ಅಂಕಣ – Xಫ್ಯಾಕ್ಟರ್
- ಪರಪ್ಪ ಶಾನವಾಡ, ಸಾಮಾಜಿಕ ಜಾಲತಾಣ ವಿಶ್ಲೇಷಕ
ಬ್ರಿಟಿಷರು ತಮ್ಮ ವ್ಯಾಪಾರದ ಅನುಕೂಲಕ್ಕಾಗಿ ಪ್ರಾರಂಭಿಸಿದ ರೈಲುಗಾಡಿಯು, 1853ರಲ್ಲಿ ಬಾಂಬೆಯಿಂದ ಠಾಣೆವರೆಗೆ ಓಡುತ್ತಾ ಕ್ರಮೇಣ ಪೂರ್ಣ ಭಾರತವನ್ನು ಆವರಿಸಿ ಭಾರತದ ಸಾರಿಗೆ ಕ್ಷೇತ್ರದ ಪ್ರಮುಖ ಪಾಲುದಾರ ಎನಿಸಿದೆ. ಅಲ್ಲಿಂದ ಮುಂದೆ 1947ರವರೆಗೆ ಬರೋಬ್ಬರಿ 53 ಸಾವಿರ ಕಿ.ಮೀ.ವರೆಗೂ ಬ್ರಿಟಿಷರು ವಿಸ್ತರಿಸಿದ್ದರು. ಸ್ವಾತಂತ್ರ್ಯಾನಂತರ 17 ಸಾವಿರ ಕಿ.ಮೀ. ವಿಸ್ತರಿಸಿ, ಒಟ್ಟು 70 ಸಾವಿರ ಕಿ.ಮೀನೊಂದಿಗೆ ಜಗತ್ತಿನ 4ನೇ ಅತಿದೊಡ್ಡ ರೈಲ್ವೇ ಜಾಲ ಎನಿಸಿದೆ. ಜೊತೆಗೆ ಶೇ.99.7 ವಿದ್ಯುದೀಕರಣ ಸಾಧಿಸಿದೆ. ಹೊಸ ಹೊಸ ವಿನ್ಯಾಸದ ರಾಜಧಾನಿ ಎಕ್ಸ್ ಪ್ರೆಸ್, ವಂದೇ ಭಾರತ್, ನಗರ ಪ್ರಯಾಣದ ಟ್ರಾಮ್, ಮೆಟ್ರೋ, ಮತ್ತು ಗೂಡ್ಸ್ ಸರ್ವೀಸ್ನ ಪ್ರೈಟ್ ಹೀಗೆ ಹಲವಾರು ವಿವಿಧ ವಿನ್ಯಾಸ, ಎಂಜಿನ್ ಮತ್ತು ಮಾದರಿ ಹೊಂದಿದೆ. ಮೊದಮೊದಲು ಕಲ್ಲಿದ್ದಲಿನಿಂದ ಓದುತ್ತಿದ್ದ ರೈಲು ಕ್ರಮೇಣವಾಗಿ ಡೀಸೆಲ್, ನಂತರ ವಿದ್ಯುತ್ ಮತ್ತು ಈಗ ಜಲಜನಕ ಮೂಲಕ ಓಡಬಹುದಾದ ತಂತ್ರಜ್ಞಾನವನ್ನು ಕಂಡುಕೊಂಡಿದೆ. ಭಾರತೀಯ ರೈಲ್ವೆಯ ಹೈಡ್ರೋಜನ್ ರೈಲು ಯೋಜನೆ ದೇಶದ ಸಾರಿಗೆ ಕ್ಷೇತ್ರದಲ್ಲಿ ಹೊಸ ಅಧ್ಯಾಯ ಆರಂಭಿಸುವತ್ತ ಸಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿಯೂ ಈ ವಿಷಯ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ. ಕಳೆದ ಕೆಲವು ವಾರಗಳಲ್ಲಿ X, YouTube, Instagram, Facebook ಹಾಗೂ LinkedIn ಸೇರಿದಂತೆ ಪ್ರಮುಖ ಸಾಮಾಜಿಕ ಮಾಧ್ಯಮಗಳಲ್ಲಿ ಈ ವಿಷಯವು ಅತ್ಯಂತ ಸಕಾರಾತ್ಮಕ ಪ್ರತಿಕ್ರಿಯೆ ಪಡೆದಿದೆ. ಸಾರ್ವಜನಿಕ ಚರ್ಚೆಗಳ ವಿಶ್ಲೇಷಣೆಯ ಪ್ರಕಾರ ಶೇ.74 ಅಭಿಪ್ರಾಯಗಳು ಸಕಾರಾತ್ಮಕವಾಗಿವೆ.
