ಸೇಲಂ: ಕೈದಿಗಳ ಮಾನಸಿಕ ಹಾಗೂ ಶಾರೀರಿಕ ಸುಧಾರಣೆ, ಭಾವನಾತ್ಮಕ ಸಮತೋಲನ ಮತ್ತು ಪುನರ್ವಸತಿಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ದರ್ಪಣ್ ಫೌಂಡೇಶನ್ ಸಂಸ್ಥೆಯು ಸೇಲಂ ಕೇಂದ್ರ ಕಾರಾಗೃಹದಲ್ಲಿ ‘ಯೋಗ ಮತ್ತು ವೆಲ್‌ನೆಸ್’ (Yoga & Wellness) ಕಾರ್ಯಕ್ರಮಕ್ಕೆ ಚಾಲನೆ ನೀಡಿದೆ.
ತಮಿಳುನಾಡು ಕಾರಾಗೃಹ ಮತ್ತು ಸುಧಾರಣಾ ಸೇವೆಗಳ ಮಹಾನಿರ್ದೇಶಕರಾದ (DGP) ಡಾ. ಸಂದೀಪ್ ರೈ ರಾಥೋಡ್ (IPS) ಹಾಗೂ ಕಾರಾಗೃಹಗಳ ಇನ್ಸ್ಪೆಕ್ಟರ್ ಜನರಲ್ (IG) ಆರ್. ಕನಕರಾಜ್ ಅವರ ವಿಶೇಷ ಆಹ್ವಾನದ ಮೇರೆಗೆ ಈ ಸುಧಾರಣಾ ಯೋಜನೆಯನ್ನು ಹಮ್ಮಿಕೊಳ್ಳಲಾಗಿದೆ. ಕೈದಿಗಳ ಸಮಗ್ರ ಕಲ್ಯಾಣಕ್ಕಾಗಿ ಕಾರಾಗೃಹದಲ್ಲಿ ನಿಯಮಿತವಾಗಿ ಯೋಗ, ಪ್ರಾಣಾಯಾಮ ಹಾಗೂ ಧ್ಯಾನ ಶಿಬಿರಗಳನ್ನು ಸಂಸ್ಥೆಯು ನಡೆಸಿಕೊಡಲಿದೆ.
ಕಾರ್ಯಕ್ರಮ ಉದ್ದೇಶಿಸಿ ಮಾತನಾಡಿದ ದರ್ಪಣ್ ಫೌಂಡೇಶನ್‌ನ ಸಂಸ್ಥಾಪಕರಾದ ಗುರೂಜಿ ಶ್ರೀ ನಂದಕಿಶೋರ್, “ಪ್ರತಿಯೊಬ್ಬ ವ್ಯಕ್ತಿಯಲ್ಲೂ ದೈವಿಕ ಅಂಶ ಹಾಗೂ ಸಕಾರಾತ್ಮಕ ಬದಲಾವಣೆಯಾಗುವ ಸಾಮರ್ಥ್ಯ ಅಡಗಿದೆ. ನಿರಂತರ ಯೋಗ ಮತ್ತು ಧ್ಯಾನದ ಅಭ್ಯಾಸದಿಂದ ಯಾವುದೇ ವ್ಯಕ್ತಿ ತನ್ನ ಜೀವನದಲ್ಲಿ ಸಕಾರಾತ್ಮಕ ಸುಧಾರಣೆ ಕಾಣಲು ಸಾಧ್ಯ” ಎಂದರು.
ಅಲ್ಲದೆ, ಕೋಪ ನಿರ್ವಹಣೆ, ಕಷ್ಟದ ಸನ್ನಿವೇಶಗಳಲ್ಲಿ ಸ್ಥಿರತೆ ಕಾಯ್ದುಕೊಳ್ಳುವುದು ಹಾಗೂ ಇತರರ ನಕಾರಾತ್ಮಕ ಅಭಿಪ್ರಾಯಗಳಿಂದ ದೂರವಿರುವ ಕುರಿತು ಕೈದಿಗಳಿಗೆ ಪ್ರಾಯೋಗಿಕ ಸಲಹೆಗಳನ್ನು ನೀಡಿದರು. ತಮ್ಮೊಳಗಿನ ನಕಾರಾತ್ಮಕ ಭಾವನೆಗಳು, ದುಃಖ ಮತ್ತು ಕೋಪವನ್ನು ತೊರೆದು ಸಕಾರಾತ್ಮಕತೆಯತ್ತ ಗಮನಹರಿಸುವಂತೆ ಅವರು ಕರೆ ನೀಡಿದರು.
ಕಾರಾಗೃಹದ ಸೂಪರಿಂಟೆಂಡೆಂಟ್ ವಿನೋದ್ ಕುಮಾರ್ ಹಾಗೂ ಜೈಲರ್ ಶಿವಾನಂದಂ ಅವರು ಗುರೂಜಿ ಹಾಗೂ ದರ್ಪಣ್ ಫೌಂಡೇಶನ್‌ಗೆ ಕೃತಜ್ಞತೆ ಸಲ್ಲಿಸಿದರು. “ಈ ಯೋಜನೆಯು ಕೇವಲ ತರಬೇತಿಗೆ ಸೀಮಿತವಾಗಿರದೆ, ಫಲಿತಾಂಶ ಆಧಾರಿತ (Outcome-based) ಮಾದರಿಯಲ್ಲಿ ನಡೆಯಲಿದೆ. ಅಭ್ಯಾಸನಿರತರಾಗುವ ಕೈದಿಗಳಲ್ಲಿ ಆಗುವ ಮಾನಸಿಕ ಹಾಗೂ ನಡವಳಿಕೆಯ ಬದಲಾವಣೆಗಳನ್ನು ನಿಯಮಿತವಾಗಿ ಗಮನಿಸಿ ಮೌಲ್ಯಮಾಪನ ಮಾಡಲಾಗುತ್ತದೆ” ಎಂದು ಅವರು ತಿಳಿಸಿದರು.
ವಿಕ್ರಮ ಓದುಗರ ವಾಟ್ಸಪ್ ಬಳಗಕ್ಕೆ ಸೇರಲು ಈ ಸಂಖ್ಯೆಯನ್ನು ನಿಮ್ಮ ಮೊಬೈಲ್‌ನಲ್ಲಿ ಸೇವ್ ಮಾಡಿಕೊಂಡು ನಮಗೊಂದು ಸಂದೇಶ ಕಳುಹಿಸಿ. ಮೊಬೈಲ್ ಸಂಖ್ಯೆ: 98800 21122
