ಭಾರತದಲ್ಲಿ ಬದಲಾದ ಪ್ರವಾಸದ ಟ್ರೆಂಡ್: ಧಾರ್ಮಿಕ ಪ್ರವಾಸಗಳೇ ನಂಬರ್‌ ಒನ್‌

ಕೇಂದ್ರ ಸರ್ಕಾರದ ಸಮೀಕ್ಷೆಯಿಂದ ಬಹಿರಂಗ

ನವದೆಹಲಿ: ಭಾರತೀಯರು ಈಗ ಪ್ರವಾಸ ಎಂದರೆ ಕೇವಲ ಎಂಜಾಯ್‌ಮೆಂಟ್‌ ಅಥವಾ ರಜೆ ಕಳೆಯಲು ಮಾತ್ರವಲ್ಲ, ಬದಲಿಗೆ ಧಾರ್ಮಿಕ ಹಾಗೂ ತೀರ್ಥಯಾತ್ರೆಗಳಿಗೆ ಹೆಚ್ಚಿನ ಆದ್ಯತೆ ನೀಡುತ್ತಿದ್ದಾರೆ! ಹೌದು, ಕೇಂದ್ರ ಸರ್ಕಾರದ ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯದ (MoSPI) ಅಡಿಯಲ್ಲಿ ಬರುವ ರಾಷ್ಟ್ರೀಯ ಸಾಂಖ್ಯಿಕ ಕಚೇರಿ (NSO) ನಡೆಸಿರುವ ‘ದೇಶೀಯ ಪ್ರವಾಸೋದ್ಯಮ ವೆಚ್ಚ ಸಮೀಕ್ಷೆ’ಯು (2025-26) ಈ ಕುರಿತಾದ ಕುತೂಹಲಕಾರಿ ಮಾಹಿತಿಯನ್ನು ಹೊರಹಾಕಿದೆ.

ದೇಶದಾದ್ಯಂತ ಗ್ರಾಮೀಣ ಮತ್ತು ನಗರ ಪ್ರದೇಶಗಳಲ್ಲಿ ನಡೆಸಲಾದ ಈ ಸಮೀಕ್ಷೆಯ ಪ್ರಮುಖ ಮುಖ್ಯಾಂಶಗಳು ಇಲ್ಲಿವೆ:

ತೀರ್ಥಯಾತ್ರೆಗಳೇ ಪ್ರಥಮ ಆದ್ಯತೆ: ಭಾರತದಲ್ಲಿ ರಾತ್ರಿ ತಂಗಿ ಮಾಡುವ ಪ್ರವಾಸಗಳಲ್ಲಿ ಶೇಕಡಾ 48ರಷ್ಟು ಪಾಲು ಧಾರ್ಮಿಕ ಮತ್ತು ತೀರ್ಥಯಾತ್ರೆಗಳದ್ದೇ ಆಗಿದೆ. ಹಳ್ಳಿ ಹಾಗೂ ನಗರ ಎನ್ನದೆ ಎಲ್ಲೆಡೆಯೂ ಜನರು ದೇವಸ್ಥಾನಗಳು ಮತ್ತು ಪುಣ್ಯಕ್ಷೇತ್ರಗಳಿಗೆ ಭೇಟಿ ನೀಡುವುದಕ್ಕೇ ಹೆಚ್ಚು ಒಲವು ತೋರುತ್ತಿದ್ದಾರೆ.

ಎರಡನೇ ಸ್ಥಾನದಲ್ಲಿ ಏರಿದೆ?: ಹಳ್ಳಿಗಳಲ್ಲಿ ತೀರ್ಥಯಾತ್ರೆ ಬಿಟ್ಟರೆ ಆರೋಗ್ಯ ಮತ್ತು ವೈದ್ಯಕೀಯ ಕಾರಣಗಳಿಗಾಗಿ (ಶೇಕಡಾ 38.4) ಪ್ರವಾಸ ಮಾಡುವುದು ಹೆಚ್ಚಿದ್ದರೆ, ಸಿಟಿಗಳಲ್ಲಿ ರಜೆ ಕಳೆಯಲು ಮತ್ತು ಮನರಂಜನೆಗಾಗಿ (ಶೇಕಡಾ 36.4) ತಿರುಗಾಡಲು ಹೋಗುವುದೇ ಎರಡನೇ ಅತಿ ದೊಡ್ಡ ಕಾರಣವಾಗಿದೆ.

