಾವ್ಯಾಟ್ ಸಾಮರ್ಥ್ಯದ ಪ್ರೊಟೊಟೈಪ್ ಫಾಸ್ಟ್‌ ಬ್ರೀಡರ್‌ ರಿಯಾಕ್ಟರ್‌ ಯಶಸ್ವಿಯಾಗಿ ‘ಫಸ್ಟ್ ಕ್ರಿಟಿಕಾಲಿಟಿ’ ಹಂತವನ್ನು ತಲುಪಿದೆ ಎಂದು ಅವರು ಹೇಳಿದರು.

“ಅಣುಶಕ್ತಿ ಕ್ಷೇತ್ರದಲ್ಲಿ ನಮ್ಮ ದೀರ್ಘಕಾಲೀನ ಸಾಮರ್ಥ್ಯವನ್ನು ಬಲಪಡಿಸುವ ನಿಟ್ಟಿನಲ್ಲಿ ಇದೊಂದು ಮಹತ್ವದ ಹೆಜ್ಜೆಯಾಗಿದೆ” ಎಂದು ಪ್ರಧಾನಿ ತಿಳಿಸಿದರು.

ವಿದ್ಯುತ್ ಭದ್ರತೆ ಮತ್ತು ತಂತ್ರಜ್ಞಾನದಲ್ಲಿ ಸ್ವಾವಲಂಬನೆ ಸಾಧಿಸುವುದಷ್ಟೇ ಭಾರತದ ಗುರಿಯಲ್ಲ; ನಿರ್ಣಾಯಕ ತಂತ್ರಜ್ಞಾನಗಳ ಕ್ಷೇತ್ರದಲ್ಲಿಯೂ ತನ್ನ ಸಾಮರ್ಥ್ಯವನ್ನು ವಿಸ್ತರಿಸುವ ಉದ್ದೇಶವಿದೆ ಎಂದು ಮೋದಿ ಹೇಳಿದರು.

ಈ ವರ್ಷದ ಬಾಹ್ಯಾಕಾಶ ಕ್ಷೇತ್ರದ ಸಾಧನೆಗಳನ್ನು ಉಲ್ಲೇಖಿಸಿದ ಅವರು, ಭಾರತದಲ್ಲಿ ತಯಾರಿಸಿದ ರಾಕೆಟ್‌ ಬಳಸಿ ದೇಶದ ಬಾಹ್ಯಾಕಾಶ ಸ್ಟಾರ್ಟ್‌ಅಪ್‌ವೊಂದು ಮೊದಲ ಪ್ರಯತ್ನದಲ್ಲೇ ಉಪಗ್ರಹವನ್ನು ಕಕ್ಷೆಗೆ ಸೇರಿಸಿದೆ ಎಂದರು. ಉಪಗ್ರಹಗಳ ಡಾಕಿಂಗ್‌ ಸಾಮರ್ಥ್ಯವನ್ನೂ ಭಾರತ ಸಾಧಿಸಿದೆ ಎಂದು ತಿಳಿಸಿದರು. ಅನೇಕ ದೇಶೀಯ ಸ್ಟಾರ್ಟ್‌ಅಪ್‌ಗಳು ಹೊಸ ಬಾಹ್ಯಾಕಾಶ ವಿಜ್ಞಾನ ಪರಿಹಾರಗಳನ್ನು ಅಭಿವೃದ್ಧಿಪಡಿಸುತ್ತಿದ್ದು, ಯುವ ವಿಜ್ಞಾನಿಗಳು ಮತ್ತು ಉದ್ಯಮಿಗಳ ಪಾಲ್ಗೊಳ್ಳುವಿಕೆಯೂ ಹೆಚ್ಚುತ್ತಿದೆ ಎಂದರು.

“ನಿರ್ಣಾಯಕ ತಂತ್ರಜ್ಞಾನಗಳ ಕ್ಷೇತ್ರದಲ್ಲಿ ನಮ್ಮ ಸಾಮರ್ಥ್ಯವನ್ನು ವಿಸ್ತರಿಸುವುದೂ ನಮ್ಮ ಗುರಿಯಾಗಿದೆ” ಎಂದು ಪ್ರಧಾನಿ ಹೇಳಿದರು.

