ಗೇಲೆಫು ಮೈಂಡ್‌ಫುಲ್‌ನೆಸ್ ಸಿಟಿಯಲ್ಲಿ ನಿರ್ಮಿಸಲಾದ 108 ಬೌದ್ಧ ಸ್ತೂಪಗಳ ಪೈಕಿ 76ನೇ ಸ್ತೂಪ ಪ್ರಧಾನಿ ಮೋದಿಗೆ ಸಮರ್ಪಣೆ
ನವದೆಹಲಿ: ಭಾರತ ಮತ್ತು ಭೂತಾನ್ ನಡುವಿನ ಸ್ನೇಹ ಸಂಬಂಧವನ್ನು ಬಲಪಡಿಸುವಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ಕೊಡುಗೆ ಮತ್ತು ಬೆಂಬಲವನ್ನು ಗುರುತಿಸಿ, ಭೂತಾನ್‌ನ ರಾಜ ಜಿಗ್ಮೆ ಖೇಸರ್ ನಾಮ್ಗ್ಯೆಲ್ ವಾಂಗ್‌ಚುಕ್ ಅವರು 76ನೇ ಪವಿತ್ರ ಬೌದ್ಧ ಸ್ತೂಪವನ್ನು ಪ್ರಧಾನಿ ಮೋದಿಗೆ ಸಮರ್ಪಿಸಿದ್ದಾರೆ.
ಭೂತಾನ್‌ನ ಗೇಲೆಫು ಮೈಂಡ್‌ಫುಲ್‌ನೆಸ್ ಸಿಟಿಯಲ್ಲಿ ನವೆಂಬರ್ 1ರಂದು ನಡೆದ 108 ಬೌದ್ಧ ಸ್ತೂಪಗಳ ನಿರ್ಮಾಣ ಮತ್ತು ಧಾರ್ಮಿಕ ವಿಧಿವಿಧಾನಗಳ ಸಮಾರಂಭದಲ್ಲಿ ಈ ಗೌರವ ಸಲ್ಲಿಸಲಾಗಿದೆ. ಈ ಸಮಾರಂಭದಲ್ಲಿ ಭಾರತದ ಪರವಾಗಿ ಕೇಂದ್ರ ಸಂಸದೀಯ ವ್ಯವಹಾರಗಳು ಮತ್ತು ಅಲ್ಪಸಂಖ್ಯಾತ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಭಾಗವಹಿಸಿದ್ದರು.
ಲ್ಹಾಬಾಬ್ ಡುಚೆನ್ ಎಂಬ ಬೌದ್ಧ ಧಾರ್ಮಿಕ ಹಬ್ಬದ ಸಂದರ್ಭದಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ ಭೂತಾನ್ ರಾಜ, ರಾಣಿ ಗ್ಯಾಲ್ಟ್ಸುಯೆನ್, ಪ್ರಧಾನಿ ದಾಶೋ ತ್ಶೆರಿಂಗ್ ತೊಬ್ಗೇ ಹಾಗೂ ಸಾರ್ವಜನಿಕರು ಉಪಸ್ಥಿತರಿದ್ದರು. ಸಾಂಪ್ರದಾಯಿಕ ಉದ್ದನೆಯ ಕೊಂಬುಗಳಾದ ಡುಂಗ್ಚೆನ್‌ಗಳನ್ನು ಊದುವ ಮೂಲಕ ಧಾರ್ಮಿಕ ಸಮಾರಂಭ ನಡೆಯಿತು.
40 ಸಾವಿರಕ್ಕೂ ಹೆಚ್ಚು ಜನರ ಪಾಲ್ಗೊಳ್ಳುವಿಕೆ
ಭೂತಾನ್ ರಾಜನ ಪರಿಕಲ್ಪನೆಯಂತೆ ಗೇಲೆಫು ಮೈಂಡ್‌ಫುಲ್‌ನೆಸ್ ಸಿಟಿಯಲ್ಲಿ 108 ಬೌದ್ಧ ಸ್ತೂಪಗಳನ್ನು ನಿರ್ಮಿಸಲಾಗಿದೆ. ಜಾಂಗ್‌ಚುಬ್ ಚೋರ್ಟೆನ್‌ಗಳು ಎಂದೂ ಕರೆಯಲಾಗುವ ಈ ಸ್ತೂಪಗಳನ್ನು ನವೆಂಬರ್ 1ರಂದು ಕೇವಲ ಆರು ಗಂಟೆಗಳಲ್ಲಿ ನಿರ್ಮಿಸಲಾಗಿದೆ. 40 ಸಾವಿರಕ್ಕೂ ಹೆಚ್ಚು ಸ್ವಯಂಸೇವಕರು, ಬೌದ್ಧ ಸನ್ಯಾಸಿಗಳು ಮತ್ತು ಕುಶಲಕರ್ಮಿಗಳು ಈ ಕಾರ್ಯದಲ್ಲಿ ಭಾಗವಹಿಸಿದ್ದರು. ಮಧ್ಯರಾತ್ರಿಯ ಬಳಿಕವೇ ನಿರ್ಮಾಣ ಕಾರ್ಯ ಆರಂಭವಾಗಿತ್ತು.