ಸಾಮಾಜಿಕ ಜಾಲತಾಣದಲ್ಲಿ #HydrogenTrain, #IndianRailways, #GreenHydrogen, #MakeInIndia, #ViksitBharat, #AtmanirbharBharat ಹಾಗೂ #CleanEnergy ಹ್ಯಾಶ್ಟ್ಯಾಗ್ಗಳು ಟ್ರೆಂಡ್ ಆಗಿದ್ದು, ಹೈಡ್ರೋಜನ್ ರೈಲನ್ನು ಭಾರತದ ತಾಂತ್ರಿಕ ಸಾಮರ್ಥ್ಯ ಮತ್ತು ಪರಿಸರ ಸ್ನೇಹಿ ಅಭಿವೃದ್ಧಿಯ ಸಂಕೇತವಾಗಿ ಅನೇಕರು ಬಣ್ಣಿಸಿದ್ದಾರೆ. ತಂತ್ರಜ್ಞಾನ ವಿಶ್ಲೇಷಕರು ಹಾಗೂ ವಿಜ್ಞಾನ ಕ್ಷೇತ್ರದ ಪರಿಣಿತರು ಹೈಡ್ರೋಜನ್ ರೈಲಿನ ಕಾರ್ಯವಿಧಾನ, ಸುರಕ್ಷತೆ, ಇಂಧನ ಕೋಶ (Fuel Cell) ತಂತ್ರಜ್ಞಾನ ಮತ್ತು ಹಸಿರು ಹೈಡ್ರೋಜನ್ ಉತ್ಪಾದನೆಯ ಕುರಿತು ಜಾಗೃತಿ ಮೂಡಿಸಿದ್ದಾರೆ. YouTubeನಲ್ಲಿ ತಂತ್ರಜ್ಞಾನ ವಿವರಣೆಗಳು ಮತ್ತು ಪ್ರಯೋಗಾತ್ಮಕ ಸಂಚಾರದ ವಿಡಿಯೋಗಳು ಲಕ್ಷಾಂತರ ವೀಕ್ಷಣೆಗಳನ್ನು ಪಡೆದರೆ, ಸಾಮಾಜಿಕ ಜಾಲತಾಣದಲ್ಲಿ ಕಂಡುಬಂದ ಪ್ರಮುಖ ಸಾರ್ವಜನಿಕ ಅಭಿಪ್ರಾಯಗಳಲ್ಲಿ “ಭಾರತ ಸ್ವಾವಲಂಬಿ ತಂತ್ರಜ್ಞಾನ ರಾಷ್ಟ್ರವಾಗಿ ಬೆಳೆಯುತ್ತಿದೆ”, “ಪರಿಸರ ಸ್ನೇಹಿ ಸಾರಿಗೆಗೆ ಇದು ಮಹತ್ವದ ಹೆಜ್ಜೆ” ಹಾಗೂ “ಇಂತಹ ತಂತ್ರಜ್ಞಾನ ದೂರದ ಗ್ರಾಮೀಣ ಪ್ರದೇಶಗಳಿಗೂ ತಲುಪಬೇಕು” ಎಂಬ ಆಶಯಗಳು ಹೆಚ್ಚಾಗಿ ವ್ಯಕ್ತವಾಗಿವೆ. ಮತ್ತೊಂದೆಡೆ, ಹೈಡ್ರೋಜನ್ ಉತ್ಪಾದನಾ ವೆಚ್ಚ, ಸಂಗ್ರಹಣೆ, ಇಂಧನ ತುಂಬುವ ಮೂಲಸೌಕರ್ಯ ಹಾಗೂ ಯೋಜನೆಯ ಆರ್ಥಿಕ ಕಾರ್ಯಸಾಧ್ಯತೆ ಕುರಿತು ಕೆಲವು ತಜ್ಞರು ಪ್ರಶ್ನೆಗಳನ್ನು ಎತ್ತಿದ್ದಾರೆ.