ಕೃತಕ ಬುದ್ಧಿಮತ್ತೆ (AI), ಅರೆವಾಹಕಗಳು (Semiconductors), ಅಣುಶಕ್ತಿ ಮತ್ತು ಬಾಹ್ಯಾಕಾಶ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ಭಾರತ ಸಾಧಿಸುತ್ತಿರುವ ಪ್ರಗತಿ ಹಿಂದೆಂದೂ ಕಾಣದಂಥದ್ದು ಎಂದು ಅವರು ಹೇಳಿದರು. ಈ ವರ್ಷ ಭಾರತವು ಎಐ ಇಂಪ್ಯಾಕ್ಟ್‌ ಶೃಂಗಸಭೆಯನ್ನು ಆಯೋಜಿಸಿದೆ, ತನ್ನದೇ ಆದ ಎಐ ಮಾದರಿಯನ್ನು ಅಭಿವೃದ್ಧಿಪಡಿಸಿದೆ ಮತ್ತು ಭಾರತದಲ್ಲಿ ತಯಾರಾದ ಅರೆವಾಹಕ ಚಿಪ್‌ಗಳನ್ನು ಜಗತ್ತಿಗೆ ರವಾನಿಸಲು ಆರಂಭಿಸಿದೆ ಎಂದು ತಿಳಿಸಿದರು.

ದೇಶೀಯವಾಗಿ ಲಭ್ಯವಿರುವ ಕಚ್ಚಾ ವಸ್ತುಗಳನ್ನು ಆಧರಿಸಿ ಬ್ಯಾಟರಿ ಸಂಗ್ರಹ ಸಾಮರ್ಥ್ಯವನ್ನು ಅಭಿವೃದ್ಧಿಪಡಿಸುವ ಕೆಲಸವೂ ನಡೆಯುತ್ತಿದೆ ಎಂದರು.

“ಭಾರತವು ಯಶಸ್ಸು ಸಾಧಿಸುತ್ತಿರುವ ವಿವಿಧ ಕ್ಷೇತ್ರಗಳ ವ್ಯಾಪ್ತಿ ಹಿಂದೆಂದೂ ಕಾಣದಂಥದ್ದಾಗಿದೆ” ಎಂದು ಮೋದಿ ಹೇಳಿದರು.

ಜನರಿಗೆ ತಲುಪುವ ಸುರಕ್ಷಿತ ತಂತ್ರಜ್ಞಾನಗಳ ಅಭಿವೃದ್ಧಿ

ಅಣುಶಕ್ತಿ, ಬಾಹ್ಯಾಕಾಶ, ಎಐ ಮತ್ತು ಅರೆವಾಹಕಗಳಂತಹ ಕ್ಷೇತ್ರಗಳ ಅಗತ್ಯಗಳು ವಿಭಿನ್ನವಾಗಿದ್ದರೂ, ಅವುಗಳಲ್ಲಿ ಭಾರತ ಸಾಧಿಸುತ್ತಿರುವ ಪ್ರಗತಿಯು ಉದಯೋನ್ಮುಖ ತಂತ್ರಜ್ಞಾನಗಳ ಬಗ್ಗೆ ದೇಶದ ಹೆಚ್ಚುತ್ತಿರುವ ಸಾಮರ್ಥ್ಯ ಮತ್ತು ಆತ್ಮವಿಶ್ವಾಸವನ್ನು ತೋರಿಸುತ್ತದೆ ಎಂದು ಪ್ರಧಾನಿ ಹೇಳಿದರು.

ದೇಶದಲ್ಲಿ ಅಭಿವೃದ್ಧಿಪಡಿಸಿದ ಆವಿಷ್ಕಾರಗಳು ಜಾಗತಿಕ ಸವಾಲುಗಳಿಗೆ ಪರಿಹಾರವಾಗುವಂತೆ, ಅವುಗಳನ್ನು ದೊಡ್ಡ ಪ್ರಮಾಣದಲ್ಲಿ ಜನರಿಗೆ ತಲುಪಿಸುವ ಭಾರತದ ಸಾಮರ್ಥ್ಯವನ್ನು ಅವರು ವಿಶೇಷವಾಗಿ ಪ್ರಸ್ತಾಪಿಸಿದರು.

