ಭೋಪಾಲ್: “ಶ್ರಮ ಸಾಧಕರು (ಕಾರ್ಮಿಕರು/ಶ್ರಮಿಕರು) ಬಲಗೊಂಡರೆ, ಸಮಾಜ ಮತ್ತು ರಾಷ್ಟ್ರದ ಭವಿಷ್ಯ ಎರಡೂ ಸದೃಢಗೊಳ್ಳುತ್ತವೆ” ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್‌ಎಸ್‌ಎಸ್) ಸರಕಾರ್ಯವಾಹ ದತ್ತಾತ್ರೇಯ ಹೊಸಬಾಳೆ ಅವರು ಪ್ರತಿಪಾದಿಸಿದರು. ಅವರು ಸೆಪ್ಟೆಂಬರ್ 19, 2026 ರಂದು ಭೋಪಾಲ್‌ನ ರವೀಂದ್ರ ಭವನದಲ್ಲಿ ಸಂತ ಶಿರೋಮಣಿ ಗುರು ರಿದಾಸರ 650 ನೇ ಜನ್ಮ ದಿನಾಚರಣೆಯ ಅಂಗವಾಗಿ ಆಯೋಜಿಸಿದ್ದ ‘ಶ್ರಮ ಸಾಧಕ ಸಂಗಮ’ವನ್ನು ಉದ್ದೇಶಿಸಿ ಮಾತನಾಡುತ್ತಿದ್ದರು.
ಸಮಾಜದಲ್ಲಿ ಬೇರೂರಿರುವ ಮೇಲು-ಕೀಳು ಎಂಬ ಪಿಡುಗನ್ನು ಸರಿಯಾದ ದೃಷ್ಟಿಕೋನ ಮತ್ತು ಪರಸ್ಪರ ಹೊಂದಾಣಿಕೆಯ ಮೂಲಕ ತೊಡೆದುಹಾಕಬೇಕು ಎಂದು ಅವರು ಹೇಳಿದರು. ಇದಕ್ಕಾಗಿ ಸಮಾಜದ ವಿವಿಧ ವರ್ಗಗಳ ನಡುವೆ ಪರಸ್ಪರ ಪ್ರೀತಿ-ವಿಶ್ವಾಸವನ್ನು ಹೆಚ್ಚಿಸುವುದು ಅವಶ್ಯಕವಾಗಿದೆ. ‘ಶ್ರಮ ಸಾಧಕ ಮಿಲನ’ ಎಂಬುದು ಈ ನಿಟ್ಟಿನಲ್ಲಿ ಸಣ್ಣದಾದರೂ ಅತ್ಯಂತ ಮಹತ್ವದ ಹೆಜ್ಜೆಯಾಗಿದೆ ಎಂದರು.
ಸಮಾಜದಲ್ಲಿ ಸಂಪನ್ಮೂಲಗಳನ್ನು ಹೊಂದಿರುವವರಿಗೂ ಮತ್ತು ಅವುಗಳ ಕೊರತೆ ಎದುರಿಸುತ್ತಿರುವವರಿಗೂ ನಡುವೆ ಸಮನ್ವಯತೆ ಇರಬೇಕು ಎಂದು ಅವರು ತಿಳಿಸಿದರು. ಸಮರ್ಥ ವರ್ಗದವರು ತಮ್ಮ ಸಾಮರ್ಥ್ಯಕ್ಕೆ ತಕ್ಕಂತೆ ಸಹಕಾರ ನೀಡಬೇಕು, ಅದೇ ರೀತಿ ಅಗತ್ಯವಿರುವವರು ತಮ್ಮ ಆತ್ಮವಿಶ್ವಾಸ ಮತ್ತು ಪರಿಶ್ರಮವನ್ನು ಮುಂದುವರಿಸಿಕೊಂಡು ಹೋಗಬೇಕು ಎಂದರು.