ಪ್ರವಾಸಿಗರ ನೆಚ್ಚಿನ ರಾಜ್ಯಗಳು: ದೇಶದಲ್ಲೇ ಅತ್ಯಧಿಕ ಪ್ರವಾಸಿ-ಪ್ರವಾಸಗಳನ್ನು ಹೊಂದಿರುವ ರಾಜ್ಯಗಳ ಪಟ್ಟಿಯಲ್ಲಿ ಉತ್ತರ ಪ್ರದೇಶ ಮೊದಲ ಸ್ಥಾನದಲ್ಲಿದೆ (ಶೇಕಡಾ 15.7). ಇದರ ನಂತರದ ಸ್ಥಾನಗಳಲ್ಲಿ ತಮಿಳುನಾಡು (ಶೇಕಡಾ 13.4) ಮತ್ತು ರಾಜಸ್ಥಾನ (ಶೇಕಡಾ 8.0) ಇವೆ.

ಪ್ರಯಾಣ ಮತ್ತು ತಂಗಲು ಇಷ್ಟಪಡೋದು ಯಾರನ್ನು?

ರಜೆ ಅಥವಾ ವಿಹಾರಕ್ಕೆ ಹೋಗುವಾಗ ಹಳ್ಳಿಗಳ ಜನರು ಬಸ್ ಅನ್ನು ಹೆಚ್ಚು ನಂಬಿದರೆ, ಸಿಟಿಯವರು ರೈಲು ಪ್ರಯಾಣವನ್ನು ಇಷ್ಟಪಡುತ್ತಾರೆ.

ನಗರ ಪ್ರದೇಶದ ಜನರು ಹೋಟೆಲ್ ಅಥವಾ ಗೆಸ್ಟ್‌ಹೌಸ್‌ಗಳಲ್ಲಿ ಉಳಿಯಲು ಬಯಸಿದರೆ, ಗ್ರಾಮೀಣ ಭಾಗದ ಜನರು ತಮ್ಮದೇ ಆದ ಬೇರೆ ಮನೆಗಳಲ್ಲಿ ಅಥವಾ ಧಾರ್ಮಿಕ ಸಂಸ್ಥೆಗಳು ಉಚಿತವಾಗಿ ನೀಡುವ ವಸತಿಗಳಲ್ಲಿ ಉಳಿಯಲು ಇಷ್ಟಪಡುತ್ತಾರೆ.

ಇನ್ನು ಮದುವೆ, ಹಬ್ಬ ಅಥವಾ ಇತರೆ ಸಾಮಾಜಿಕ ಕಾರ್ಯಗಳಿಗೆ ಹೋಗುವಾಗ ಹೆಚ್ಚಿನವರು ಸ್ನೇಹಿತರು ಅಥವಾ ಸಂಬಂಧಿಕರ ಮನೆಯಲ್ಲೇ ತಂಗುತ್ತಾರೆ.

ಖರ್ಚು ಎಲ್ಲಿ ಹೆಚ್ಚು?: ಆರೋಗ್ಯ ಹಾಗೂ ವೈದ್ಯಕೀಯ ಕಾರಣಗಳಿಗಾಗಿ ಹೊರಡುವ ಪ್ರವಾಸಗಳಿಗೆ ಹಳ್ಳಿ ಹಾಗೂ ನಗರಗಳ ಜನರಿಬ್ಬರೂ ಅತಿ ಹೆಚ್ಚು ಹಣ ಖರ್ಚು ಮಾಡುತ್ತಿದ್ದಾರೆ. ಇನ್ನು ಬಿಸ್ನೆಸ್ ಟ್ರಿಪ್‌ಗಳಿಗೂ ಸಹ ಗಣನೀಯ ಪ್ರಮಾಣದ ಹಣ ಖರ್ಚಾಗುತ್ತಿದೆ.

ಪ್ರವಾಸದ ಅವಧಿ ಎಷ್ಟು ದಿನ?: ಭಾರತೀಯರು ಹೆಚ್ಚಾಗಿ 5 ದಿನಗಳಿಗಿಂತ ಕಡಿಮೆ ಅವಧಿಯ (ಶೇಕಡಾ 80ರಷ್ಟು ಮಂದಿ) ಸಣ್ಣ ಪ್ರವಾಸಗಳನ್ನೇ ಹೆಚ್ಚು ಇಷ್ಟಪಡುತ್ತಾರೆ.

ಒಟ್ಟಾರೆಯಾಗಿ ಹೇಳುವುದಾದರೆ, ಇಂದಿನ ಭಾರತೀಯರ ಟ್ರಾವೆಲ್ ಲಿಸ್ಟ್‌ನಲ್ಲಿ ದೇವರ ದರ್ಶನ ಮತ್ತು ತೀರ್ಥಯಾತ್ರೆಗಳೇ ಅತಿ ದೊಡ್ಡ ಟ್ರೆಂಡ್ ಆಗಿ ಹೊರಹೊಮ್ಮಿವೆ!

ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122