ಡಿಜಿಟಲ್ ಸ್ಟ್ಯಾಕ್‌ ಮತ್ತು ದೇಶೀಯವಾಗಿ ಅಭಿವೃದ್ಧಿಪಡಿಸಿದ 5G ತಂತ್ರಜ್ಞಾನದ ಯಶಸ್ಸನ್ನು ಉಲ್ಲೇಖಿಸಿದ ಅವರು, ಸುರಕ್ಷಿತ ಮತ್ತು ಬೃಹತ್ ಜನಸಂಖ್ಯೆಗೆ ಉಪಯುಕ್ತವಾಗುವ ವೇದಿಕೆಗಳನ್ನು ನಿರ್ಮಿಸುವ ಪ್ರಯತ್ನ ಮುಂದುವರಿದಿದೆ ಎಂದರು.

“ದೊಡ್ಡ ಪ್ರಮಾಣದಲ್ಲಿ ಜನರನ್ನು ತಲುಪಬಲ್ಲ ಸುರಕ್ಷಿತ ಪರಿಹಾರಗಳನ್ನು ಅಭಿವೃದ್ಧಿಪಡಿಸುವ ದಿಕ್ಕಿನಲ್ಲಿ ಭಾರತ ಮುನ್ನಡೆಯುತ್ತಿದೆ” ಎಂದು ಮೋದಿ ತಿಳಿಸಿದರು.

ವಿಜ್ಞಾನ ಮತ್ತು ತಂತ್ರಜ್ಞಾನವನ್ನು ಹಿಂದೆ ಆಯುಧಗಳಂತೆ ಪರಿಗಣಿಸಲಾಗುತ್ತಿತ್ತು. ಆದರೆ, ಅವುಗಳನ್ನು ಮಾನವಕುಲದ ಸೇವೆಗೆ ಬಳಸಬೇಕು ಎಂಬುದು ಭಾರತದ ದೃಷ್ಟಿಕೋನವಾಗಿದೆ ಎಂದು ಪ್ರಧಾನಿ ಹೇಳಿದರು.

ಪ್ರಯೋಗಾಲಯದೊಳಗೆ ಸೀಮಿತವಾಗದೆ, ಸಾಮಾನ್ಯ ಜನರ ಬದುಕನ್ನು ಸುಧಾರಿಸುವುದು, ದೊಡ್ಡ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುವುದು ಹಾಗೂ ಆರೋಗ್ಯ ಸೇವೆ, ಕೃಷಿ, ಶಿಕ್ಷಣ, ಉದ್ಯೋಗ ಮತ್ತು ವಿಪತ್ತುಗಳನ್ನು ಎದುರಿಸುವ ಸಾಮರ್ಥ್ಯವನ್ನು ಬಲಪಡಿಸುವುದೇ ನಿಜವಾದ ವೈಜ್ಞಾನಿಕ ಯಶಸ್ಸು ಎಂದು ಅವರು ವಿವರಿಸಿದರು.

ಭಾರತೀಯ ಸ್ಟಾರ್ಟ್‌ಅಪ್‌ಗಳು ಈ ಕ್ಷೇತ್ರಗಳಿಗೆ ಆದ್ಯತೆ ನೀಡುತ್ತಿರುವುದಕ್ಕೆ ಅವರು ಸಂತಸ ವ್ಯಕ್ತಪಡಿಸಿದರು. ಮೆದುಳಿನ ಚಟುವಟಿಕೆಯನ್ನು ಅರ್ಥಮಾಡಿಕೊಳ್ಳಲು ನೆರವಾಗುವ ಧರಿಸಬಹುದಾದ ಇಇಜಿ ತಂತ್ರಜ್ಞಾನ, ದೇಶೀಯ ವೈರ್‌ಲೆಸ್ ಮತ್ತು ಉಪಗ್ರಹ ಸಂವಹನ ವ್ಯವಸ್ಥೆಗಳು, ವಿಶೇಷ ಪೌಷ್ಟಿಕ ಉತ್ಪನ್ನಗಳು, ಹೊಸ ಅರೆವಾಹಕ ತಂತ್ರಜ್ಞಾನಗಳು ಮತ್ತು ಉಕ್ಕಿನ ತ್ಯಾಜ್ಯವಾದ ಸ್ಲ್ಯಾಗ್‌ ಸೇರಿದಂತೆ ಕೈಗಾರಿಕಾ ತ್ಯಾಜ್ಯವನ್ನು ಬಳಸಿಕೊಳ್ಳುವ ಪರಿಹಾರಗಳನ್ನು ಅಭಿವೃದ್ಧಿಪಡಿಸುತ್ತಿರುವ ಸ್ಟಾರ್ಟ್‌ಅಪ್‌ಗಳು ಹಾಗೂ ದೇಶೀಯ ಕಂಪನಿಗಳನ್ನು ಅವರು ಉಲ್ಲೇಖಿಸಿದರು.