ಸಮಾಜದಲ್ಲಿ ವ್ಯಕ್ತಿಯೊಬ್ಬರ ಪ್ರಸ್ತುತ ಸ್ಥಿತಿಯನ್ನು ನೋಡಿ ಅವರ ಭವಿಷ್ಯವನ್ನು ನಿರ್ಧರಿಸಲು ಸಾಧ್ಯವಿಲ್ಲ ಎಂದು ನುಡಿದ ಅವರು, ಓರ್ವ ಕಾರ್ಮಿಕನ ಮಗ ವಿಜ್ಞಾನಿಯಾಗಬಹುದು ಮತ್ತು ಚರ್ಮದ ಕೆಲಸ ಮಾಡುವ ಕುಟುಂಬದಲ್ಲಿ ಜನಿಸಿದ ಮಗ ಸಂತನಾಗಬಹುದು ಎಂದು ಉದಾಹರಿಸಿದರು.
ಸಮಾಜದ ದುರ್ಬಲ ವರ್ಗಗಳನ್ನು ಅದು ಹೇಗೆ ನಡೆಸಿಕೊಳ್ಳುತ್ತದೆ ಎಂಬುದರ ಮೇಲೆ ಆ ಸಮಾಜದ ನೈಜ ಪರೀಕ್ಷೆಯಿರುತ್ತದೆ ಎಂದ ಅವರು, ಸಮಾಜದ ದುರ್ಬಲ ವರ್ಗಗಳೇ ಎಲ್ಲಾ ರೀತಿಯ ಸಮಸ್ಯೆಗಳಿಂದ ಮೊದಲು ಮತ್ತು ತೀವ್ರವಾಗಿ ಬಳಲುತ್ತವೆ. ಆದ್ದರಿಂದ, ಸಮಾಜದ ದುರ್ಬಲ ವರ್ಗಗಳನ್ನು ಬಲಪಡಿಸುವುದು ಅತ್ಯಗತ್ಯ. ಶ್ರಮ ಸಾಧಕರನ್ನು ಕೇವಲ ಸಹಾಯ ಪಡೆಯುವ ವರ್ಗವಾಗಿ ನೋಡಬಾರದು. ಅವರೇ ಸಮಾಜದ ನಿಜವಾದ ಶಕ್ತಿಯಾಗಿದ್ದಾರೆ. ಅವರಿಗೆ ಅವಕಾಶಗಳು, ಗೌರವ, ಸಹಕಾರ ಮತ್ತು ಮುನ್ನಡೆಯಲು ಸೂಕ್ತ ವಾತಾವರಣ ಕಲ್ಪಿಸಿಕೊಡುವ ಅಗತ್ಯವಿದೆ ಎಂದು ಹೇಳಿದರು. ಪ್ರತಿಯೊಂದು ಹಂತದಲ್ಲೂ ಶ್ರಮಕ್ಕೆ (ಕೈಕಾಯಕಕ್ಕೆ) ತಕ್ಕ ಗೌರವ ಸಿಗಬೇಕು.
ದತ್ತಾತ್ರೇಯ ಹೊಸಬಾಳೆ ಅವರು ಮಾತನಾಡಿ, ಸಮಾಜದಲ್ಲಿ ಶ್ರಮದ ಗೌರವ ಹೆಚ್ಚಾಗಬೇಕು. ಪ್ರತಿಯೊಬ್ಬ ವ್ಯಕ್ತಿಯೂ ತನ್ನ ಜೀವನದಲ್ಲಿ ಯಾವುದಾದರೂ ಒಂದು ರೂಪದಲ್ಲಿ ದೈಹಿಕ ಶ್ರಮವನ್ನು ಮಾಡಬೇಕು. ದೈಹಿಕ ಶ್ರಮ ಎಂಬುದು ಕೇವಲ ಆರ್ಥಿಕ ಅಗತ್ಯವಷ್ಟೇ ಅಲ್ಲ, ಅದು ಜೀವನದಲ್ಲಿ ಮತ್ತು ಸಮಾಜದಲ್ಲಿ ಸಮತೋಲನವನ್ನು ಕಾಪಾಡಿಕೊಳ್ಳಲು ಅತ್ಯಗತ್ಯವಾಗಿದೆ ಎಂದರು.