ಜಾಗತಿಕ ಮಟ್ಟದಲ್ಲಿ ಜರ್ಮನಿ, ಜಪಾನ್, ಚೀನಾ ಮತ್ತು ದಕ್ಷಿಣ ಕೊರಿಯಾ ಹೈಡ್ರೋಜನ್ ತಂತ್ರಜ್ಞಾನದಲ್ಲಿ ಮುಂಚೂಣಿಯಲ್ಲಿದ್ದರೂ, ಭಾರತವು ತನ್ನ ವಿಶಾಲ ರೈಲುಜಾಲ, ದೇಶೀಯ ಸಂಶೋಧನೆ, ‘ಮೇಕ್ ಇನ್ ಇಂಡಿಯಾ’ ಉತ್ಪಾದನಾ ಸಾಮರ್ಥ್ಯ ಮತ್ತು ಹಸಿರು ಹೈಡ್ರೋಜನ್ ಮಿಷನ್ನ ನೆರವಿನಿಂದ ಹೊಸ ಅವಕಾಶಗಳನ್ನು ಸೃಷ್ಟಿಸುತ್ತಿದೆ. ವಿಶೇಷವಾಗಿ ವಿದ್ಯುದೀಕರಣವಾಗದ ರೈಲುಮಾರ್ಗಗಳಲ್ಲಿ ಹೈಡ್ರೋಜನ್ ರೈಲುಗಳು ಡೀಸೆಲ್ ಎಂಜಿನ್ಗಳಿಗೆ ಪರಿಸರ ಸ್ನೇಹಿ ಪರ್ಯಾಯವಾಗಬಹುದು ಎಂಬ ಅಭಿಪ್ರಾಯ ತಜ್ಞರಲ್ಲಿ ವ್ಯಕ್ತವಾಗಿದೆ. ಭವಿಷ್ಯದಲ್ಲಿ ಹೈಡ್ರೋಜನ್ ಎಂಜಿನ್ಗಳು, ಫ್ಯೂಯೆಲ್ ಸೆಲ್ಗಳು, ಎಲೆಕ್ಟ್ರೋಲೈಸರ್ಗಳು, ಹೈಡ್ರೋಜನ್ ಸಂಗ್ರಹ ವ್ಯವಸ್ಥೆಗಳು ಹಾಗೂ ಸಂಬಂಧಿತ ಉತ್ಪಾದನಾ ಕೈಗಾರಿಕೆಗಳಲ್ಲಿ ಭಾರತವು ಜಾಗತಿಕ ಉತ್ಪಾದನಾ ಕೇಂದ್ರವಾಗುವ ಸಾಧ್ಯತೆಯೂ ಚರ್ಚೆಯ ಪ್ರಮುಖ ವಿಷಯವಾಗಿದೆ. ಇದರಿಂದ ಉದ್ಯೋಗ ಸೃಷ್ಟಿ, ರಫ್ತು ಅವಕಾಶಗಳು ಹಾಗೂ ಹಸಿರು ಆರ್ಥಿಕತೆಯ ವಿಸ್ತರಣೆಗೆ ಹೊಸದಿಕ್ಕು ದೊರೆಯಬಹುದು. ಒಟ್ಟಾರೆ, ಹೈಡ್ರೋಜನ್ ರೈಲು ಕುರಿತ ಜಾಲತಾಣಗಳ ಸಂವಾದವು ಕೇವಲ ಹೊಸ ರೈಲಿನ ಬಗ್ಗೆ ಮಾತ್ರವಲ್ಲ; ಅದು ಸ್ವಾವಲಂಬಿ ಭಾರತ, ತಾಂತ್ರಿಕ ನವೋದ್ಯಮ, ಪರಿಸರ ಸಂರಕ್ಷಣೆ ಮತ್ತು ಅಭಿವೃದ್ಧಿ ಹೊಂದಿದ ಭಾರತದ ಕನಸಿನ ಬಗ್ಗೆ ಜನರಲ್ಲಿ ಮೂಡುತ್ತಿರುವ ವಿಶ್ವಾಸವನ್ನು ಪ್ರತಿಬಿಂಬಿಸುತ್ತದೆ. ಸರಿಯಾದ ನೀತಿ, ಹೂಡಿಕೆ ಮತ್ತು ಸಾರ್ವಜನಿಕ ಸಹಭಾಗಿತ್ವ ಮುಂದುವರಿದರೆ, ಹೈಡ್ರೋಜನ್ ರೈಲು ಭಾರತವನ್ನು ಸುಸ್ಥಿರ ಸಾರಿಗೆ ಕ್ಷೇತ್ರದಲ್ಲಿ ವಿಶ್ವದ ಪ್ರಮುಖ ರಾಷ್ಟ್ರಗಳ ಸಾಲಿನಲ್ಲಿ ನಿಲ್ಲಿಸುವ ಸಾಮರ್ಥ್ಯ ಹೊಂದಿದೆ.