“ವಿಜ್ಞಾನವು ಪ್ರಯೋಗಾಲಯದಿಂದ ಹೊರಬಂದು ಸಾಮಾನ್ಯ ನಾಗರಿಕರ ಜೀವನವನ್ನು ಉತ್ತಮಗೊಳಿಸಿದಾಗಲೇ ಅದರ ನಿಜವಾದ ಯಶಸ್ಸು ಸಿಗುತ್ತದೆ” ಎಂದು ಪ್ರಧಾನಿ ಹೇಳಿದರು.

ಸಮಾಜಕ್ಕಾಗಿ ವಿಜ್ಞಾನ, ಪರಿವರ್ತನೆಗಾಗಿ ತಂತ್ರಜ್ಞಾನ

ಚೆನ್ನೈನ ಐಐಟಿ ಮದ್ರಾಸ್‌ಗೆ ಇತ್ತೀಚೆಗೆ ಭೇಟಿ ನೀಡಿದ್ದನ್ನು ಸ್ಮರಿಸಿದ ಪ್ರಧಾನಿ, ಅಲ್ಲಿ ಆಧುನಿಕ ‘ಬ್ರೇನ್ ಸೆಂಟರ್‌’ ಅನ್ನು ಉದ್ಘಾಟಿಸಿದ್ದಾಗಿ ಹೇಳಿದರು. ಈ ಕೇಂದ್ರವು ಮಾನವ ಮೆದುಳಿನ ಉನ್ನತ-ವಿವರದ ಡಿಜಿಟಲ್‌ 3D ಚಿತ್ರಗಳನ್ನು ಸೃಷ್ಟಿಸಲು ಮತ್ತು ಸಂಕೀರ್ಣ ನರಸಂಬಂಧಿ ಕಾಯಿಲೆಗಳನ್ನು ಅರ್ಥಮಾಡಿಕೊಳ್ಳಲು ನೆರವಾಗುವ, ಜಾಗತಿಕ ಮಟ್ಟದಲ್ಲಿ ಮಾದರಿಯಾಗಬಲ್ಲ ಮೆದುಳಿನ ಚಿತ್ರಣ ತಂತ್ರಜ್ಞಾನ ವೇದಿಕೆಯನ್ನು ರೂಪಿಸಿದೆ ಎಂದು ತಿಳಿಸಿದರು.

‘ಸಮಾಜಕ್ಕಾಗಿ ವಿಜ್ಞಾನ’ (Science for Society) ಮತ್ತು ‘ಪರಿವರ್ತನೆಗಾಗಿ ತಂತ್ರಜ್ಞಾನ’ (Technology for Transformation) ಎಂಬ ತತ್ವಗಳೇ ವೈಜ್ಞಾನಿಕ ಪ್ರಗತಿಯನ್ನು ಅಳೆಯುವ ಅಂತಿಮ ಮಾನದಂಡಗಳಾಗಿರಬೇಕು ಎಂದು ಅವರು ಹೇಳಿದರು.

“ಈ ಮಾನದಂಡದ ಆಧಾರದಲ್ಲೇ ಭಾರತ ಮುನ್ನಡೆಯುತ್ತಿದೆ” ಎಂದು ಮೋದಿ ತಿಳಿಸಿದರು.

ಸಂಶೋಧನೆ ಮತ್ತು ಆವಿಷ್ಕಾರಕ್ಕೆ ಹೆಚ್ಚಿನ ಹೂಡಿಕೆ

ನಿರ್ಣಾಯಕ ತಂತ್ರಜ್ಞಾನಗಳಲ್ಲಿ ದೇಶವು ಹೊಸ ತಂತ್ರಜ್ಞಾನಗಳನ್ನು ಸೃಷ್ಟಿಸುವ ಸಾಮರ್ಥ್ಯ ಮತ್ತು ಸ್ವಾವಲಂಬನೆಯನ್ನು ಹೊಂದಲು ಬಲಿಷ್ಠ ಸಂಶೋಧನಾ ವ್ಯವಸ್ಥೆ ಅಗತ್ಯ ಎಂದು ಪ್ರಧಾನಿ ಹೇಳಿದರು. ಇದೇ ‘ಜೈ ವಿಜ್ಞಾನ್‌, ಜೈ ಅನುಸಂಧಾನ್‌’ ಎಂಬ ತಮ್ಮ ಘೋಷಣೆಯ ಹಿಂದಿನ ಆಶಯವಾಗಿದೆ ಎಂದರು.