ಅಂತಹ ಕ್ಷೇತ್ರಗಳಲ್ಲಿ ಮಕ್ಕಳಿಗೆ ಆರೋಗ್ಯ ಸೌಲಭ್ಯಗಳು, ಟ್ಯೂಷನ್ ಮತ್ತು ಶೈಕ್ಷಣಿಕ ಸೌಲಭ್ಯಗಳು ಹಾಗೂ ಉದ್ಯೋಗಾವಕಾಶಗಳನ್ನು ಒದಗಿಸಲು ಪ್ರಯತ್ನಗಳನ್ನು ಮಾಡಬಹುದು. ಸಂಪನ್ಮೂಲ ಮತ್ತು ಸಾಮರ್ಥ್ಯವಿರುವವರಿಗೂ ಹಾಗೂ ಇಲ್ಲದಿರುವವರಿಗೂ ನಡುವೆ ಸಮನ್ವಯತೆಯನ್ನು ಸಾಧಿಸುವುದರಿಂದ ಸಮಾಜದ ಸಾಮೂಹಿಕ ಶಕ್ತಿ ವೃದ್ಧಿಸುತ್ತದೆ. ಸಮಾಜದ ಬಗೆಗಿನ ಜವಾಬ್ದಾರಿಯು ಆರ್ಥಿಕ ಸ್ಥಿತಿಗತಿಗಳ ಮೇಲೆ ನಿರ್ಧಾರವಾಗುವುದಿಲ್ಲ ಎಂದು ಅವರು ನುಡಿದರು.
ಸಮಾಜವನ್ನು ಬಲಪಡಿಸಲು ಆರ್ಥಿಕ ಬಲದ ಜೊತೆಗೆ ಕರ್ತವ್ಯ ಪ್ರಜ್ಞೆಯೂ ಅತ್ಯಾವಶ್ಯಕ ಎಂದ ಅವರು, ಸಮಾಜದ ಕಡೆಗೆ ಹೊಣೆಗಾರಿಕೆಯ ಭಾವನೆ ಇದ್ದಾಗ ವ್ಯಕ್ತಿಯು ತನ್ನ ಮಿತಿಯೊಳಗೆಯೂ ಕೊಡುಗೆ ನೀಡಲು ಪ್ರೇರೇಪಿತನಾಗುತ್ತಾನೆ. ವ್ಯಸನ ಮುಕ್ತತೆ ಮತ್ತು ಮಹಿಳೆಯರ ಸುರಕ್ಷತೆಯು ಸಹ ಸಾಮಾಜಿಕ ಜವಾಬ್ದಾರಿಗಳಾಗಿವೆ ಎಂದು ತಿಳಿಸಿದರು.