ಪ್ರತಿಯೊಂದು ಸ್ತೂಪವೂ 15 ಮೀಟರ್ ಎತ್ತರ ಹೊಂದಿದ್ದು, ಒಂದರಿಂದ ಮತ್ತೊಂದಕ್ಕೆ 108 ಮೀಟರ್ ಅಂತರವಿದೆ. ಐಯೆ (ಮೌ) ನದಿಯ ದಡದಲ್ಲಿ ಸುಮಾರು 11.7 ಕಿಲೋಮೀಟರ್ ಉದ್ದದ ಪ್ರದೇಶದಲ್ಲಿ ಇವುಗಳನ್ನು ನಿರ್ಮಿಸಲಾಗಿದೆ.
ಭಾರತದ ಪರವಾಗಿ ಕೃತಜ್ಞತೆ ಸಲ್ಲಿಸಿದ ರಿಜಿಜು
ಈ ಕುರಿತು ಸಾಮಾಜಿಕ ಮಾಧ್ಯಮ ಎಕ್ಸ್‌ನಲ್ಲಿ ಮಾಹಿತಿ ಹಂಚಿಕೊಂಡಿರುವ ಕಿರಣ್ ರಿಜಿಜು, ಪ್ರಧಾನಿ ಮೋದಿಯವರ ದೂರದೃಷ್ಟಿ ಮತ್ತು ಭಾರತ-ಭೂತಾನ್ ಸ್ನೇಹ ಸಂಬಂಧವನ್ನು ಬಲಪಡಿಸುವ ಬದ್ಧತೆಯನ್ನು ಗುರುತಿಸಿ 76ನೇ ಪವಿತ್ರ ಸ್ತೂಪವನ್ನು ಅವರಿಗೆ ಸಮರ್ಪಿಸಿರುವುದು ಭಾರತಕ್ಕೆ ದೊಡ್ಡ ಗೌರವ ಎಂದು ಹೇಳಿದ್ದಾರೆ.
ಗೇಲೆಫುದಲ್ಲಿ ಭೂತಾನ್ ರಾಜರನ್ನು ಭೇಟಿಯಾದ ರಿಜಿಜು, ಪ್ರಧಾನಿ ನರೇಂದ್ರ ಮೋದಿ ಅವರ ಶುಭಾಶಯಗಳನ್ನು ತಲುಪಿಸಿದರು. ಅಲ್ಲದೆ, ಭಾರತವು ಭೂತಾನ್‌ನೊಂದಿಗಿನ ದೀರ್ಘಕಾಲದ ಸ್ನೇಹ ಮತ್ತು ಸಹಕಾರಕ್ಕೆ ಸದಾ ಬದ್ಧವಾಗಿದೆ ಎಂದು ತಿಳಿಸಿದರು.
ಅಕ್ಟೋಬರ್ 31ರಿಂದ ನವೆಂಬರ್ 2ರವರೆಗೆ ಭೂತಾನ್ ಪ್ರವಾಸ ಕೈಗೊಂಡಿದ್ದ ರಿಜಿಜು, ಅಲ್ಲಿನ ಪ್ರಧಾನಿ ದಾಶೋ ತ್ಶೆರಿಂಗ್ ತೊಬ್ಗೇ ಅವರನ್ನೂ ಭೇಟಿಯಾಗಿ ದ್ವಿಪಕ್ಷೀಯ ಸಹಕಾರದ ಕುರಿತು ಚರ್ಚಿಸಿದರು. ಅಭಿವೃದ್ಧಿ ಸಹಕಾರ, ವ್ಯಾಪಾರ, ಇಂಧನ, ಹೂಡಿಕೆ, ಸಂಪರ್ಕ ಮತ್ತು ಸಾಂಸ್ಕೃತಿಕ ಸಂಬಂಧಗಳ ಕ್ಷೇತ್ರಗಳಲ್ಲಿ ಉಭಯ ದೇಶಗಳ ನಡುವಿನ ಸಹಕಾರವನ್ನು ಮತ್ತಷ್ಟು ಬಲಪಡಿಸುವ ಕುರಿತು ಮಾತುಕತೆ ನಡೆಸಿದರು.
ಭಾರತ ಮತ್ತು ಭೂತಾನ್ ನಡುವಿನ ಆಧ್ಯಾತ್ಮಿಕ ಹಾಗೂ ಸಾಂಸ್ಕೃತಿಕ ಸಂಬಂಧಗಳ ಸಂಕೇತವಾಗಿ 76ನೇ ಸ್ತೂಪವನ್ನು ಪ್ರಧಾನಿ ಮೋದಿಗೆ ಸಮರ್ಪಿಸಿರುವುದಕ್ಕೆ ರಿಜಿಜು ಭೂತಾನ್ ರಾಜರಿಗೆ ಕೃತಜ್ಞತೆ ಸಲ್ಲಿಸಿದರು.
ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122