‘ಅನುಸಂಧಾನ್‌ ರಾಷ್ಟ್ರೀಯ ಸಂಶೋಧನಾ ಪ್ರತಿಷ್ಠಾನ’ದ ಕಾರ್ಯಗಳು ವೇಗ ಪಡೆದುಕೊಳ್ಳುತ್ತಿರುವುದನ್ನು ಅವರು ಉಲ್ಲೇಖಿಸಿದರು. ಕಳೆದ ವರ್ಷ ಇದೇ ವೇದಿಕೆಯಲ್ಲಿ ಸಂಶೋಧನೆ, ಅಭಿವೃದ್ಧಿ ಮತ್ತು ಆವಿಷ್ಕಾರಕ್ಕಾಗಿ ₹1 ಲಕ್ಷ ಕೋಟಿ ಒದಗಿಸುವುದಾಗಿ ನೀಡಿದ್ದ ಭರವಸೆಯನ್ನೂ ಸ್ಮರಿಸಿದರು.

ಮಾರುಕಟ್ಟೆಗೆ ಸಿದ್ಧವಾಗಿರುವ ಪ್ರಯೋಗಾಲಯ ತಂತ್ರಜ್ಞಾನಗಳ ಅಭಿವೃದ್ಧಿಗಾಗಿ ಕಳೆದ ಒಂದು ವರ್ಷದಲ್ಲಿ ಸರ್ಕಾರವು ₹12,000 ಕೋಟಿ ಒದಗಿಸಿದ್ದು, ಖಾಸಗಿ ಹೂಡಿಕೆದಾರರೂ ಅಷ್ಟೇ ಮೊತ್ತದ ₹12,000 ಕೋಟಿ ಹೂಡಿಕೆ ಮಾಡಿದ್ದಾರೆ ಎಂದು ಅವರು ತಿಳಿಸಿದರು.

“ಅಂದರೆ, ಕೇವಲ ಒಂದು ವರ್ಷದಲ್ಲಿ ಸಂಶೋಧನೆ ಮತ್ತು ಅಭಿವೃದ್ಧಿಗಾಗಿ ಒಟ್ಟು ₹24,000 ಕೋಟಿಯ ಹೊಸ ಬದ್ಧತೆ ವ್ಯಕ್ತವಾಗಿದೆ” ಎಂದು ಪ್ರಧಾನಿ ಹೇಳಿದರು.

ದೇಶೀಯ ಸಂಶೋಧನಾ ವ್ಯವಸ್ಥೆ ವಿಸ್ತರಿಸುತ್ತಿರುವುದನ್ನು ವಿವರಿಸಿದ ಅವರು, ಕಳೆದ ಹತ್ತು ವರ್ಷಗಳಲ್ಲಿ ಬೌದ್ಧಿಕ ಸ್ವತ್ತಿನ ಸೃಷ್ಟಿಯಲ್ಲಿ ಗಣನೀಯ ಏರಿಕೆಯಾಗಿದೆ ಎಂದರು. ಹತ್ತು ವರ್ಷಗಳ ಹಿಂದೆ ವರ್ಷಕ್ಕೆ 50,000ಕ್ಕಿಂತ ಕಡಿಮೆ ಇದ್ದ ಪೇಟೆಂಟ್‌ ಅರ್ಜಿಗಳ ಸಂಖ್ಯೆ, ಕಳೆದ ವರ್ಷ ಸುಮಾರು 1.5 ಲಕ್ಷಕ್ಕೆ ಏರಿದೆ ಎಂದು ತಿಳಿಸಿದರು.