ಸಮಾಜವನ್ನು ಬಲಪಡಿಸುವ ಪ್ರಯತ್ನದಲ್ಲಿ ಕೇವಲ ಆರ್ಥಿಕ ಸಹಕಾರ ಮಾತ್ರ ಸಾಕಾಗುವುದಿಲ್ಲ. ಶ್ರಮ ಸಾಧಕರು ಮತ್ತು ಅವರ ಕುಟುಂಬಗಳು ವ್ಯಸನಗಳಂತಹ ಸಮಸ್ಯೆಗಳಿಗೆ ಬಲಿಯಾಗದಂತೆ ನೋಡಿಕೊಳ್ಳುವುದು ಸಹ ಮುಖ್ಯವಾಗಿದೆ. ಸಮಾಜದ ದುರ್ಬಲ ವರ್ಗಗಳನ್ನು ಅಂತಹ ಪಿಡುಗುಗಳಿಂದ ರಕ್ಷಿಸುವುದು ಕೂಡ ನಮ್ಮೆಲ್ಲರ ಸಾಮೂಹಿಕ ಜವಾಬ್ದಾರಿಯಾಗಿದೆ. ಮಹಿಳೆಯರ ಸುರಕ್ಷತೆಯನ್ನು ಸಮಾಜದ ಶಕ್ತಿಯೊಂದಿಗೆ ಜೋಡಿಸಿದ ಅವರು, ಸಮಾಜದ ಪ್ರತಿಯೊಂದು ವರ್ಗವೂ ಸುರಕ್ಷಿತ ಹಾಗೂ ಗೌರವಾನ್ವಿತ ವಾತಾವರಣದಲ್ಲಿ ಬದುಕುವಂತಾಗಬೇಕು ಎಂದರು. ಸಮಾಜದ ಯಾವುದೇ ದುರ್ಬಲ ವರ್ಗವು ಬಿಕ್ಕಟ್ಟನ್ನು ಎದುರಿಸಿದರೆ, ಅದರ ಪರಿಣಾಮ ಇಡೀ ಸಮಾಜದ ಮೇಲೆ ಬೀಳುತ್ತದೆ. ಆದ್ದರಿಂದ, ದುರ್ಬಲ ವರ್ಗಗಳನ್ನು ಬಲಪಡಿಸುವುದೆಂದರೆ ಇಡೀ ಸಮಾಜವನ್ನು ಬಲಪಡಿಸಿದಂತೆ ಎಂದು ಅವರು ಹೇಳಿದರು.
ಸಾಮಾಜಿಕ ಬದಲಾವಣೆಯು ಕುಟುಂಬದಿಂದಲೇ ಪ್ರಾರಂಭವಾಗುತ್ತದೆ ಎಂದು ಹೇಳಿದ ಅವರು, ಕುಟುಂಬಗಳಿಗೆ ಉತ್ತಮ ಸಂಸ್ಕಾರವನ್ನು ನೀಡುವುದು ಮತ್ತು ಮಕ್ಕಳ ಭವಿಷ್ಯಕ್ಕೆ ಅನುಕೂಲಕರವಾದ ವಾತಾವರಣವನ್ನು ನಿರ್ಮಿಸುವುದು ಅನಿವಾರ್ಯವಾಗಿದೆ. ಶ್ರಮ ಸಾಧಕರ ಕುಟುಂಬಗಳ ಮಕ್ಕಳು ಕೂಡ ಶಿಕ್ಷಣ ಮತ್ತು ಪ್ರತಿಭೆಯ ಮೂಲಕ ಜೀವನದಲ್ಲಿ ಉನ್ನತ ಮಟ್ಟಕ್ಕೆ ಏರಬಹುದು. ಮಗುವಿನ ಪ್ರತಿಭೆಯು ಅದರ ಕುಟುಂಬ ಅಥವಾ ಆರ್ಥಿಕ ಹಿನ್ನೆಳೆಯಿಂದ ನಿರ್ಧಾರವಾಗುವುದಿಲ್ಲ. ಸೂಕ್ತ ಅವಕಾಶಗಳು ಮತ್ತು ಪ್ರೋತ್ಸಾಹ ಸಿಕ್ಕರೆ ಅವರು ಪ್ರಾಧ್ಯಾಪಕರಾಗಿ, ವಿಜ್ಞಾನಿಗಳಾಗಿ ಅಥವಾ ಯಾವುದೇ ಕ್ಷೇತ್ರದಲ್ಲಿ ತಮ್ಮದೇ ಆದ ಹೆಜ್ಜೆಗುರುತನ್ನು ಮೂಡಿಸಬಹುದು ಎಂದು ಅವರು ತಿಳಿಸಿದರು.
ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122