ಇದು ಕೇವಲ ಸಂಖ್ಯೆಗಳ ಹೆಚ್ಚಳವಲ್ಲ; ಭಾರತದಲ್ಲಿ ಸಂಶೋಧನೆ ಮತ್ತು ಆವಿಷ್ಕಾರಗಳು ಬಲಿಷ್ಠ ಸಂಸ್ಕೃತಿಯಾಗಿ ರೂಪುಗೊಳ್ಳುತ್ತಿರುವುದರ ಸಂಕೇತವಾಗಿದೆ ಎಂದು ಅವರು ಹೇಳಿದರು.

ಎಐ ನೀಡುವ ಉತ್ತರಗಳ ಸತ್ಯಾಸತ್ಯತೆಯನ್ನು ವಿಜ್ಞಾನಿಗಳೇ ಪರಿಶೀಲಿಸಬೇಕು

21ನೇ ಶತಮಾನದ ಎರಡನೇ ಕಾಲುಭಾಗದಲ್ಲಿ ಕೃತಕ ಬುದ್ಧಿಮತ್ತೆಯ ಯುಗದಲ್ಲಿ ವೈಜ್ಞಾನಿಕ ವಿವೇಚನೆ ಹೇಗೆ ರೂಪುಗೊಳ್ಳಬೇಕು ಎಂಬ ಮಹತ್ವದ ಪ್ರಶ್ನೆಯನ್ನು ಪ್ರಧಾನಿ ಮುಂದಿಟ್ಟರು.

ವೇದಿಕೆಯಲ್ಲಿದ್ದ ಪ್ರಮುಖ ಪ್ರಯೋಗಾಲಯ ವಿಜ್ಞಾನಿಗಳು ಮತ್ತು ನೊಬೆಲ್ ಪ್ರಶಸ್ತಿ ಪುರಸ್ಕೃತರು ಸಣ್ಣ ಸಮಸ್ಯೆಗಳನ್ನು ಪರಿಹರಿಸುವುದು, ಪ್ರಯೋಗಗಳನ್ನು ನಡೆಸುವುದು, ವೈಫಲ್ಯಗಳಿಂದ ಕಲಿಯುವುದು, ರೂಢಿಗತ ವಿಧಾನಗಳನ್ನು ಪ್ರಶ್ನಿಸುವುದು ಮತ್ತು ಇತರರು ಗಮನಿಸದ ವಿವರಗಳನ್ನು ಗುರುತಿಸುವುದರ ಮೂಲಕ ತಮ್ಮ ವೈಜ್ಞಾನಿಕ ಸಾಮರ್ಥ್ಯವನ್ನು ಬೆಳೆಸಿಕೊಂಡಿದ್ದಾರೆ ಎಂದು ಹೇಳಿದರು.

ಎಐ ಸಾಮಾನ್ಯ ಕಾರ್ಯಗಳನ್ನು ವೇಗವಾಗಿ ನಿರ್ವಹಿಸುವ ಮೂಲಕ ಉತ್ಪಾದಕತೆಯನ್ನು ಹೆಚ್ಚಿಸಬಲ್ಲದು. ಆದರೆ, ಅದು ಸ್ವತಂತ್ರ ಚಿಂತನೆಯನ್ನು ನಿರ್ಬಂಧಿಸುವ ಬದಲು ಅದನ್ನು ಇನ್ನಷ್ಟು ಬಲಪಡಿಸಬೇಕು ಎಂದು ಅವರು ಎಚ್ಚರಿಸಿದರು. ಎಐ ಮೂಲಕ ಉಳಿಯುವ ಸಮಯವನ್ನು ಸಂಶೋಧಕರು ಹೆಚ್ಚು ಸಂಕೀರ್ಣ ಸಮಸ್ಯೆಗಳನ್ನು ಪರಿಹರಿಸಲು, ಹೊಸ ಪ್ರಯೋಗಗಳನ್ನು ನಡೆಸಲು ಮತ್ತು ಆಲೋಚನೆಗಳ ಸಿಂಧುತ್ವವನ್ನು ಪರಿಶೀಲಿಸಲು ಬಳಸಬೇಕು ಎಂದರು.

“ಎಐ ನಮಗೆ ತ್ವರಿತವಾಗಿ ಉತ್ತರಗಳನ್ನು ನೀಡಬಹುದು. ಆದರೆ, ಆ ಉತ್ತರಗಳ ಸತ್ಯಾಸತ್ಯತೆಯನ್ನು ಪರೀಕ್ಷಿಸುವ ಜವಾಬ್ದಾರಿ ವಿಜ್ಞಾನಿಯದ್ದೇ ಆಗಿರಬೇಕು” ಎಂದು ಮೋದಿ ಪ್ರತಿಪಾದಿಸಿದರು.

ಭವಿಷ್ಯದ ತಂತ್ರಜ್ಞಾನಗಳಿಗೆ ರಾಷ್ಟ್ರೀಯ ಅಭಿಯಾನಗಳು

ಅರೆವಾಹಕಗಳು, ಕ್ವಾಂಟಮ್ ತಂತ್ರಜ್ಞಾನಗಳು, ಜೈವಿಕ ತಂತ್ರಜ್ಞಾನ, ಸುಧಾರಿತ ವಸ್ತುಗಳು, ರೊಬೊಟಿಕ್ಸ್‌, ಬಾಹ್ಯಾಕಾಶ, ಶುದ್ಧ ಇಂಧನ ಮತ್ತು ಮುಂದಿನ ತಲೆಮಾರಿನ ಸಂವಹನ ವ್ಯವಸ್ಥೆಗಳಂತಹ ಭವಿಷ್ಯ ರೂಪಿಸುವ ಕ್ಷೇತ್ರಗಳಲ್ಲಿ ವಿಜ್ಞಾನಿಗಳು ಮತ್ತು ಸಂಸ್ಥೆಗಳು ನಿರಂತರವಾಗಿ ಸಿದ್ಧತೆ ನಡೆಸಬೇಕು ಎಂದು ಪ್ರಧಾನಿ ಕರೆ ನೀಡಿದರು. ಈ ಕ್ಷೇತ್ರಗಳಲ್ಲಿ ಹೊಸ ಸಾಧನೆಗಳು ಭಾರತದಲ್ಲೇ ಮೂಡಿಬರುವಂತೆ ವಿಶೇಷ ರಾಷ್ಟ್ರೀಯ ಅಭಿಯಾನಗಳನ್ನು ಮುಂದುವರಿಸಬೇಕು ಎಂದರು.

ಕೃತಕ ಬುದ್ಧಿಮತ್ತೆ, ಸಂಶ್ಲೇಷಿತ ಜೀವಶಾಸ್ತ್ರ ಮತ್ತು ಸ್ವಾಯತ್ತ ವ್ಯವಸ್ಥೆಗಳಲ್ಲಿ ಸುರಕ್ಷತೆ ಹಾಗೂ ಭದ್ರತೆಗೆ ಆದ್ಯತೆ ನೀಡಬೇಕು ಎಂದು ಅವರು ಒತ್ತಿಹೇಳಿದರು.

ಎಐ ಯುಗದಲ್ಲಿ ಹಣಕಾಸು ಜಾಲಗಳು ಮತ್ತು ರಾಷ್ಟ್ರೀಯ ಭದ್ರತೆಗೆ ಎದುರಾಗಬಹುದಾದ ಹೊಸ ಸೈಬರ್‌ ಭದ್ರತಾ ಬೆದರಿಕೆಗಳನ್ನು ಉಲ್ಲೇಖಿಸಿದ ಅವರು, ದೇಶದ ವ್ಯವಸ್ಥೆಗಳನ್ನು ರಕ್ಷಿಸುವುದರ ಜೊತೆಗೆ ಮಾನವಕುಲಕ್ಕೆ ನೆರವಾಗುವ ಎಐ ಆಧಾರಿತ ಮತ್ತು ಕ್ವಾಂಟಮ್‌ ಭದ್ರತಾ ಪರಿಹಾರಗಳನ್ನು ಅಭಿವೃದ್ಧಿಪಡಿಸುವ ಅಗತ್ಯವಿದೆ ಎಂದರು.

“ಭಾರತಕ್ಕೆ ಶಕ್ತಿ ತುಂಬುವ ಜೊತೆಗೆ ಮಾನವಕುಲದ ಸಮಸ್ಯೆಗಳನ್ನು ಪರಿಹರಿಸಲು ನೆರವಾಗುವ ತಂತ್ರಜ್ಞಾನಗಳನ್ನು ಅಭಿವೃದ್ಧಿಪಡಿಸುವುದು ನಮ್ಮ ಗುರಿಯಾಗಿದೆ” ಎಂದು ಮೋದಿ ಹೇಳಿದರು.

ಮೂರು ವರ್ಷಗಳ ಗುರಿ ನಿಗದಿಪಡಿಸಲು ಕರೆ

ಸಮಾವೇಶದಲ್ಲಿ ಭಾಗವಹಿಸಿದ್ದ ಪ್ರತಿಯೊಬ್ಬ ಸಂಶೋಧಕ, ಉದ್ಯಮದ ನಾಯಕ, ಸ್ಟಾರ್ಟ್‌ಅಪ್‌ ಸಂಸ್ಥಾಪಕ ಮತ್ತು ವಿದ್ಯಾರ್ಥಿಯೂ ಮುಂದಿನ ಮೂರು ವರ್ಷಗಳಲ್ಲಿ ಯಾವ ತಂತ್ರಜ್ಞಾನ, ಮಾದರಿ, ಪ್ರಾಯೋಗಿಕ ಯೋಜನೆ ಅಥವಾ ಉತ್ಪನ್ನದ ಅಭಿವೃದ್ಧಿಗೆ ಕೊಡುಗೆ ನೀಡಲಿದ್ದಾರೆ ಎಂಬುದನ್ನು ಗುರುತಿಸಿ ಸ್ಪಷ್ಟ ಗುರಿ ನಿಗದಿಪಡಿಸಬೇಕು ಎಂದು ಪ್ರಧಾನಿ ಕರೆ ನೀಡಿದರು.

ವಿಕಸಿತ ಭಾರತ ನಿರ್ಮಾಣಕ್ಕೆ ನೆರವಾಗುವ ಮತ್ತು ಭಾರತವನ್ನು ಜಾಗತಿಕ ಪರಿಹಾರಗಳ ಕೇಂದ್ರವನ್ನಾಗಿ ರೂಪಿಸುವ ಆವಿಷ್ಕಾರಗಳಿಗೆ ಎಲ್ಲರೂ ಕೊಡುಗೆ ನೀಡಬೇಕು ಎಂದರು. ಈ ಸಮಾವೇಶವು ಕೇವಲ ಚರ್ಚೆಗಳಿಗೆ ಸೀಮಿತವಾಗದೆ, ಸ್ಪಷ್ಟ ಫಲಿತಾಂಶಗಳನ್ನು ನೀಡಬೇಕು ಎಂದು ಅವರು ಒತ್ತಿಹೇಳಿದರು.

“ಈ ಸಮಾವೇಶವು ಕೇವಲ ವಿಚಾರ ವಿನಿಮಯಕ್ಕೆ ಸೀಮಿತವಾಗದೆ, ಅಳೆಯಬಹುದಾದ ಫಲಿತಾಂಶಗಳನ್ನು ನೀಡುವ ವೇದಿಕೆಯಾಗಬೇಕು” ಎಂದು ಪ್ರಧಾನಿ ಹೇಳಿದರು.

ಭಾರತವು ವಿಶ್ವದ ಅತಿ ಕಿರಿಯ ರಾಷ್ಟ್ರವಾಗಿದ್ದು, ಪ್ರತಿಭೆ ಮತ್ತು ಸಂಕಲ್ಪಶಕ್ತಿಯನ್ನು ಹೊಂದಿದೆ ಎಂದು ಹೇಳಿದ ಮೋದಿ, ಉದಯೋನ್ಮುಖ ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಕೇವಲ ಭಾಗವಹಿಸುವುದಲ್ಲದೆ, ನಾಯಕತ್ವ ವಹಿಸುವ ಪೀಳಿಗೆಯನ್ನು ರೂಪಿಸುವ ಅಗತ್ಯವಿದೆ ಎಂದರು.

“ಉದಯೋನ್ಮುಖ ವಿಜ್ಞಾನ ಮತ್ತು ತಂತ್ರಜ್ಞಾನದಲ್ಲಿ ಕೇವಲ ಭಾಗವಹಿಸುವ ಪೀಳಿಗೆಯಲ್ಲ, ಅದಕ್ಕೆ ನಾಯಕತ್ವ ವಹಿಸುವ ಪೀಳಿಗೆಯನ್ನು ನಾವು ಸಿದ್ಧಪಡಿಸಬೇಕು” ಎಂದು ಹೇಳಿದ ಅವರು, ಸಮಾವೇಶದ ಯಶಸ್ಸಿಗೆ ಶುಭ ಹಾರೈಸಿದರು.

ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122